Ok Saksiꞌ ni Yahiyaa pasal ni Isa Al-Masih
1
1-2 Salam.
Miksulatu diniyu pasal ni Isa Al-Masih nog yanin ok Parman nok Tuhanb nong mogbobogoy nok kotubuꞌ.
Asal na yanin ongon sog daꞌ pa koongon og dunya.
Na pitongow dinami ong mogbobogoy kini nok kotubuꞌ nog asal diyon sok Tuhan,
og Gommaꞌ sok surgaꞌ.
Miglawas yanin manusiyaꞌ,
bu mitongow tokodoy yanin nog duwaꞌ mata nami,
mikikap nami pa tanan yanin,
bu midongog nami yanin.
Dadi ningkomun saksian bu posampoyon nami diniyu nog yanin ong mogbobogoy nong mosannang nok kotubuꞌ solama-lama.
3 Saan na ong midongog bu mitongow nami kituꞌ,
posampoyon nami da sop diniyu bagun mosunuꞌ amu sok poksolobuk nami sog Gommaꞌ ta sok surgaꞌ bu sog Bataꞌ in nok si Isa Al-Masih.
4 Sinulat nami kini bagun jukup og loliyag ta niyu.
Ok Tuhan ok Sahaya
5 Yonin kini ong midongog nami tidu ni Isa Al-Masih bangka nami posampoyoy diniyu,
ok Tuhan,
ok sahaya,
bu daꞌdun tokodoy ong modolom diyanin.
6 Dadi bilaꞌ taluon ta nong misolobuk ita sok Tuhan,
sokaliꞌ diyon ita pa sok kodoloman monginang nok kolaatan,
mokopogloput ita.
Poꞌ bilaꞌ maꞌ niyon,
ong maana nin,
ondaꞌ ita pogunut sok kosobonnalan.
7 Sugaid bilaꞌ diyon ita sok kodolagan mamaꞌ nok Tuhan,
moksolobuk ok pongatoyan ta niyu mga moktotombaꞌ.
Bu lolayun ita sutsihon tidu sog lam nog dusa ta pasal sog duguꞌ ni Isa,
og Bataꞌ nok Tuhan.
8 Bilaꞌ moktaluꞌ ita nog daꞌdun og dusa ta,
na poglimbungan ta og ginawa-baran ta,
bu daꞌ diyon sok pongatoyan ta ok kosobonnalan.
9 Sugaid bilaꞌ akuhon ta sok Tuhan ong mga dusa ta,
ampunonin ita,
bu sutsihonin ita sok kotanan nong mga kolaatan ta,
poꞌ yanin mologdong bu kopongandolan.
10 Tibuwa bilaꞌ moktaluꞌ ita nog daꞌdun og dusa ta,
na pinginloput ta ok Tuhan,
bu motampal nog daꞌ diyon sok pongatoyan ta ok Parmanin.