3
1 Ma jura David eere p'anadap'edaarã Saúl ëreerã eere p'anadap'edaarã ome taarãji. Mãgá chõo jõnùde David eere p'anadap'edaarãpa audupùara p'oyaa wãpachida.Warrarã Daviddeepa uchiadap'edaa
(1 Crónicas 3.1-4)
2 David Hebrón p'uurude bak'ãri, nãgà warrarã t'ojida: chi naapema t'âjarapachida Amnón. Mãgà Jezrel eujãdepema wêra Ajinoanpa t'oji. 3 Aù eerepema t'âjarapachida Quileab. Mãgà Carmel p'uurudepema, Nabal wêra pada, Abigailpa t'oji. Aù eerepema t'âjarapachida Absalón. Mãgà Guesurdepema rey Talmay k'au, Macapa t'oji. 4 Aù eerepema t'âjarapachida Adonías. Mãgà Jaguitpa t'oji. Aù eerepema t'âjarapachida Sefatías. Mãgà Abitalpa t'oji. 5 Aù eerepema t'âjarapachida Itreán. Mãgà David wêra Eglapa t'oji. Mãùrã jõmaweda t'ojida David Hebrón p'uurude bak'ãri.
Abnerpa David ome pacto ooda
6 Saúl ëreerãdepemaarã David ëreerãdepemaarã ome ma jura chõo jõnùde, Saúl eerepema soldaorã poro waibùa Abner waibùara pa wãji. 7 Saúl chok'ai bak'ãri, wêra k'ãipari ataji. Mãgà Ayá k'au paji; t'âjarapachida Rizpa. Abner ma wêra ome k'ãiji.
Maperã rey Isboset k'îraudachi mãik'aapa Abnermaa iidiji:
—¿Sãap'eda pù k'ãijima aji, mù ak'õre wêra k'ãipari pada ome?
8 Mãga ûrik'ãri, Abner k'îraudaip'eda, p'anauji:
—¿Pùa mù Judá ëreerãdepemaarã usak'a unu bùk'ã? aji. Mùa ichita oopachi Saulpa oopipariidak'a mãik'aapa ichideerã, chi âpemaarã, chi k'õp'ãyoorã paara pia ak'ù bapachi, pù ome oomaa bùk'a. Waide pù David juade baaipi–e bù. Mãga bùta, ¿pùa mù ùmùateemaa bùk'ã ma wêra ome k'ãida k'aurepa? 9 Tachi Ak'õrepa mù k'achia ooipia bù mù David eere t'îu–e pùrã, mãgá irua oomerã Tachi Ak'õrepa irumaa juraadak'a. 10 Mãgá israelitaarã waa p'anadak'aa pait'ee Sauldeepa uchiada jua ek'ari. ¡Dandeepa Bersebade parumaa israelitaarã eujã David jua ek'ari beeit'eeda! aji.
11 Isbosetpa maarepida p'anau–e paji, Abner waawee bada perã. 12 Maap'eda Abnerpa ichia chok'apariirã Davidmaa pëiji nãga jarade: “¿Na eujã pù jua ek'ari bù–ek'ã? aji. Pacto oodáma waa chõoda–ee p'anapataadait'ee. Mùa pù k'aripait'eeda aji, israelitaarã jõmaweda pù eere t'îu k'inia p'anadamerã.”
13 Davidpa p'anauji: “Pia bùda aji. Pacto oodáma. Mamîda mùa nãga k'inia bù pùa oomerã. Saúl k'au Mical mùmaa anéeji. Maa–e pùrã, mù k'îrapite chenaapáde” aji.
14 Ma awara Davidpa ichia chok'apariirã pëiji nãga jaranadamerã Saúl warra Isbosetmaa: “K'inia bù pùa mù wêra Mical mùmaa tee pëimerã, ma wêra atada perã filisteorã cien peep'eda, ãchi me e Saulmaa teeda pari.”
15 Isbosetpa mãga ûrik'ãri, jaraji ichi jâapataarãmaa Lais warra Paltielmaa wãdamerã mãik'aapa Mical chi ùmùk'îra juadeepa jãri atadamerã Davidmaa tee pëidait'ee. 16 Mãga oodak'ãri, Paltiel chi wêra t'êe jêe cheji. Mamîda Bajurín p'uurude panadak'ãri, Abnerpa Paltiel ãpùtee pëit'aaji iru temaa. Mãgá iru ãpùtee wãji.
17 Ma t'êepai Abnerpa Israeldepema poro waibùarã chip'e atap'eda, mãgaji:
—Taarãruda aji, parãpa David rey papi k'inia p'anù. 18 Ârá mãga oodaipia bùda aji, Tachi Ak'õrepa jarada perã ichi mimiapari Davidpa tachi israelitaarã uchiapiit'ee filisteorã juadeepa mãik'aapa awaraarã tachi k'îra unuamaa iru p'anapataarã juadeepa.
19 Abnerpa auk'a jaraji Benjamín ëreerãdepemaarãmaa. Maap'eda Abner wãji Hebrondee Davidmaa jarade Benjamín ëreerãdepemaarã awaraa israelitaarã ome iru jua ek'ari p'ana k'inia p'anù. 20 Wãji veinte k'õp'ãyoorã ome. David badamãi panadak'ãri, ãchi–it'ee irua chik'o pia chuupiji. 21 Nek'odap'eda, Abnerpa Davidmaa mãgaji:
—Rey Waibùa, ârá mù wãit'ee israelitaarã chip'e atade mãik'aapa ãramaa jarade pù ome pacto oodamerã. Mãgá pùa rey mimia oopariit'eeda aji, pùchia k'inia bùk'a.
