Saúl ichi warrarã ome piudap'edaa
(1 Crónicas 10.1-12)
31
1 Mãùmisa, filisteorãpa israelitaarã ome chõo chejida. Israelitaarã soldaorã ãra naa jîchoo wãjida mîda, Guilboa eede cho–k'ara peejida. 2 Mãga nùde ma filisteorã Saúl t'êe mãik'aapa chi warrarã t'êe wãjida. Êp'e atanadak'ãri, Saúl warrarã Jonatán, Abinadab mãik'aapa Malquisúa peek'oojida. 3 Saúl ik'aawa audú chõo para baji. Ãchidepema sia trùpataarãpa ãchi sia trùrutade, Saulmaa oonajida.4 Mapa irua mãgaji chi arma anipaparimaa:
—Pù espada êt'a atap'eda, mù su peet'aapáde aji. Mùa k'inia–e bù jã ijãadak'aa beerãpa mù peedamerã, mù oo iru p'anù misa.
Mamîda chi arma anipaparipa iru pee k'inia–e paji, audú p'era nâbada perã. Maperã Saulpa ichi espada k'â ùt'aa bùp'eda, aù ârù baainaji. Mãgá ichi juadoopa piudachi. 5 Chi arma anipaparipa mãga unuk'ãri, auk'a ichi espada k'â ârù baainaji. Mãgá piuji chi poro waibùa ome. 6 Mãgá ma ewateweda piujida Saúl, chi warrarã õpee, chi arma anipapari mãik'aapa awaraa soldaorã iru ome nipadap'edaarã chok'ara.
7 (Israelitaarã ma Jezrel eujã jewedaa k'îraik'a eere p'anapatap'edaarãpa mãik'aapa Jordán to oriente eere p'anapatap'edaarãpa k'awaadak'ãri israelitaarã soldaorã jîchoo wãda mãik'aapa Saúl chi warrarã ome piudap'edaa, ãchi p'uuru atabëijida auk'a jîchoodait'ee. Maap'eda filisteorã ma p'uurude p'ana chejida.)
8 Aù norema filisteorãpa piudap'edaarã k'ap'ùade net'aa iru bada ata chedak'ãri, Guilboa eede unu atajida Saúl mãik'aapa chi warrarã õpee k'ap'ùa piuda. 9 Mãpai Saúl poro t'ùap'e atajida mãik'aapa iru arma anipada atajida. Mãpai jara pëijida filisteorã eujã jõmaade, mãdepemaarãpa mãik'aapa ãchi ak'õre waibùa apatap'edaa te ak'ùpataarãpa k'awaadamerã. 10 Ma t'êepai Saúl arma p'e bùjida ãchi ak'õre waibùa apatap'edaa Astarté tede. Jõdee chi k'ap'ùa piuda baijira bùjida Betsán p'uuru t'ùak'au bada murallade.
11 Israelitaarã Galaad eujãdepema Jabés p'uurude p'anapatap'edaarãpa mãga k'awaa atadak'ãri, 12 chi piara chõo k'awaa beerãpa pedeeteejida wãdait'ee Saúl k'ap'ùa atade. P'ãrik'ua wãjida panadait'ee Betsán p'uurude. Mama chõodap'eda, Saúl mãik'aapa chi warrarã k'ap'ùa piuda atajida mãik'aapa aneejida Jabés p'uurudee. Mama paat'aajida. 13 Ma k'ap'ùa piuda paadadepema chi bùùrù ùajida Jabés p'uurude, tamarisco pak'uru ek'ari. Maap'eda t'ãri p'uapa nek'oda–ee p'aneejida k'ãima siete wãyaaru misa.