David filisteorã eujãde mirunada
27
1 Ma t'êepai Davidpa k'îsiaji: “Taarãpai wa taarã–e nùde Saulpa mù pee cheit'ee. Mapa mù banaipia bù filisteorã eujãde, israelitaarã eujãde mù jùrùnaadamerã mãik'aapa mãgá irua mù ichiak'au bùmerã.”2 Mãga paji. David wãji filisteorã eujãdee ichi eere p'anadap'edaarã seiscientos ome. P'ananajida Gat p'uurude. Mãgà p'uuru Maoc warra, rey Aquis jua ek'ari baji. 3 Ùmùk'îra chaachaa chi wêra, chi warrarã ome mama p'aneejida. Ichiaba David chi wêraarã Jezrel p'uurudepema Ajinoán ome mãik'aapa Carmel p'uurudepema Abigaíl, Nabal piuda wêra pada ome mama p'aneejida. 4 Saulpa k'awaak'ãri David Gatdee wãda, waa iru jùrù–e paji.
5 Mama p'anùde Davidpa rey Aquimaa nãga jaraji:
—Rey Waibùa, pia–e bùda aji, mù, pù mimiapari nama pù p'uuru waibùade bamerã. Pùa wãara mù pia ak'ùru pùrã, mùa chupùria iidi bù pùa mù p'uuru awaraade pëimerã. Mù mama banait'ee mù k'õp'ãyoorã ome.
6 Ma ewateweda Aquipa Siclag p'uuru Davidmaa teeji. Maperã t'êepai ma p'uuru Judá eujãdepemaarã reyrã jua ek'ari beeji.
7 David año aba ap'eda, atane k'îmari filisteorã eujãde baji. 8 Maapai iru wãpachi ichi soldaorã ome filisteorã eujã sur eere mãik'aapa mama p'anapatap'edaarã ome chõopachida. Telén eujãdeepa Sur parumaa Egipto ode bù guesureorã, guirzitaarã mãik'aapa amalecitaarã ome chõo wãjida. 9 Mãùrã ome chõonadak'ãri, ãra peek'oo wãpachida, wêraarã paara. Maap'eda mãùrã ovejaarã, p'ak'aarã, burroorã, camelloorã mãik'aapa ãra p'aru paara p'e atapachida. Ma t'êepai David rey Aquimaa wãpachi ichia ooda jarade. 10 Pachedak'ãri, irua iidipachi: “¿Sãma chõo nipajidama?” apachi. Davidpa p'anaupachi: “Judá ëreerã eujãde sur eere” maa–e pùrã “Jerameldeepa uchiadap'edaarã eujãde” maa–e pùrã “quenitaarã eujãde”.
11 Mãgá chõonadak'ãri, Davidpa eperã apida chok'ai atabëik'aa paji filisteorãmaa jaranaadamerã. Filisteorã eujãde bùde mãga oopachi. 12 Maapai rey Aquipa David pia ak'ùpachi. K'îsiaji: “¿Davidpa oopari k'aurepa israelitaarãpa iru k'îra unuamaa iru p'anapata–ek'ã? Maperã iru mù jua ek'ari ichita mimiapariit'ee.”