David Judá ëreerã eujãde rey bùdap'edaa
2
1 Ma t'êepai Davidpa Tachi Ak'õremaa nãga iidiji:—¿Wãipia bùk'ã aji, Judá eujãdepema p'uuru apidaadee?
Tachi Ak'õrepa p'anauji:
—Wãipia bùda aji.
Mãpai Davidpa iidiji:
—¿Chisãgà p'uurudee wãipia bùma? aji.
Tachi Ak'õrepa p'anauji:
—Hebrón p'uurudee wãipia bùda aji.
2 Mãpai David mamaa wãji chi wêraarã omé ome; Jezreldepema Ajinoán mãik'aapa Carmeldepema Nabal wêra pada Abigaíl. 3 Ichiaba ateeji ichi ome nipapatap'edaarã ãchideerã ome. P'ananajida Hebrón p'uurude mãik'aapa aù ik'aawa p'anadap'edaa p'uuru k'aipeede. 4 Mama p'anùde Judá ëreerãdepema poro waibùarã chejida aceite weede David poro ârù. Mãgá iru awara bùjida ãchi ëreerãdepemaarã rey beemerã. Ma awara Davidmaa nepùrùjida Galaad eujãdepema Jabés p'uurudepemaarãpa Saúl k'ap'ùa piuda ùadap'edaa. 5 Davidpa mãga ûrik'ãri, ichia chok'apariirã pëiji nãga jaranadamerã Jabés p'uurudepemaarãmaa: “Mùa k'inia bù Tachi Ak'õrepa parã bendiciamerã, parãpa rey Saúl k'ap'ùa piuda atanadap'eda, ùadap'edaa perã. 6 Mãga oodap'edaa perã, mùa k'inia bù Tachi Ak'õrepa parã pia ak'ù bapariimerã mãik'aapa ne–inaa jõmaade parã k'aripapariimerã. Mùa pida parãmaa ne–inaa pia oo k'inia bù. 7 Parã poro waibùa Saúl piuji mîda, waaweenáatù mãik'aapa sõcharra p'anátù, Judá ëreerãdepemaarãpa mù rey bùdap'edaa perã.”
Saúl warra Isboset israelitaarã rey bùdap'edaa
8 Mamîda Ner warra Abner, Saúl soldaorã poro waibùa padapa Saúl warra Isboset atap'eda, Majanayin p'uurudee ateeji. 9 Mama Isboset awara bùji rey beemerã Galaad eujãde, Guesuría eujãde, Jezrel eujãde, Efraín ëreerãdepemaarã eujãde, Benjamín ëreerãdepemaarã eujãde, pia jarait'eera, Israel eujã jõmaade.
10 Saúl warra Isboset cuarenta año iru baji mãgá Israel eujãdepema rey bùdak'ãri. Ma israelitaarã año omé ichi jua ek'ari iru baji. Maapai Judá ëreerãdepemaarã David jua ek'ari p'anapachida. 11 David año siete ap'eda atane seis ãra rey baji. Mãga nùde Hebrón ãchi p'uuru waibùa paji.
Israelitaarã Judá ëreerãdepemaarã ome jura chõodap'edaa
12 Maapai Ner warra Abner Majanayindeepa uchiaji Saúl warra Isboset soldaorã ome wãit'ee Gabaón p'uurudee. 13 Gabaonde bada pania ùapatap'edaamãi p'ananajida. Mãga nùde Sarvia warra Joab Hebrondeepa uchiaji David soldaorã ome wãit'ee ma pania ùapatap'edaamaa Gabaón k'ait'a. Abner ichi eere p'anadap'edaarã ome aù k'îraik'a eere p'anajida.
14 Mãpai Abnerpa Joabmaa nãga jaraji:
—K'ûtrãarã pëidáma aji, jõmaarã taide chõodamerã ãchi arma ome.
Joabpa p'anauji:
—Pia bùda aji.