Irua mãga jarap'eda, Davidpa iru ome despediiji. Mãgá Abner k'ãiwee wãji.
Joabpa Abner peeda
22 Abner uchiada t'êepai, David soldaorã poro waibùa Joab ichi soldaorã ome pachejida chõo p'anadap'edaadeepa. Ãchi ome aneejida net'aa waibùa jãri atadap'edaa ãchi k'îra unuamaa iru p'anapatap'edaarã juak'aawa. Mamîda Abner wê–e paji, David ome despediip'eda, ichi ode k'ãiwee wãda perã. 23 Mãgá Joab pachek'ãri ichi soldaorã ome, Hebrón p'uurudepemaarãpa irumaa nepùrùjida Ner warra Abner mama nipada David ome pedeede mãik'aapa sãgá Davidpa iru pia despediip'eda, k'ãiwee wãda.
24 Mãpai Joab reymaa wãp'eda, mãgaji:
—¿Rey Waibùa, pùa k'ãata oojima? aji. ¿Wãarak'ã Abner pù ome pedee cheji? ¿Sãap'eda pùa iru k'ãiwee pëijima? 25 ¿Pùa k'awa–e bùk'ã aji, Ner warra Abnerpa pù k'ûradeta cheji k'awaait'ee pù sãmaa wãpari mãik'aapa k'ãata oopari?
26 Joab Davidmãiipa uchiak'ãri, ichia chok'apariirã pëiji Abner t'êe wãdamerã. Mãgá ma pëidaarãpa Abner êp'e atanajida Sira apatap'edaa pozo badamãi mãik'aapa iru ãpùtee aneejida. Mamîda Joabpa Davidmaa maarepida jara–e paji ichia oomaa bada. 27 Abner Hebrón p'uurude panak'ãri, Joabpa iru ateeji p'uuru t'îupatamãi, seewata iru ome ituaba pedeeit'ee. Mama Joabpa iru bide sup'eda, peet'aaji. Joabpa Abner k'îra unuamaa iru baji, chõo jõnùde ichi âpema Asael peeda perã.
28 Ma t'êepai Davidpa Abner piuda k'awaa atak'ãri, nãga jaraji:
—Tachi Ak'õre k'îrapite mùa juraa bù mùa mãik'aapa eperãarã mù jua ek'ari p'anùùrãpa maarepida k'aripada–e paji Ner warra, Abner, peedamerã. 29 Joábpata iru peeji. Mapa Tachi Ak'õrepa Joabmaa mãik'aapa ichideerãmaa ne–inaa k'achia ooipia bù. Ãchi te chaa nãgee k'ayaa k'achia ichita paraaipia bù: waamia, lepra, wa chiwa. Maa–e pùrã irua ãramaa jarra oopiipia bù maa–e pùrã chîaramaa peepiipia bù.
30 (Joabpa chi âpema Abisay ome Abner peejida, Gabaonde chõo jõnùde irua ãchi âpema Asael peeda perã.)
Abner ùadap'edaa
31 Abner ùadait'ee pak'ãri, Davidpa jaraji Joabmaa mãik'aapa iru ome nipapatap'edaarãmaa:
—Pãchi p'aru jêdapáde aji, ak'ùpidait'ee t'ãri p'ua p'anù mãik'aapa Abner–it'ee chi–ùadapáde aji.
Abner k'ap'ùa piuda jãùradee ateedak'ãri, David ma t'êe nipaji. 32 Hebrón p'uurude Abner ùajida. Ùadak'ãri, iru–it'ee David golpe jêeji. Awaraa arii p'anadap'edaarã auk'a jêejida. 33 Mãpai Abner piuda pari rey Davidpa na k'îsia paraa k'ari k'ariji:
“¿Sãap'eda Abner jãgá k'achia piujima aji, k'îsia k'awa–e beerã piupatak'a? 34 Iru peedak'ãri, iru jua jâda–e paji. Ma awara iru bùùrù cadenapa jâda–e paji. ¡Iru piuji k'achia beerã juade baaipataarãk'a!”
Mãga ûridak'ãri, arii p'anadap'edaarã Abner–it'ee waya jêejida. 35 Maap'eda jõmaweda Davidmaa wãjida jarade iru nek'omerã ak'õrejîru baai naaweda.
Mamîda Davidpa juraaji:
—¡Tachi Ak'õrepa mù audú miapiipia bùda aji, mùa pan wa awaraa ne–inaa k'oru pùrã ak'õrejîru baai naaweda!
36 Arii p'anadap'edaarãpa mãga ûridak'ãri, pia bùda ajida, ãchi–it'ee reypa ne–inaa jõma oopariida pia bapachi perã. 37 David mãgá t'ãri p'ua nâbada perã Abner piuda k'aurepa, israelitaarã jõmaarãpa k'awajida wãara rey Davidpa maarepida k'aripa–e paji Ner warra Abner peedamerã.
38 Ma t'êepai Rey Davidpa ichi ak'ùpataarãmaa mãgaji: