Rey Davidpa k'ari Tachi Ak'õre–it'ee p'ãda
(Salmos18.1-50)
22
1 Tachi Ak'õrepa David uchia atak'ãri Saúl juadeepa mãik'aapa awaraa k'îra unuamaa iru p'anapatap'edaarã juadeepa, Davidpa na k'ari iru–it'ee p'ãji.2 ‘‘Tachi Ak'õre, mù–it'ee pù mãu choma bùk'a bù, mù jâapari perã. Pùa mù k'aripa atapari mù k'îra unuamaa iru p'anapataarã juadeepa. Pùa mù uchiapipari ne–inaa k'achia ooyaa beerã juadeepa. 3 Pù mùchi Ak'õre Waibùa. Mãu choma bùk'a bù maa–e pùrã escudok'a bù, mù jâapari perã. Ne–inaa k'achiadeepa pùa mù k'aripa atapari. Eperã mãu tede miruparik'a, mãga pùk'a mù pùde miru pùk'apari, chîara peepataarãpa mù peenaadamerã. 4 Maperã mùa pùmaa pedee pia jarapari. Pù jõmaarã k'ãyaara waibùara bù. Mùa pùmaa ùt'aa iidik'ãri, pùa mù k'aripa atapari mù k'îra unuamaa iru p'anapataarã juadeepa.
5 ‘‘P'usapa mù pùra pùk'a ata baji mãik'aapa p'usa mù ârù che pùk'a baji. Mapa mù p'era nâbaji, piui jîak'aapa. 6 Lazopa bigi bùùrùde jõi ataparik'a, mãga pùk'a mùchi piudapa mù jõi pùk'a iru baji. 7 Mãga nùde mù audú k'îsia nâbak'ãri, pùmaa ùt'aa iidiji. Pù, mùchi Ak'õre Waibùamaa mùa k'aripa iidiji. Mãpai pù tedeepa pùa mù biapi ûriji. ¡Pù baparimaa mù biapi panaji!
8 ‘‘Mãpai pù k'îraudaik'ãri na eujã golpe wëredachi, ee k'arra paara. 9 ¡Audú k'îrau bada perã, pù k'âdeepa nari uchia nâbaji; pù it'aideepa t'ùpùtau urua uchia nâbaji mãik'aapa ok'ok'îra paara urua uchiapachi! 10 Pùa pajã ewaraa k'obùpiji mãik'aapa baai cheji. Jâarara t'ãmaa p'ãriu nâbù ârù bainâ beeji. 11 Querubína isia paraa bù ârù bataup'eda, nãude wãabai wãji. 12 Tachi teeda mirudaiparik'a, mãga pùk'a pù mirudachi jâarara t'ãmaa p'ãriu k'oira nâbada beede. 13 Pù badamãiipa pa tau p'orep'ore uchia nâbaji mãik'aapa ok'ok'îra urua baai chejida.
14 ‘‘Ùt'ariipa pù, Jõmaarã Ak'õre Waibùa pedeeji pa jîwaa nâbùde. 15 Soldaopa ematrùma trùparik'a, mãga pùk'a pùa pa baaipiji mù k'îra unuamaa iru p'anapataarã ârù. Mãgá ãchi jërek'ooji mù badamãiipa. Pariatua jîchoodachida. 16 ¡Pù k'îrau pedee jîwaa bùpa p'usa jã mãik'aapa na p'ek'au eujã basa unupiji!
17 ‘‘Ùt'ariipa pù jua mùmaa teeji. Mãgá mù uchia ataji p'usa nãpùa bùdeepa. 18 Pùa mù k'aripa ataji mù k'îra unuamaa iru p'anapataarã juadeepa, ãchi mù k'ãyaara juataura p'anajida mîda. 19 Mù juatau wêe nepùrade bak'ãri, ãchi mù ome chõo chejida. Mamîda pù, Tachi Ak'õrepa mù k'aripaji. 20 Mù uchia ataji ãchia mùmaa ne–inaa k'achia oodait'ee p'anadap'edaadeepa mù k'inia iru bapari perã. 21 Pù, Tachi Ak'õrepa mù mãgá k'aripaji, pùa jara bùk'a mùa oopari perã. 22 Tachi Ak'õre, pù ode mù nipapari. Ãpùtee wã–e. Mùa ne–inaa k'achia oo k'inia–e. Pùde mù ijãa amaa–e pait'ee. 23 Mùa oopari pù leyde jara bùk'a. Pùa jara bùk'a mùa oo amaa–e pait'ee. 24 Pù k'îrapite mù t'ãri jîp'a nipapari, p'ek'au k'achia ooamaa bairã. 25 Pù k'îrapite mù mãgá t'ãri jîp'a nipapari perã, pùa mù k'aripamaa bù.
26 ‘‘Tachi Ak'õre, pùa ichita oopari pùa jara bùk'a chi pùa jara bùk'a oopataarã ome. Pù k'achia wêe bapari chi ne–inaa k'achia ooamaa p'anapataarã ome. 27 Pù k'îra jîp'a bapari chi k'îra jîp'a p'anapataarã ome. Mamîda pù k'îsia k'awaa bapari chi k'ûrayaa p'anapataarã ome. 28 Pùa audua–ee beerã k'aripapari. Mamîda audua beerã chupùriapipari. 29 Tachi Ak'õre, mù–it'ee pù lamparak'a bù, mù bùmãi pùa urua pùk'apipari perã. Pù k'aurepa mù p'ãriu pùk'a bùde bak'aa. 30 Pùa mù k'aripak'ãri, mù wãi chõode soldaorã chok'ara ome mãik'aapa t'îui ãchi p'uuru murallapa t'ùak'au bùde.
