Markus 10

Ok Ponintuluꞌ ni pasal sok Pogbolong nong Moglaki-bini

Dadi minawaꞌ na si Isa sog bonuwa koyon, bangka yanin angoy sok probinsiya nog Yahudiya. Tidu dituꞌ timolipag ilon sok . Na linumuduk ni Isa ong mga tumpukan nok tow bu winasihatanin ilon mamaꞌ na nok kilayamanin.

2 Ongon ong mga minangoy diyanin monuloy-suloy, taluꞌ nilon, “Mogdadi taꞌ sok saraꞌ ta nog bolongon nog laki og libunin?”

3 Sinakan sop ilon ni Isa, “Olo ok suguan ni Nabi Musa pasal niyon?”

4 Ok tabal nilon, “Kumboyon ni Nabi Musa og laki mokpoimung nok sulat pasa, kaliꞌ in sooy bolongoy og libunin.” 5 Tibuwa ok taluꞌ ni Isa dinilon, “Pasal sok kotogas nog gulu nong mga pingapuꞌ niyu mamaꞌ da sop diniyu, sinulatin ok suguan koyon diniyu. 6 Tibuwa tidu sok ponognaan nok pokpoongon nok Tuhan, piongonin ong manusiyaꞌ nog laki bug libun. 7 Sabap niyon, sumuwoy og laki sog gommaꞌ bug ginaꞌ in, bu mampuꞌ sog libunin, 8 bangka ilon poksolobuk. Dadi kanaꞌ na ilon duwaꞌ kotow, sugaid misolobuk na ilon. 9 Saan na ok pisolobuk nok Tuhan, sumboy ondiꞌ moposuwoy nong manusiyaꞌ.”

10 Dangan mikopuliꞌ na ilon sog baloy, sinakan si Isa nong mga mulidin pasal sok pogbolong. 11 Ok tabalin dinilon, “Sima-sima og laki nong molong nog libunin, bangka yanin poglibun puliꞌ, na moitung da koyon nog jina. 12 Bu bilaꞌ og libun molong sog laki nin bangka yanin poglaki mokpuliꞌ, na moitung da koyon nog jina.”

Pingoni-ngonihan ni ong mga Gumbataꞌ

13 Tubus inoyit nong mga tow ong mga gumbataꞌ nilon dituꞌ ni Isa bagun kodoponanin. Tibuwa pigbinaan ilon nong mga mulidin. 14 Dangan mitongow ni Isa, daꞌ yanin kosulutoy, taluꞌ in dinilon, “Potiyangoy niyu ong mga gumbataꞌ mangoy dini dinakon, bu diꞌ niyu ilon pogondian poꞌ ong mamaꞌ dinilon koyon ong misakup sok . 15 Ong motudin, taluan ku amu, sima-sima og diꞌ mogimakat mampuꞌ sok Pomarinta nok Tuhan, mamaꞌ nok kotolimaꞌ nog gumbataꞌ dun, ondiꞌ yanin mokosolod sok Pomarintahan nok Tuhan.” 16 Tubus kinokopin ong mga gumbataꞌ bu dinoponanin og gulu nilon bangka nin ilon barakatoy.

Ok Tow Dayahan

17 Dangan posunguꞌ siloꞌ Isa gumonat, sunoy pa ongon ok tow ginumobok posunguꞌ diyon diyanin bangka luhud, taluꞌ in, “Mahatul nog guru, olo ong mobais nog inangon ku bagun mokotabuku nok ?”

18 Tinaluan yanin ni Isa, “Manu tinaluan nu akon nong mahatul pagga ok Tuhan da ong mahatul? 19 Kiosunan nu na ong mga suguan nok Tuhan, mamaꞌ na nog diꞌ a mogjina, diꞌ a momunuꞌ, diꞌ a monakow, diꞌ a sumaksiꞌ nog loput, diꞌ a moglimbung, bu pogaddatoy nu og gommaꞌ bug ginaꞌ nu.”

