Absalón piuda
18
1 Mama p'anùde Davidpa ichi soldaorã chip'e ataji mãik'aapa ûk'uru poro waibùarã jua ek'ari soldaorã milmil bùji mãik'aapa awaraarã jua ek'ari soldaorã ciencien bùji. 2 Maap'eda ma soldaorã t'ooda õpeede t'ooji. Aba Joab jua ek'ari bùji. Awaraa bùji Joab âpema, Sarvia warra Abisay jua ek'ari. Chi apema bùji guitita Itay jua ek'ari. Maap'eda ma soldaorã jõmaarãmaa nãga jaraji:—Mù parã ome auk'a chõode wãit'eeda aji.
3 Mamîda ãrapa p'anaujida:
—Rey Waibùa, mãga oonaapáde ajida. Tachi k'îra unuamaa iru p'anapataarã–it'ee p'uada–e tai jîchooruta pùjida maa–e pùrã tai ûk'uru k'iniiruta pùjida. Mamîda pù piurura, k'achiara bait'ee soldaorã diez mil piudap'edaarã k'ãyaara. Mapa, Rey Waibùa, p'uurude beepáde ajida. Namãik'aapa pùa awaraa soldaorã mãik'aapa net'aa pëiyada ajida, tai k'aripade.
4 Mãpai rey Davidpa mãgaji:
—Ooit'eeda aji, parãpa jara p'anùk'a.
Mãga jarap'eda, ma p'uuru t'îupatamãi bainâ banaji soldaorã grupo chaa, milmil mãik'aapa ciencien uchia wãruta misa.
5 Mãga nùde reypa nãga jaraji Joabmaa, Abisaymaa mãik'aapa Itaymaa:
—Parãpa mù k'inia iru p'anù pùrã, mù warra Absalonmaa ne–inaa k'achia oonaadapáde aji.
Soldaorã jõmaarãpa ûrijida reypa jarada ãchi poro waibùarãmaa.
6 Mãgá ma soldaorã uchiajida Israeldepema soldaorã ome chõode. Ãra ununajida pak'uru jêra bùmãi Efraín ëreerã eujãde. Mama chõomaa p'aneejida. 7 David eere p'anadap'edaarãpa israelitaarã p'oyaajida. Ma ewate cho–k'ara peejida; veinte mil soldaorã piujida. 8 Ma eujã jõmaade chõo wãjida. Maperã ma ewate ma pak'uru k'aurepa eperãarã chok'araara piujida, espadapa piudap'edaa k'ãyaara.
9 Mãgá chõo jõnùde Absalón David eere p'anadap'edaarã ome ununaji. Jirabodode chi mula t'îudachi encina pak'uru choma bù ek'ari. Mãga bùde Absalón puda waree bada perã, pak'uru juade jõidachi mãik'aapa iru mama baijira beeji, chi mula jirabodoru misa. 10 David eerepema soldao abaapa mãga unuk'ãri, Joabmaa nãga jaranaji:
—¡Absalón unujida aji, encina pak'urude baijira bù!
11 Joabpa p'anauji:
—¿K'asaa? ¿Pùa iru unujida ajik'ã? ¿Sãap'eda iru peet'aa–e pajima? aji. Ma pari mùa pùmaa teek'aji p'arat'a tau diez, chõo k'awaa bù k'ùrrùde jâpari ome.
12 Mamîda ma soldaopa p'anauji:
—Pùa mùmaa p'arat'a tau mil teeru pùjida, mùa rey warra pee–e pait'ee. Taipa ûrijidada aji, reypa jarak'ãri pùmaa, Abisaymaa mãik'aapa Itaymaa chi warra Absalonmaa ne–inaa k'achia oonaadamerã. 13 Ma awara mùa Absalón peeda paara, reypa k'awaak'aji, irua ne–inaa jõma k'awapari perã. Mãga pada paara, pùa maarepida oo–e pak'ajida aji, mù k'aripait'ee.
14 Mãpai Joabpa mãgaji:
—Pù ome mù waa pedee–eda aji.
Mãpai Joabpa miasu õpee atap'eda, Absalón baijira badamaa wãji mãik'aapa iru t'ûade miasupa suk'ooji. Joabpa iru mãgá suk'oop'eda, iru at'ãri chok'ai baji. 15 Mãpai arma anipapataarã Joab ome nipapatap'edaarã diez Absalón wap'ùra atadap'eda, peet'aajida. 16 Mãpai Joabpa jaraji trompeta chaadamerã. Mãga ûridak'ãri, David eerepema soldaorãpa waa chõo jùrùda–e paji israelitaarã soldaorã ome. 17 Maap'eda Absalón k'ap'ùa piuda bat'ajida uria choma badade ma pak'uru jêra badamãi. Aù ârù mãu chok'ara p'e nâbùjida. Mãùmisa israelitaarã Absalón eere p'anadap'edaarã ãchi te chaa erreu wãjida.
