2 Samuel
Rey David bapariida
Israelitaarãpa David rey bùdap'edaa Saúl pari
1
1 Saúl piuda t'êepai, David amalecitaarã p'oyaap'eda, Siclag p'uurudee cheji. Mama k'ãima omé beeji. 2 K'ãima õpeede eperã aba Siclagde pacheji Saúl soldaorãpa ãchi carpa eebai jira bùdap'edaamãiipa. Chi p'aru jê baji mãik'aapa porode yooro p'ora iru baji ak'ùpiit'ee ichi t'ãri p'ua bù. David k'îrapite pak'ãri, bedabaidachi tau bùùrù eujãde t'õbairumaa.3 Mãpai Davidpa iidiji:
—¿Pù sãmãik'aapa cheruma? aji.
Ma eperãpa p'anauji:
—Israeldepema soldaorã carpa eebai jira bùdap'edaamãiipa cheru. Mù aupai chok'ai uchiajida aji.
4 Mãpai Davidpa iidiji:
—¿Sãgajima? ¡Jarapáde! aji.
Ma eperãpa p'anauji:
—Chõo p'anadap'edaadeepa Israeldepema soldaorã jîchoo wãjidada aji. Cho–k'ara piujida, Saúl chi warra Jonatán paara.
5 Mãpai Davidpa iidiji ma k'ûtrãa jara chedamaa:
—¿Sãga k'awa bùma aji, Saúl mãik'aapa chi warra Jonatán piudap'edaa?
6 Mãgùpa p'anauji:
—Pariatua mù baji Guilboa eede chõo para bak'ãri. Mãga jõnùde Saúl unuji baairu ichi miasu ârù. Waide piu–e baji, filisteorã carreta caballopa jidiupata irumaa chewã nipadak'ãri. 7 Mãga nùde irua ãpùtee ak'ùji mãik'aapa mù unuji. Mãpai mù t'âji. Mapa mùa irumaa jaraji: “Pùa jara bùk'a mùa ooit'eeda” aji.
8 ’Mãpai irua mùmaa iidiji: “¿Pù k'aima?” aji.
’Mùa p'anauji: “Mù amalecitada” aji. 9 ’Mãpai irua mùmaa jaraji: “Mù k'ait'aara chéji mãik'aapa aweda peet'áaji mù piu wã perã.”
10 ’Mapa mù iru k'ait'aara wãp'eda, iru peet'aaji. Mùa k'awa baji iru p'oyaa chok'ai bee–e pai, mãgá su bada perã. Maap'eda mùchi waibùa, mùa chi poro jâra mãik'aapa jua manilla ataji aneeit'ee pùmaa.
11 Ma pedee ûridak'ãri, Davidpa arii p'anadap'edaarã ome ãchi p'aru jêt'aajida ak'ùpidait'ee t'ãri p'ua p'anù. 12 Mãpai t'ãri p'uapa jêe para beeji Saul–it'ee mãik'aapa chi warra Jonatan–it'ee. Ichiaba jêejida Tachi Ak'õre p'uuru pidaarã–it'ee, ma israelitaarã soldaorã chõo atuadap'edaa perã mãik'aapa chok'ara piudap'edaa perã. Mãga p'aneejida, nek'oda–ee, k'ewara parumaa.
13 Maap'eda Davidpa iidiji ma k'ûtrãa, chi jara chedamaa:
—¿Pù sãpemama? aji.
Irua p'anauji:
—Mù amalecita; awaraa eujãdepema mîda, na eujãde baparida aji.
14 Mãpai Davidpa mãgaji:
—¿Sãap'eda pù waawee–e bajima aji, Tachi Ak'õrepa jùrùt'erada peeit'ee?
15 Mãpai Davidpa soldao aba t'â atap'eda, irumaa mãgaji:
—¡Iru peet'aapáde! aji.
Mãgá ma amalecita peet'aaji.
16 Ma amalecita mãgá piu wãde, Davidpa mãgaji:
—Pùa jarada k'aurepa piuruda aji, pùchi it'aipa jarada perã pùa Tachi Ak'õrepa jùrùt'erada peeda.
Davidpa k'îsia paraa k'ari p'ãda Saúl mãik'aapa Jonatán k'irãpadamerã
17 Ma t'êepai Davidpa na k'îsia paraa k'ari p'ãji, israelitaarãpa Saúl mãik'aapa chi warra Jonatán k'irãpadamerã. 18 Na k'ari t'â bùji Ematrùma K'ari. Jaraji na k'ari Judá eujãdepemaarãmaa jarateedamerã. Na k'ari p'ã bùji libro Jaser apatade.
19 ‘‘Israel eujãde ee jêra bùmãi tachi poro waibùarã piujida. ¡Taarã–eweda sõcharra beerã piujida! 20 Israelitaarã, ma piudap'edaa Gat p'uurude wa Ascalón p'uuru calle jãde jaranáatù Filisteadepema wêraarã o–îa p'ananaadamerã; ma ijãadak'aa beerã o–îapa pëiranaadamerã. 21 ¡Guilboa eujãde eera jêra bùmãi k'oi cheik'araa bù mãik'aapa sereno baaiik'araa bù; ma awara waa trigo chauik'araa bù Tachi Ak'õremaa teenadamerã! ¡Mãga p'asaik'araa bù mama eperãarã chok'ara piudap'edaa perã! Mama sõcharra beerã escudo ârù t'ùajida. Saúl escudo aceitepa p'uruda waapa t'ãu beeji. 22 Naaweda Saúl chi warra Jonatán ome ichita ãpùtee chepachida, chõo p'anadap'eda mãik'aapa chõo k'awaa beerã peedap'eda. Mãgá chedak'ãri, ãchi espada, sia paara t'ãu p'anajida ma chõo k'awaa beerã traapa mãik'aapa waapa. 23 Israelitaarãpa Saúl mãik'aapa Jonatán k'inia iru p'anapachida, t'ãri pia p'anadap'edaa perã. Auk'a chõonapachida. Mãgá auk'a piujida. ¡Chõo jõnùde nejâpù k'ap'ip'ia wãabaipari k'ãyaara k'ap'ip'iara p'irapachida mãik'aapa león juataura bapari k'ãyaara juataura p'anajida!
24 ”¡Israeldepema wêraarã, Saul–it'ee jèetù! Iru k'aurepa parãpa nêe mãik'aapa p'aru pi–ia jâpachida; p'aru p'oree, linodee k'ada. 25 ¡Chõo jõnùde tachi sõcharra beerã baaijida! ¡Jonatán tachi eujãdepema ee jêra bùde piuji! 26 Jonatán, mù audú t'ãri p'ua nâbù pù piuda perã. Mùchi âpemak'a baji; chik'inia p'anapachida. Pùa mù k'iniara iru baji wêraarãpa ãchi ùmùk'îra mãik'aapa ãchi warrarã k'inia iru p'anapata k'ãyaara. 27 ¡Tachi sõcharra beerã baaijida mãik'aapa ãchi arma chõo p'anadap'edaamãi jõdachida!’’