Isboset peedap'edaa
4
1 Saúl warra Isbosetpa k'awaak'ãri Abner piuda Hebronde, ãchobeedachi, awaraa israelitaarã paara. 2 Maapai Isbosetpa ichi jua ek'ari ùmùk'îraarã omé iru baji. Mãùrã nechùapataarã poro waibùarã paji. Aba t'âjarapachida Baná; chi apema Recab. Mãùrã Berot p'uurudepema Rimón warrarã paji mãik'aapa Benjamín ëreerãdepemaarã paji, 3 chonaarãweda Berot p'uurudepemaarã Guitayin p'uurude miru p'ananadap'edaa perã. Mama awaraa eujãdepemaarãk'a p'aneejida. At'ãri mama p'anapata.4 (Saúl warra Jonatanpa warra iru baji. Mãgà t'âjarapachida Mefiboset. Bùùrù omeeweda chiwa baji. Mefiboset año joisomaa iru baji, Jezrel eujãdeepa jara chedak'ãri Saúl Jonatán ome piudap'edaa. Mãga ûrik'ãri, chi ak'ùparipa isapai iru awara ãyaa ateerude, juadeepa baaidachi. Mãgá iru bùùrù omeeweda chiwa beeji.)
5 Ewari aba ma Berot p'uurudepema Rimón warrarã Baná Recab ome wãjida Isboset temaa. Imat'ùpa panajida hora wãsiara bùde. Ma horade 6 ãrapa seewatapai iidinadait'ee paji teeda t'îupimerã trigo atade. Mamîda chi puerta jâapari trigo jari bap'eda, auk'a k'ãidai baji. Mapa irua unu–e paji mãùrã teeda t'îudak'ãri. 7 Mãgá Isboset ichi camade k'ãi bùde su peet'aajida mãik'aapa chi poro t'ùù atadap'eda, ãchi ome ateejida. Ma p'ãrik'ua Arabá eujã apatap'edaa wãyaapari ode wãjida.
8 Rey David badamãi Hebronde panadak'ãri, irumaa mãgajida:
—Rey Waibùa, nama iru p'anùda ajida, Saúl warra Isboset poro. Saulpa pù k'îra unuamaa iru bapachi mãik'aapa pù peepi k'inia bapachi. Mamîda ma pari idi Tachi Ak'õrepa Sauldeerã k'achia ooji.
9 Mamîda Davidpa Rimón warrarã Recabmaa mãik'aapa Banamaa mãgaji:
—Tachi Ak'õre, chi ichita chok'ai bùpa mù k'aripapari k'achiade baainaamerã. Iru k'îrapite mùa nãga juraa bù. 10 Eperãpa Saúl piuda mùmaa jara chek'ãri mù o–îa beei jîak'aapa, ma k'ãyaara mù t'ãri p'ua baji rey piuda perã. Maperã Siclag p'uurude ma jara cheda atapip'eda, peepiji. 11 Ârá audupùara mùa mãga ooit'ee parã ne–inaa k'achia ooyaa beerã ome, parãpa Isboset peedap'edaa perã ichi tede k'ãi bùde, irua parãmaa ne–inaa k'achia oo–e paji mîda. T'ãri k'achiapa parãpa iru peet'aajida. Ârá parã jida iruk'a piudait'eeda aji.
12 Aramata Davidpa ichi jâapataarãmaa jaraji ãchi omeeweda peet'aadamerã. Ma k'ap'ùa piuda jua, bùùrù ome t'ùap'ejida mãik'aapa chi k'ap'ùa baijira bùjida Hebrón p'uurudepema pania t'ùpatamãi k'ait'a. Mamîda Isboset poro ateejida Hebronde ùadait'ee Abner ùadap'edaamãi.