28
1 Maapai filisteorã soldaorã chip'ejida jura chõonadait'ee israelitaarã ome. Mãga bùde rey Aquipa Davidmaa nãga jaraji:—Pùa k'awa bùda aji, tai ome parã auk'a uchiadait'ee jura chõode.
2 Davidpa p'anauji:
—Pia bùda aji. Ârá pùa unuit'eeda aji, sãgá mù, pù mimiapari chõopari.
Aquipa mãgaji:
—Mãgá pia chõoru pùrã, mùa pù mùchi k'ap'ùa jâapataarã poro waibùa bùyada aji.
Saúl wãda piudaarã ome pedeeparida aparimaa
3 Maapai Samuel jai–idaa baji. Israelitaarã iru–it'ee jêe para bap'eda, Ramá p'uurude ùajida. Ma awara Saulpa Israel eujãdeepa jërek'ooji piudaarã ome pedeepatada apataarã ne–inaa p'asait'ee jarapataarã ome.
4 Filisteorã chip'edaidap'eda, Sunén p'uurude p'ananajida mãik'aapa mama ãchi carpa eebai jira bùjida mama k'ãidait'ee. Jõdee Saúl ichi soldaorã ome Guilboa eede p'ananajida mãik'aapa mama ãchi carpa eebai jira bùjida mama k'ãidait'ee. 5 Ma eedeepa Saulpa filisteorã unuk'ãri, ãchobeedachi mãik'aapa audú p'era nâbeeji. 6 Mapa Tachi Ak'õremaa ùt'aa iidiji k'await'ee k'ãata ooipia bù. Mamîda Tachi Ak'õrepa maarepida p'anau–e paji k'ãimok'araade, p'aarepa anipapari Urim k'ap'ùa, maa–e pùrã Tachi Ak'õre pedee jarapari k'ap'ùa.
7 Mãgá Tachi Ak'õrepa p'anau–e pak'ãri, Saulpa mãgaji ichi ek'ari p'anadap'edaarãmaa:
—Wêra piudaarã ome pedeepari jùrùnadapáde aji. Mùa irumaa iidiit'ee k'ãata ooipia bù.
Ichi ek'ari p'anadap'edaarãpa p'anaujida:
—Endor p'uurude mãgee wêra bùda ajida.
8 Mãpai Saulpa ichi p'aru jâ bada êrat'aap'eda, p'aru jîp'aa jâ beeji mãik'aapa ùmùk'îraarã omé ome ma p'ãrik'ua wãji ma wêramaa. Saulpa ma wêra unuk'ãri, mãgaji:
—Mùa pùmaa chupùria iidi bù mùa jararu jaure t'âjaramerã, mãgùmaa ne–inaa iidi k'inia bairã.
9 Ma wêrapa p'anauji:
—Pùa k'awa bùda aji, na eujãdeepa Saulpa jërepida ne–inaa p'asait'ee jarapataarã mãik'aapa piudaarã ome pedeepataarã. ¿Sãap'eda pùa nama iidi che bùma? aji. Mùa mãga jararu pùrã, parã k'aurepa mù peet'aadayada aji.
10 Mamîda Saulpa nãga jaraji:
—Tachi Ak'õre ichita chok'ai bù k'îrapite mùa juraa bùda aji, apidaapa pùmaa maarepida ne–inaa k'achia ooda–e pait'ee.
11 Mãpai ma wêrapa iidiji:
—¿Chisãgà piuda t'âjaraipia bùma? aji.
Saulpa p'anauji:
—Samuel t'âjarapáde aji.
12 Ma wêrapa t'âjaramaa bùde, Samuel cheji. Mãga unuk'ãri, ma wêra biadachi p'era nâbùpa. Mãpai mãgaji:
—¿Sãap'eda pùa mù k'ûrat'aajima? aji. ¡Pù Saulta!
13 Mamîda reypa mãgaji:
—P'eranaapáde aji. ¿K'ãata unujima? aji.
Ma wêrapa p'anauji:
—¿Iru sãga bùma? aji.
Ma wêrapa p'anauji:
—Iru chonaa bù mãik'aapa p'aru teesoo jâ bùda aji.
Saulpa k'awaak'ãri mãgà Samuel, chi piuda, bedabaidachi tau bùùrù eujãde t'õbairumaa.
15 Mãpai Samuelpa Saulmaa iidiji:
—¿K'ãare–it'ee mù t'âjima aji, piudaarãmãiipa chemerã?
Saulpa p'anauji:
—Mù ãchobee nâbùda aji, filisteorã tai ome chõo cheruta perã. Tachi Ak'õremaa mùa iidijida aji. Mamîda maarepida p'anau–e k'ãimok'araa bùde, maa–e pùrã iru pedee jarapataarã k'ap'ùa pari. Maperã mùa pù t'âjida aji, jaramerã mùa k'ãata ooipia bù.
16 Mãpai Samuelpa mãgaji:
—¿Sãap'eda mùmaa k'aripa iidi chejima aji, Tachi Ak'õrepa pù ik'aawaapa ãyaa wãji pùrã mãik'aapa pù k'îra unuamaa iru baparik'a bù pùrã? 17 Irua oomaa bù mùa pùmaa jaradak'a. Pù trua jãri ata wãda aji, teeit'ee pùchi auk'aa, Davidmaa. 18 Irua mãga oomaa bù pùa oo–e pada perã irua jaradak'a jarak'ãri amalecitaarã jõmaweda jõpimerã, ichi ãra ome audú k'îrau bada perã. 19 Ma awara Tachi Ak'õrepa pù israelitaarã ome filisteorã juade baaipiit'eeda aji. Nu pù pùchi warrarã paara p'ananadait'ee mù ome, piudap'edaarãmãi. Israelitaarã soldaorã filisteorã juade baaidait'eeda aji.
Mãga jarap'eda, Samuel wêpadachi.
20 Aramata Saúl ãchobeepa ert'îudachi. Juatau wêe beeji, ma ewate nek'o–e bada perã. 21 Ma wêrapa Saúl mãga unuk'ãri, k'ait'a wãp'eda, mãgaji:
—Mù, pù mimiaparipa ooji pùa iididak'a. Piuk'aji mãga ooda k'aurepa. 22 Ârá mùa enenee nâbù pùa oomerã mùa jara bùk'a mãik'aapa nek'omerã. Mãgá waya juataura beeyada aji, mãik'aapa pùchi ode wãyada aji.
23 Mamîda Saúl nek'o k'inia–e paji. Mãpai chi k'õp'ãyoorãpa auk'a jarajida nek'omerã. Ãra pedee ûrip'eda, p'irabaiji mãik'aapa camade su–ak'ù beeji. 24 Mãga nùde ma wêrapa p'ak'a chak'e poree bù peep'eda, paaji mãik'aapa pan levadura wêe ooji. 25 Maap'eda teeji Saulmaa mãik'aapa iru ome nipadap'edaarãmaa k'odamerã. K'odap'eda, ma p'ãrik'uaweda wãjida.