1 Samuel
Samuel mãik'aapa Saúl bapata
Introducción
Na libro leedak'ãri, k'awadai israelitaarã ome p'asada charraarã jua ek'ari p'anadak'ãri. Na librode jara bù chi naapema Tachi Ak'õre pedee jarapari t'âjarapatap'edaa Samuel t'oda israelitaarã t'ãide. Naapùara leedak'ãri, k'awadai Tachi Ak'õrepa eperã aba jùrùt'erada israelitaarã, pia jarait'eera, ichi p'uuru pidaarã rey pamerã. Mãgà eperã t'âjarapachida Saúl. Iru jùrùt'eraji ichi pedee jarapari Samuel k'ap'ùa. Na libro pi–ia leedak'ãri, audú unudait'ee eperãarã t'â õpee: Saúl, Samuel mãik'aapa David.
Chi naapema capítulo sietede k'awadai k'airã paji Samuel ëreerã; sãgá iru t'oda mãik'aapa ichi mimia oopariida israelitaarã t'ãide. Saúl rey beedak'ãriipa, ichia ooda jõmaweda unudai capítulo ochodeepa quince parumaa. T'êepai unudai Saúl rey bùde ichia ne–inaa k'achia ooda, David k'îra unuamaa iru beek'ãri, ichi k'ãyaara waibùara pai jîak'aapa. Ma k'aurepa Tachi Ak'õrepa jùrùt'eraji David, rey beemerã iru pari. Capítulo dieciseideepa treinta parumaa jara bù Saulpa David jùrùda peet'aait'ee. Ma t'êepai capítulo treinta y unode jara bù sãgá Saúl ichi warrarã ome piudap'edaa filisteorã ome chõo jõnùde.
Na librode pi–ia k'îsia p'aneedak'ãri, tachia k'awadai Tachi Ak'õrepa k'inia bù eperãarãpa oodamerã irua jara bùk'a. Mãga oodak'ãri, irua ma p'uuru pidaarã bendiciapari. Mamîda p'uuru pidaarãpa irua jara bùk'a ooda–e pak'ãri, irua ãramaa ne–inaa k'achia oopari.