Davidpa ichi eere p'anadap'edaarã ome amalecitaarã p'oyaadap'edaa
30
1 K'ãima õpee parumaa David ichi soldaorã ome Siclag p'uurude panajida. Mamîda panadak'ãri, unujida ma p'uuru jõma paa jõdai bù. Ãchi wê–e misa, amalecitaarãpa ma Néguev eujãdepema Siclag p'uurude chõo chejida. 2 Atadachida wêraarã jõmaweda mãik'aapa ãra ome p'anadap'edaarã; warrarã, chonaarã paara. Apida peeda–e paji mîda, ma p'uuru pidaarã jõma atadachida mãik'aapa ma p'uuru jõt'aajida.3 Davidpa ichi soldaorã ome mãga unudak'ãri mãik'aapa k'awaadak'ãri ãchi wêraarã warrarã ome jita ateedap'edaa, 4 jêemaa p'aneejida mãik'aapa biamaa p'aneejida, juatau wêe p'aneerutamaa. 5 Ichiaba ma amalecitaarãpa David wêraarã omé atadachida; Jezreldepema Ajinoán mãik'aapa Carmel p'uurudepema Nabal wêra pada, Abigaíl.
6 David k'îsia nâbaji ichi soldaorã iru ome k'îrau p'anadap'edaa perã, ãchi warrarã k'aurã ome ateedap'edaa k'aurepa. Mapa David mãupa bat'a peedait'ee paji. Mamîda Tachi Ak'õrepa iru k'aripaji p'eranaamerã. Ma k'ãyaara jùrùji ichi Ak'õre Waibùa, Tachi Ak'õrepa oopi k'inia bù. 7 Jaraji Ajimélec warra, p'aare Abiatarmaa Tachi Ak'õre efod aneemerã.
—¿Jã nechù–idaa beerã t'êe wãdaipia bùk'ã? aji. ¿Ãchi êp'e atadaik'ã? aji.
Tachi Ak'õrepa p'anauji:
—Wãdapáde aji, ãra êp'e atade. Pãchideerã ãra juadeepa uchia atadait'eeda aji.
9 Aramata David amalecitaarã t'êe wãji ichi seiscientos soldaorã ome. Besor to chak'ede panadak'ãri, 10 soldaorã doscientos p'aneejida, audú sê p'anadap'edaa perã ma to chak'e sîadait'ee. Mamîda apemaarã cuatrocientos David ome wãjida.
11 Ma wãdade mãùrãpa Egiptodepema aba ununajida. Davidmaa ateejida mãik'aapa ne–inaa k'oparii pania ome mãgùmaa teejida. 12 Irumaa ne–inaa p'ep'edee bù aba higojõ p'oodadee ooda mãik'aapa ne–inaa p'ep'edee bù omé uva p'oodadee ooda k'opijida mãik'aapa ne–inaa topijida. Iru juatau wêe baji k'ãima õpee ne–inaa to–ee, nek'o–ee bada perã.
13 Mãgá ma Egiptodepema juatau paraa beek'ãri, Davidpa irumaa iidiji:
—¿Pù chipari k'aima? aji. ¿Pù sãmãik'aapa cheruma? aji.
Ma Egiptodepemapa p'anauji:
—Mù Egiptodepema, amalecita esclavo. K'ãima õpee paruda aji, mù k'ayaadariida ode wãdade. Mù chiparipa mãga unuk'ãri, mù nama atabaibëiji. 14 Tai quereteorã sur eerepema eujãdeepa, Judá sur eerepema eujãdeepa mãik'aapa Caleb ëreerã sur eerepema eujãdeepa chewãdade, Siclag p'uuru paa jõt'aajidada aji.
Mãpai Davidpa iidiji:
15 —¿Mù ateeik'ã aji, jã nechù–idaa beerã p'anùmaa?
Ma Egiptodepemapa p'anauji:
—Mùa ãramaa ateeyada aji, Tachi Ak'õre k'îrapite pùa juraaru pùrã mù chiparimaa tee–e pait'ee mãik'aapa mù pee–e pait'ee.