20 Na ok tabal nok tow koyon, “Tuwan Guru, inunutu og lam nituꞌ tidu pa sok kobikaan ku.”

21 Tinontong ni Isa ok tow kini bu linumasa yanin dun. Taluꞌ in, “Ongon pa solobuk ok kulang dinika, pogdagang nu ok pongartaꞌ nu bangka nu pomogoy song mga miskinan og halinin, bu koongonan ka da nog gartaꞌ dituꞌ sok . Tubus pokpuliꞌ a bangka a pogunut dinakon.” 22 Dangan midongogin ok taluꞌ ni Isa, migdukakung yanin bangka na awaꞌ dunut nok kosusahanin poꞌ modakol og gartaꞌ in.

23 Na limengeꞌ si Isa song mga mulidin bangka poktaluꞌ, “Mologon tokodoy ok kosolod nong mga tow dayahan sok Pomarintahan nok Tuhan.”

24 Dadi misobuꞌ tokodoy ong mga mulidin sok taluꞌ in. Tibuwa tinaluan ilon mokpuliꞌ ni Isa, “Na mga gumbataꞌ u, mologon tokodoy ok kosolod sok Pomarintahan nok Tuhan. 25 Molomu pa ok kosolod nog guntaꞌ sog luwang nog diyalum, gabaꞌ sok tow dayahan mokosolod sok Pomarintahan nok Tuhan.”

26 Na migdodungag tokodoy ok kosobuꞌ nong mga mulidin, bu miksitaluꞌ ilon, “Dadi sima buwan ong moawon?” 27 Dadi tinontong ilon ni Isa bangka yanin tabal, “Ong manusiyaꞌ diꞌ in moawon og ginawa nin, sugaid daꞌdun ong mologon sok Tuhan poꞌ og lam nituꞌ moinangin.”

28 Tubus miktaluꞌ si , “Na tontong nu ami kini, Guru, ginonatan nami na og lam nituꞌ bangka ami pogunut dinika.” 29-30 Tinumabal si Isa, “Ong motudin, suksugan ku amu, ok tow nog ginonatanin og baloyin, ok pigiluganin laki-libun, og gommaꞌ atawa ginaꞌ in, mga gumbataꞌ in atawa og lupaꞌ in pasal dinakon bu pasal sok pokposampoyin nong , na mokotabuk yanin nok sogatus kalihon sog ginonatanin. Tabukonin ong mga baloy, pigilugan libun-laki, mga ginaꞌ, mga gumbataꞌ bug lupaꞌ sok timpu ningkomun, sugaid dunut nok pogbinsanaꞌ nong mga sumaggaꞌ pasal sok pogunutin dinakon. Tibuwa sog ahirat ongon ong mosannang nok kotubuꞌ in solama-lama. 31 Modakol ok tow nong mikuna dini sog dunya, sugaid mobinayaꞌ da ilon dituꞌ, bu ongon sop ong mibinayaꞌ dini, sugaid mokuna da dituꞌ.”

Og Ikotolu ni Miktaluꞌ pasal sok Kopatoyin

32 Na mipanow ilon sog dalan posunguꞌ sog . Soliyan nilon tumukad, miguna si Isa dinilon. Misobuꞌ ong mga mulidin, bu miondok ong mga tow nong migunut dinilon sog binayaan. Piselenin mokpuliꞌ ok sopuluꞌ bu duwaꞌ kotow nong mulidin nog ilon-ilon da bangka nin suksugoy ok sosuku nok posunguꞌ matong diyanin. 33 Tinaluanin ilon, “Poginongog amu! Posunguꞌ ita niyu na sog Jerusalem bu wakilon nilon og song mga kounutan nok koimaman bug mga guru agama, bu hukumon nilon akon nok patoyon. Puwas niyon wakilon nilon akon song mga tow nok kanaꞌ bangsa Yahudi. 34 Pogunda-undahon nilon akon, dulaꞌ-dulaan bu lakposon, doksuꞌ patoyon nilon akon. Sugaid sog ikotolu ondow motubuꞌ u da mokpuliꞌ.”