31 ‘‘Tachi Ak'õre o pipùara bù awaraa o k'ãyaara irua ne–inaa jõma pia oopari perã. Iru pedee jõmaweda pia bù, irua jara bùk'a ichita oopari perã. Iru escudok'a bù irude ijãapataarã–it'ee, irua ãra jâapari perã. 32 Tachi Ak'õrek'a awaraa Ak'õre Waibùa wê–e. Awaraa Ak'õre Waibùapa tachi p'oyaa jâak'aa irua jâaparik'a. 33 Iruata mù juataura papipari mãik'aapa mùa oo bù pia uchiapipari. Irua mù k'aripapari ne–inaa k'achia oonaamerã mãik'aapa iru o piade nipapariimerã. 34 Iruata mù bigik'a k'ap'ip'ia p'irapipari mù k'îra unuamaa iru p'anapataarã naa mãik'aapa mù ee ùt'ùara beede nipak'ãri, irua mù jâapari. 35 Irua mùmaa jarateepari chõo k'awaa bamerã. Juataura papipari ematrùma broncedee ooda trùmerã. 36 Tachi Ak'õre, pùa mùmaa escudok'a teepari, mù k'achia beerã juadeepa k'aripa atak'ãri. Pù t'ãri pia bapari perã, eperãarã k'îrapite mù waibùara papiji. 37 Pùa mù k'aripapari mù k'îra unuamaa iru p'anapataarã juade baainaamerã mãik'aapa mù ode wãrude t'îutùnaamerã.
38 ‘‘Mapa mù k'îra unuamaa iru p'anapataarã t'êe wãp'eda, mùa ãchi p'oyaaji mãik'aapa ãchi jõpiji. Ãpùtee che–e paji mãùrã jõmaweda jõt'aa–emaa. 39 ¡Mùa ãchi jõt'aaji! ¡Piuk'oojidapù! ¡Mù ome waa chõo jùrùda–e pait'ee, mùa ãchi p'oyaada perã! 40 Chõodak'ãri, pùa mù ãchi k'ãyaara juataura papiji. Mãgá mù jua ek'ari p'anadaamaa p'anapataarã mù k'îrapite bedabaipiji. 41 Pùa mù k'îra unuamaa iru p'anapataarã ãpùtee jërek'ooji. Mãgá mùa ãchi jõt'aaji. 42 Ãchia jùrùjida ãchi k'aripadamerã. Mamîda apidaapa k'aripada–e paji. Tachi Ak'õre, pùmaa paara ùt'aa iidijida. Mamîda pùa pida ãchi k'aripa–e paji. 43 Mùa ãra piarsî pùk'aji yooro p'ora papirumaa mãik'aapa ãchi ârù t'ùa pùk'aji eperãpa calle jãdepema yooro susua t'ùaparik'a. 44 Pùa mù p'uuru pidaarã juadeepa mù uchiapiji, ãchi mù jua ek'ari p'anadaamaa p'aneedak'ãri. Pùa awaraa eujãdepema ijãadak'aa beerã mù jua ek'ari bùji mù mimiapataarã p'aneedamerã, aù naaweda mùa ãra k'awa–e baji mîda. 45 Mùa ne–inaa jarak'ãri, mãùrãpa oopata mùa jara bùk'a. K'îra tewaraarã mù jua ek'ari chok'ek'ee p'anapata. 46 Mãgee k'îra tewaraarãpa mù audú waawee p'anapata perã, k'ap'ùa wëree uchiapata ãchi mirudap'edaamãiipa mù jua ek'ari p'anapataadait'ee.
47 ‘‘¡Tachi Ak'õre ichita bapari! ¡Mù–it'ee iru mãu choma bùk'a bù, mù pi–ia jâapari perã! ¡Jõmaarãpa iru t'â t'o p'anadaipia bù, irua mù mãgá k'aripapari perã! 48 Iruata mù k'aripaji mù k'îra unuamaa iru p'anapataarã p'oyaamerã. Iruata p'uuru pidaarã awara–awaraa mù jua ek'ari bùji. 49 Pùa mù uchia atapari mù k'îra unuamaa iru p'anapataarã juadeepa. Mù ome chõo jùrùpataarã mùmaa p'oyaapipari mãik'aapa ne–inaa k'achia oopataarã juadeepa mù k'aripa atapari. 50 Maperã Tachi Ak'õre, awara–awaraa eujãdepemaarã taide mùa pùmaa pedee pia jarapari mãik'aapa salmo k'aripari. 51 Tachi Ak'õre, pùata mù jùrùt'eraji rey pamerã mãik'aapa awara–awaraa p'uuru pidaarã mùmaa p'oyaapipari. Mãga ooji mù, David, mùdeepa uchiadait'eerã paara, ichita k'inia iru bapari perã.”