16 Mãpai ateeji. Panadak'ãri ma nechù–idaa beerã p'anadap'edaamãi, unujida pariatua nek'omaa, ne–inaa tomaa, fiesta oomaa p'anù. O–îa p'anajida Filistea eujãdepemaarã, Judá eujãdepemaarã net'aa chùa atadap'edaa perã. 17 David chi soldaorã ome ma nechù–idaa beerã ome chõojida tap'edadeepa k'eudarumaa. Mãùrã peek'oo wãjida. Mamîda mãga bùde mãùrãdepema k'ûtrãarã cuatrocientos ãchi camello ârù jirabodojida. 18 Davidpa net'aa jõmaweda amalecitaarãpa chùa ateedap'edaa ataji. Ichiaba chi wêraarã omeeweda ataji. 19 Eperãarã chip'edaidak'ãri, jõmaweda chok'ai p'anajida. Warra wa chonaa apida piu–e paji. Ãchi warrarã, k'aurã paara mama p'anajida. Ichiaba ãchi net'aa jõmaweda jãri atajida. 20 Ma awara ovejaarã mãik'aapa p'ak'aarã jõmaweda p'e atajida.
Chi ne–animalaarã atee wãdap'edaarãpa nãga jarapachida:
—Nãgà ne–inaa jõmaweda Davidpa jãri atadada apachida.
21 Ãpùtee wãdade panajida Besor to chak'emãi, soldaorã doscientos p'aneedap'edaamãi, sê p'anadap'edaa k'aurepa. Ma soldaorã uchiajida David ichi soldaorã ome k'îrachuude. Davidpa ãra unuk'ãri, saludaaji.
22 Mamîda David ome nipadap'edaarã ûk'uru ne–inaa k'achia ooyaa p'anadap'edaa perã, irumaa nãga jaranajida:
—Ãra tachi ome wãda–e pada perã, ãramaa teeda–e ne–inaa jãri atadap'edaadepema. Aba teedait'eeda ajida, ãchi wêraarã warrarã ome. Mãpai ãra ãyaa pëidait'eeda ajida.
23 Mamîda Davidpa mãgaji:
—Mùchi auk'aarã, mãga ooda–eda aji. Tachi Ak'õrepa tachideerã chok'ai uchiapiji ma nechù–idaa beerã juadeepa mãik'aapa ãra tachimaa p'oyaapiji. Iru k'aurépata na ne–inaa jõma iru p'anù. 24 ¡Apidaapa parã pedee ijãada–e pait'ee! Maperã na net'aa jãri atadap'edaa jededap'eda, auk'a teedait'eeda aji, chõode nipadap'edaarãmaa mãik'aapa net'aa ak'ùmaa p'aneedap'edaarãmaa.
25 (Davidpa ma ley jaradak'ãriipa, israelitaarã soldaorãpa mãga oopachida.)
26 Siclag p'uurude panadak'ãri, Davidpa ma ne–inaa jãri atadap'edaa ûk'uru tee pëiji chi k'õp'ãyoorã, Judá ëreerãdepemaarã poro waibùarãmaa. Ma ne–inaa ome nãga jara pëiji: “Parãmaa na ne–inaa tee k'inia bù. Jãri atajidada aji, Tachi Ak'õre k'îra unuamaa iru p'anapataarã juadeepa.” 27 Mãgá ma ne–inaa jãri atadap'edaa tee pëiji nãgà p'uurudepema poro waibùarãmaa: Betel p'uuru, Néguev eujãdepema Ramot p'uuru, Jatir p'uuru, 28 Aroer p'uuru, Sifmot p'uuru, Estemoa p'uuru, 29 Racal p'uuru, mãik'aapa Jeramel eujã jewedaadepema p'uuru bee poro waibùarãmaa, quenitaarã p'uuru poro waibùarãmaa, 30 Jormá p'uuru, Corasán p'uuru, Atac p'uuru, 31 Hebrón p'uuru, mãgà p'uurudepema poro waibùarãmaa mãik'aapa awaraa p'uuru iru ichi ome nipadap'edaarã wãyaadap'edaadepema poro waibùarãmaa.