15 Mãgá k'ûtrãarã doce uchiajida chõodamerã Benjamín ëreerãdepemaarã mãik'aapa Saúl warra Isboset eere p'anadap'edaarã pari. Jõdee David eere p'anadap'edaarã pari awaraa doce uchiajida. 16 Ãchi chaachaa auk'a chõojida porode jita atadap'eda, espadapa su pee piurutamaa. Apida chok'ai uchia–e paji. Mapa ma Gabaonde chõo p'anadap'edaamãi t'â bùjida Jelcat Hazurín.b
17 Mãpai jõmaweda chõomaa p'aneejida. Ma ewate audú chõojida. David eere p'anadap'edaarãpa Abner eere p'anadap'edaarã p'oyaajida. 18 Mama p'anajida Sarvia warrarã õpee; Joab, Abisay mãik'aapa Asael. Asael audú k'ap'ip'ia p'irapachi, bigik'a. 19 Iru jîp'a p'iraji Abner t'êe. 20 Abnerpa ãpùtee ak'ùk'ãri, iru unuji. Mãpai irumaa mãgaji:
—Asael, ¿pùk'ã aji, mù t'êe cheru?
Irua p'anauji:
¡Mùda! aji.
21 Mãpai Abnerpa mãgaji:
—¡Waa mù t'êe chenáaji! ¡Mù ichiak'au bàji! ¡Awaraa soldaota jita atáji mãik'aapa iru arma jãri atapáde! aji.
Mamîda Asael waapùara iru t'êe p'ira wãji.
22 Mãpai Abner waya pedeeji:
—¡Mù t'êe waa chenáaji, maa–e pùrã mùa pù peet'aait'eeda! aji. Mùa mãga oop'eda, ¿sãgá mùa pù âpema Joab unuyama? aji.
23 Mamîda Asael waapùara iru k'ait'aara wãk'ãtù wãji. Mapa Abnerpa chi miasupa ãpùtee iru bide su ataji. Mãgá surude ma miasu ek'arra eere uchiaji. Mapa aweda Asael eujãde piu baainaji.
Awaraarã t'êe chedap'edaarã ak'ùnâ p'aneejida Asael k'ap'ùa piuda ak'ùdait'ee. 24 Mamîda Joab, Abisay ome Abner t'êe wãjida. Ak'õrejîru baai wãk'ãri, panajida Amá eede, Guiaj k'îrapite, eujã pania wêe bù Gabaón apatap'edaadee wãpari ode. 25 Mama Benjamín ëreerãdepema soldaorãpa Abner k'îrachuu chejida. Mãgá chok'araara padaidak'ãri, ee nok'ode ak'ùnâ p'aneejida.
26 Mãpai mamãik'aapa Abnerpa Joabmaa nãgá golpe pedeeji:
—¿Sãapai waa chõoda–e payama? aji. ¿Pùa k'awa–e bùk'ã na k'aurepa tachi jõmaweda t'ãri ãrii p'aneedait'ee? ¿Sãapai jarait'eema pùchi soldaorãmaa pãchi auk'aarã waa jùrùnaadamerã?
27 Joabpa p'anauji:
—Tachi Ak'õre ichita chok'ai bù k'îrapite mùa juraa bù pùa mãga jara–e pada paara, mù soldaorã ãchi auk'aarã t'êe wãk'ajida ewarirumaa.
28 Mãpai Joabpa jaraji trompeta chaadamerã, waa chõoda–e pait'ee. Mãgá waa israelitaarã t'êe wãda–e paji mãik'aapa chõoda–e paji. 29 Ma p'ãrik'uaweda Abner ichi eere p'anadap'edaarã ome eujã jewedaa Arabade wãyaajida. Jordán to sîadap'eda, Bitrón eujãde wãyaajida ãstaawa Majanayin p'uurude parutamaa.
30 Jõdee Joab waa Abner t'êe wã–e pak'ãri, ãpùtee wãji. Mãpai ichi soldaorã chip'e atap'eda, juasiaji. Mãgá k'awaji David soldaorã diecinueve piudap'edaa, Joab âpema Asael awara. 31 Mamîda David eere p'anadap'edaarãpa Benjamín ëreerãdepemaarã Abner ome nipadap'edaarã trescientos sesenta peek'oojida. 32 Ma t'êepai Asael k'ap'ùa piuda ateejida Belén p'uurudee. Mama ùajida chi ak'õre ùadap'edaamãi. Ma p'ãrik'ua Joab ichi eere p'anadap'edaarã ome jîte wãjida. Ewarik'ãri, Hebrón p'uurude panajida.