2 Samuel
Rey David bapariida
Introducción
Na librode jara bù 1 Samuel librode p'ãdap'edaa t'êepai p'asada. Naapùara k'awadai David jêeda Saúl mãik'aapa Jonatán piuda k'aurepa. Ichiaba k'awadai David rey pada Judá eujãde (cap.1–4). Mãgá David rey bùde Judá eujãde, chi apemaarã israelitaarã Saúl warra rey Isboset jua ek'ari p'anadap'edaarã t'ãri ãrii p'aneejida Judá eujãdepemaarã ome. Maapai David chõoji Isboset jua ek'ari p'anadap'edaarã ome ãchi p'oyaarumaa. Mãgá David rey beeji israelitaarã eujã jõmaade (cap. 5–24).
Na librode jara bù Davidpa ne–inaa pi–ia ooda Tachi Ak'õre waawee bada perã. Maperã eperãarãpa iru t'o p'anajida. Ichiaba jara bù irua ne–inaa k'achia ooda, eperã ne–inaa k'achia oo–e bùta peepirumaa.
Na libro leedak'ãri, k'awadai David chõo k'awaa bapata mãik'aapa sãgá pi–ia k'îsiapachi chõode wãit'ee. Iru k'aurepa Tachi Ak'õrepa ichi p'uuru pidaarã eperãarã waibùa papiji. Iru rey bùde chõopachi awaraa p'uuru pidaarã ome ãra p'oyaarumaa.
Tachi Ak'õre waawee bapachi perã, ne–inaa k'achia ook'ãri, Tachi Ak'õre k'îrapite irua jarapachi jõmaweda ichia ne–inaa k'achia ooda. Mapa Tachi Ak'õrepa David pia ak'ùpachi.