Og Ikoduwaꞌ Sulat tidu ni
PETROS
1
Salam diniyu,
mga tow nong mingandol ni Isa Al-Masih mamaꞌ dinami.
Ong mohalgaꞌ nok kopongandol kini binogoy dinita pasal sok kologdong nok Tuhan bug Mogogawon ta nok si Isa Al-Masih.
Akon kini si Simon Petros,
og gulipon bug mokpoposampoy ni Isa Al-Masih.
2 Na bung mayan mokotabuk amu nong moglabi-labi nok kosannangan bug kolasa-kololat nok Tuhan biyan sok pogilala niyu diyanin bu ni Isa Al-Masih,
ok Panghuꞌ ta.
Popagason ta ok Kopongandol ta
3 Biyan sok kowasa nok Tuhan,
binogoyin dinita og lam nok kogunahan ta sok pokpongotubuꞌ nong molituhanoy.
Mokohampit ita nok kotubuꞌ kini biyan sok pogilala diyanin nong migonggat dinita biyan song mokosobuꞌ-sobuꞌ nok kotas bug kobaisanin.
4 Biyan sok kotas bug kobaisanin kini binogoyan ita nok Tuhan nong mohalgaꞌ bu landuꞌ kolingkat nong mga janjiꞌ.
Dadi biyan song mga janjiꞌ nog binogoyin kini,
mokohampit ita na sog gaddat molituhanoy bagun kohallian ta ok konapsuhan sog dunya nong mokopoglaat dinita.
5 Pagga ininang nok Tuhan og lam nini,
pongmuhut-muhutoy niyu tokodoy nong mogdungag ong mobais nog gaddat sok kopongandol niyu.
Na song mobais nog gaddat,
dungagan niyu pa nok kokosun.
6 Bu sok kokosun,
dungagan niyu pa nok poktiggol nog ginawa bu sok poktiggol nog ginawa,
dungagan niyu pa nok poksandal sog olo-olo nong mokobiyan diniyu.
Na sok poksandal,
dungagan niyu pa nog gaddat nong molituhanoy.
7 Bu sog gaddat nong molituhanoy,
dungagan niyu pa nok kopoglasa song mga koilugan ta sok kotombaꞌ,
sampoy na sog lam nok tow.
8 Poꞌ bilaꞌ diyon diniyu ong mga pongaddatan kini bu miglabi-labi pa,
taga jatu bu kopologunahan ok kokosun niyu pasal sok Panghuꞌ ta niyu Isa Al-Masih.
9 Sugaid ong mga tow nog ondaꞌ diyon dinilon ok pongaddatan kini,
mibuta ilon sok kosobonnalan,
bu kilingowan nilon nog inampun na ong mga dusa nilon.
10 Dadi mga koilugan,
ponamalan niyu tokodoy mokpomotud nong misunuꞌ amu song mga inonggat bu piniliꞌ nok Tuhan.
Poꞌ bilaꞌ inangon niyu kini,
diꞌ amu tokodoy mosuwoy diyanin,
11 tibuwa bogoyan amu nok Tuhan nok tantu nok kopatut sumolod sog daꞌdun nok kodoksuan nok pomarintahan nok Panghuꞌ bu Mogogawon ta niyu,
yonin na si Isa Al-Masih.
12 Dadi bisan kiosunan niyu na og lam nong milabitu kini,
bu mopagon na ok pogunut niyu sok kosobonnalan,
lolayun ku amu popondoman dun.
13 Para dinakon dumait tokodoy nok popondoman ku amu sog bon nok totubuꞌ u pa.
14 Poꞌ piosunan ku na nok Panghuꞌ ta niyu Isa Al-Masih nog diꞌ u na mobon sog dunya.
15 Saan pongmuhut-muhutan ku amu monintuluꞌ bagun pondomon niyu lolayun ong mga tintuluꞌ u kini bisan ondaꞌ u na dini sog dunya.
Ok Pokpotas ni Isa Al-Masih
16 Ondaꞌ ami pogimung-imung nong molingkat nok suksugan pasal sok kowasa nok Panghuꞌ ta Isa Al-Masih bu pasal sok kodatongin dini sog dunya.
Sugaid kisaksian nami tokodoy ok kowasa bu kotasin.
17-18 Dituꞌ ami dodaꞌ dunut ni Isa Al-Masih sog bontud sutsi dangan piotas bu piksanglitan yanin nok Tuhan,
og Gommaꞌ ta.
Midongog nami tokodoy ok tingog nok Tuhan Mokowasa tidu sog langit,
ok taluꞌ in,
“Yonin kini og Bataꞌ u nok kolasahan ku,
kisulutan ku tokodoy diyanin.”a
19 Ong mitongow bu midongog nami kituꞌ,
mipomotud ok taluꞌ nong mga konabihan,
dadi pogumatian ta mahatul.
Poꞌ ok taluꞌ nong mga konabihan mamaꞌ nok tiyow sok kodoloman nong mokpodolag sok pikilan niyu toktob mokpuliꞌ si Isa Al-Masih sog dunya bangka poksahaya sok pongatoyan niyu mamaꞌ sopantun nong motampal nog bitun sog doliꞌ-ondow.
20 Tibuwa pondom niyu og lam nong mga taluꞌ nok konabihan sok Kitab kanaꞌ tidu sok pikilan nilon,
bu daꞌdun da sop ok tow mokosabut nok pisampoy kini bilaꞌ daꞌdun ok tabang nok Tuhan dinilon.
21 Poꞌ diꞌ mokposampoy ok konabihan tidu sok pogbayaꞌ nilon,
tibuwa pigbayaan ilon nog Ruh nok Tuhan soliyan nilon mikposampoy nok Parmanin.