Ok Pingoni ni Yaꞌkub bu ni Yahiya

35 Tubus mikpolani diyon ni Isa si Yaꞌkub bu si Yahiya nog yonin na og gumbataꞌ ni Sebede. Taluꞌ nilon, “Guru, kolegan nami bosiya nog bogoyon nu dinami bug olo ok pongonihon nami dinika.” 36 Tinumabal si Isa dinilon, “Olo ok pongonihon niyu dinakon?” 37 Ok tabal nilon, “Bilaꞌ motongow na ok kotas nok pomarinta nu, pingkud nu ami sog dapit lintu bug bibang nu.”

38 Taluꞌ ni Isa dinilon, “Daꞌ niyu kosunoy bug olo ok pingoni niyu koyon. Kotatasan niyu taꞌ ok kobinsanaan nok posunguꞌ matong dinakon? Kosandalan niyu taꞌ og logon nok kobiyanan ku?” 39 Ok tabal nilon, “Oo, kosandalan nami da!” Dadi tinaluan ilon ni Isa, “Kotatasan bu kosandalan niyu da ong mga logon mamaꞌ nok kobiyanan ku, 40 sugaid ok pogingkud sog dapit lintu bug bibangu, kanaꞌ akon og dumuhul dun, tibuwa ongon ong mga tinogamahan dun.”

41 Na dangan midongog nok sopuluꞌ kotow nog duma mulid pasal sok pingoni ni Yaꞌkub bu ni Yahiya, na miktolipun ilon molingit dun. 42 Saan na tinawag ilon ni Isa, bangka nin taluoy, “Kiosunan niyu nog ongon ok kowasa nong mga sultan dini sog dunya moksuguꞌ song mga pigbayaan nilon. Bu ok kounutanan nilon mokpopotongow nok kotas nilon song mga piktowan nilon. 43 Sugaid ondiꞌ koyon mogdadi diniyu, tibuwa sima-sima diniyu ong meleg motas, sumboy yanin mokpobabaꞌ moimung nok sosuguon niyu. 44 Bu sima diniyu ong meleg moimung nok kounutan, na sumboy mokpoulipon yanin sok kotanan. 45 Poꞌ bisan akon, og , minangoy dini kanaꞌ para tolagadon, tibuwa bagun moktolagad bu moglillaꞌ nong nyawa u gantaꞌ poglokat para sog nok kotanan manusiyaꞌ.”

Kiulian ni si Bartimiyus

46 Dadi mikangoy siloꞌ Isa sog bonuwa Ariha. Dangan posunguꞌ na yanin lumuwas sog bonuwa koyon dunut nong mga mulidin bug landuꞌ kodakol nok tow, ongon dituꞌ ok tow buta migingkud sok kilid dalan mokponglimus. Ong ngalanin Bartimiyus, og bataꞌ ni Timiyus. 47 Dangan midongogin nong miniyan si Isa, ok tow , migekes yanin, “Anduꞌ Isa, ponupuꞌ ni Sultan , kololatoy nu akon!”

48 Pigbinaan yanin nok kodakolan nok tow nog diꞌ moglimut, sugaid pipagasanin pa ok taluꞌ in, “Ponupuꞌ ni Sultan Daud, kololatoy nu akon!”

49 Dadi linumotaꞌ si Isa bangka poktaluꞌ, “Pangoy niyu yanin dini.” Dadi tinawag nilon og buta, long nilon, “Pogloliyaga! Indoga, poꞌ tinawagin ika.” 50 Na pinilakin og juba nin, bu mikindog yanin mogdayun bangka pogdaliꞌ-daliꞌ mangoy dituꞌ ni Isa. 51 Taluꞌ ni Isa diyanin, “Olo ok kolegan nu nog inangon ku dinika?” Tinumabal ok tow buta, “Tuwan Guru, melegu mokotongow.”

52 Na tinaluan yanin ni Isa, “Panowa na, ok pongandol nu ong mikokuliꞌ dinika.” Bu sododuun mikotongow na yanin bangka pogunut ni Isa sog dalan.