18 Absalón at'ãri chok'ai bak'ãri, mãu choma bùpiji rey eujã jewedaa apatap'edaade ichi piuk'ãri, k'irãpadamerã. Mãga ooji k'îsia bada perã: “Mù warra wêe bù perã, ma mãu k'aurepa mù k'irãpadait'ee.” Mapa ma mãu ichi t'âk'a t'â bùji. At'ãri ma mãu t'âjarapata “Absalón k'irãpapata mãu”.
Davidmaa jaradap'edaa Absalón piuda
19 Absalón peedap'edaa t'êepai, Sadoc warra Ajimazpa Joabmaa mãgaji:
—Mù reymaa p'irapipáde aji, jarade Tachi Ak'õrepa ooda iru uchiapiit'ee iru k'îra unuamaa iru p'anapataarã juadeepa.
20 Mamîda Joabpa p'anauji:
—Pù idi wã–eda aji. Awaraa ewaride pù k'ap'ùa pari reymaa ne–inaa jara pëiit'ee. Mamîda idi mùa pù pëi–eda aji, rey warra piuda perã.
21 Mãpai Etiopiadepema soldaomaa Joabpa mãgaji:
—Wãpáde aji, pùa unuda reymaa jarade.
Mãgá ma Etiopiadepema Joab k'îrapite âjaabaip'eda despediit'ee, p'ira uchiaji reymaa wãit'ee.
22 Sadoc warra Ahimazpa mãga k'awaak'ãri, Joabmaa waya mãgaji:
—Mù ma Etiopiadepema t'êe wãpipáde aji.
Mãpai Joabpa iidiji:
—Warra, ¿sãap'eda pù audú wã k'inia bùma aji, net'aa ata–eeta mãga jaranaru k'aurepa?
23 Ahimazpa p'anauji:
—Mù–it'ee p'ua–e bùda aji. P'ira k'inia bùda aji.
Mãpai Joabpa mãgaji:
—¡Mãgara p'ira wãpáde! aji.
Mãgá Ajimaz p'ira wãji ma eujã jewedaade mãik'aapa ma Etiopiadepema p'ira wãyaadachi. 24 Mãga nùde David su–ak'ù baji p'uurudepema puerta edajãde. P'uuru jâapari ma puerta bùmãi ùt'à baji muralladeepa ak'ùpariit'ee. Ak'ùmaa bùde eperã p'ira cheru unu ataji. 25 Aramata reymaa golpe jaraji.
Mãpai reypa mãgaji:
—Abapai cheru pùrã, jara k'inia bùda aji, pedee pia jara cheru.
Ma eperã k'ait'aara chewãru misa, 26 ma jâaparipa awaraa eperã unuji auk'a p'ira cheru. Mãpai ma jâaparipa biaji puerta jâapari eujãde badamaa:
—Awaraa eperã p'ira cheruda aji.
Mãga ûrik'ãri, reypa mãgaji:
—¿Ichiaba ne–inaa piata jara cheru–ek'ã? aji.
27 Mãpai ma jâapari muralla ârù badapa mãgaji:
—Eperã naa cheru Sadoc warra Ajimazk'a bùda aji.
Reypa p'anauji:
—Ajimaz eperã piada aji. Wãara ne–inaa piata jara cheruda aji.
28 Ajimaz rey k'îrapite pak'ãri, bedabaidachi tau bùùrù eujãde t'õbairumaa mãik'aapa saludaap'eda, nãga jaraji:
—¡Rey Waibùa, pù Ak'õre Waibùa jõmaarã k'ãyaara waibùara bùda aji, iruata pù k'îra unuamaa iru p'anapataarã p'oyaapida perã!
29 Mãpai reypa iidiji:
—¿K'ûtrãa Absalón k'ap'ùa pia bùk'ã? aji.
Ahimazpa p'anauji:
—Pù mimiapari Joabpa mù pëik'ãri, soldaorã t'ãide biuk'a para nâbajida aji. Mamîda mùa k'awa–e paji k'ãare k'aurepa.
30 Mãpai reypa Ajimazmaa mãgaji:
—Jãma bainâ banapáde aji.
—Rey Waibùa, mùa pedee pia jara cheruda aji. Idi Tachi Ak'õrepa pùmaa p'oyaapiji pù jua ek'ari p'anadaamaa p'anadap'edaarã.
32 Mãpai reypa iidiji ma Etiopiadepemamaa:
—¿K'ûtrãa Absalón k'ap'ùa pia bùk'ã? aji.
Ma Etiopiadepemapa p'anauji:
—¡Pia bak'aji pù k'îra unuamaa iru p'anapataarã mãik'aapa pùmaa ne–inaa k'achia oo k'inia p'anùùrã jõmaweda jõdap'edaa paara ma k'ûtrãak'a!
33 Mãga ûrik'ãri, rey t'ãri p'uadachi. Wãji ichi cuarto p'uurudepema puerta ârù badade mãik'aapa jêemaa beeji. Ma wãde nãga jarapachi: “¡Mù warra Absalón, mù warra Absalón! ¡Piara bak'aji mù piuda paara pù pari! ¡Mù warra Absalón, mù warrada!” apachi.