Filisteorã poro waibùarãpa Davidde ijãada–ee p'aneedap'edaa
29
1 Filisteorã chip'ejida Afec p'uurude. Jõdee israelitaarã soldaorãpa ãchi carpa eebai jira bùjida k'ãidait'ee Jezrel eujã jewedaade pania poátrù bùmãi. 2 Filisteorã poro waibùarã uchiajida ãchi jua ek'ari p'anadap'edaa soldaorã ome; ciencien mãik'aapa milmil. David ichi soldaorã ome t'êe chejida rey Aquis ome. 3 Filisteorã poro waibùarãpa David ichi soldaorã ome mãgá unudak'ãri, Aquimaa iidijida:—¿K'ãata oomaa p'anùma ajida, jã hebreorã tai ome?
Rey Aquipa p'anauji:
—Nãgà David, israelitaarã rey Saúl soldaorã poro waibùa pada. Año waa iru mù ome bùda aji. Mù ome beedadeepa mùa irude maarepida ne–inaa k'achia unu–e bùda aji.
4 Mamîda ma filisteorã poro waibùarã Aquis ome k'îraudachida mãik'aapa irumaa mãgajida:
—Jarapáde ajida, jã hebreo ãpùtee wãmerã ichi soldaorã ome. Pïiji pùa p'uuru iru–it'ee awara bùdamaa. Taipa k'iniada–e ãchi auk'a tai ome wãdamerã chõode. Chõo jõnùde tai peepidak'oodai. Mãgá iru pia beei ichi poro waibùa Saúl ome, tachi soldaorã peedap'edaa poro irumaa ateedak'ãri. 5 ¿Nãgà David k'aurepa israelitaarã pairajida–ek'ã mãik'aapa iru ãpùte nãga k'aripachida–ek'ã: ‘Saulpa ùmùk'îraarã mil peeji; jõdee Davidpa diez mil peeji’?
6 Mãga ûrip'eda, Aquipa David t'â ataji mãik'aapa irumaa mãgaji:
—Tachi Ak'õre ichita chok'ai bù k'îrapite mùa juraa bù pù t'ãri jîp'a bapari mù ome. Ichita ne–inaa jõma pia oopari parã p'anapata p'uurude. Mùa pù pia ak'ùpari mãik'aapa k'inia bù pù mù ome auk'a wãmerã na chõode wãdade. Mamîda filisteorã soldaorã poro waibùarãpa pù mãga ak'ùda–e p'anù. 7 Maperã mùa parã ãpùtee pëiit'ee pãchi p'uurudee. Mùa jara bùk'a k'ãiwee wåtù mãik'aapa ne–inaa maarepida oonaadapáde aji, ma poro waibùarã audupùara k'îrau p'aneenaadamerã.
8 Davidpa p'anauji:
—Mamîda Rey Waibùa, ¿mùa k'ãata oojima? aji. ¿K'ãare k'achiata mùde unu bùma? Mù pùmaa chedak'ãriipa, k'îra jîp'a nipadoo. ¿Sãap'eda pùa k'inia–e bùma aji, auk'a chõonadamerã pù k'îra unuamaa iru p'anapataarã ome?
9 Aquipa p'anauji:
—Mù–it'ee pù Tachi Ak'õrepa ángel pëidák'ata bù. Mamîda filisteorã soldaorã poro waibùarãpa k'iniada–e p'anù parã auk'a chõode wãdamerã. 10 Maperã nu tap'eweda pù ãpùtee wãipia bùda aji, awaraa israelitaarã pù ome Saúl ik'aawaapa uchiadap'edaarã ome.
11 Mãgá David chi soldaorã ome aù norema tap'eweda p'irabaijida mãik'aapa ãpùtee wãjida filisteorã eujãdee. Jõdee ma filisteorã Jezrel eujã jewedaadee wãjida.