David awaraa israelitaarã rey pada
(1 Crónicas 11.1-3)
5
1 Ma t'êepai Israel eujãdepema ëreerã chaadepemaarã wãjida Hebrondee David ome pedeede. Mãgajida:—Rey Waibùa, tachi auk'aarãda ajida. 2 Naaweda Saúl tai rey paji mîda, pùta soldaorã ome wãpachi awaraa eujãdepemaarã ome chõode tai k'ap'ùa pari. Ma awara Tachi Ak'õrépata pùmaa nãga jaraji: “Pùa mù p'uuru pidaarã ak'ùpariit'eeda aji, ovejaarã ak'ùparipa ichi ovejaarã ak'ùparik'a mãik'aapa ãra poro waibùa pait'ee.”
3 Mãgá Hebrón p'uurude israelitaarã poro waibùarã jõmaweda David ome pedeejida. Mãpai Tachi Ak'õre k'îrapite Davidpa ãra ome pacto ooji. T'êepai ãrapa aceite weejida David poro ârù ak'ùpidait'ee iru awara bù p'anù Israel eujãdepemaarã rey pamerã.
4 David treinta año iru baji rey pak'ãri. Cuarenta año rey paji. 5 Siete año ap'eda, atane seis David Judá ëreerãdepemaarã rey paji. Maapai Hebrón p'uurude bapachi. Ma t'êepai treinta y tres año iru Judá ëreerãdepemaarã mãik'aapa awaraa Israeldeepa uchiadap'edaarã jõmaarã rey paji. Maapai Jerusalén p'uurude bapachi.
Davidpa jebuseorã p'uuru Jerusalén p'oyaada
(1 Crónicas 11.4-9)
6 Mãgá David israelitaarã jõmaarã rey pap'eda, ichi soldaorã ome uchiaji chõode. Wãjida jebuseorã p'uuru Jerusalendee. Ma jebuseorãpa k'îsia p'anajida David ãchi p'uurude p'oyaa t'îu–e pai. Maperã mãgajida: “Pù p'oyaa t'îu–eda ajida, tai p'uurude. Tau p'ãriu beerãpa, chiwa beerãpa paara parã t'îupida–e pait'eeda” ajida. 7 Mamîda Davidpa jãri ataji ma p'uuru sur eere murallapa t'ùak'au bada soldaorã p'anadap'edaamãi, Sión apatap'edaa. Maadak'ãriipa ma soldaorã p'anapatap'edaamãi t'âjarapachida David p'uuru.
8 Ma ewate Davidpa mãgaji:
—Ma jebuseorã ome chõodait'eerã, t'ìutù to chak'ek'a wãyaa bù eere. Ma p'uurude panadak'ãri, peek'oodapáde aji, jõmaweda ma tau p'ãriu beerã apata mãik'aapa chiwa beerã apata, mùa ãra k'îra unuamaa iru bairã.
Maadamãiipa eperãarãpa jarapachida tau p'ãriu beerã mãik'aapa chiwa beerã rey palaciode t'îuda–e pait'eeda apachida.
9 Ma p'uuru jãri atadap'edaa t'êepai, David mama banaji soldaorã p'anapatap'edaamãi. T'â bùji ‘David p'uuru’ mãik'aapa muralla oopiji mãgà p'uuru t'ùak'au beemerã, ee bideepa ichi palaciode parumaa.
Tirodepema rey Hirampa Davidmaa ne–inaa tee pëida
(1 Crónicas 14.1-2)
10 David waibùara pa wãji jõmaarã poro waibùarã k'ãyaara, Jõmaarã Ak'õre Waibùa iru ome bapachi perã. 11 Maperã Tiro p'uurudepema rey Hirampa ichi jua ek'ari beerã Davidmaa pëiji cedro pak'uru pia irumaa teedamerã. Ichiaba pëiji pak'uru t'ê k'awaa p'anadap'edaarã mãik'aapa mãu sî k'awaa p'anadap'edaarã mãùrãpa David–it'ee te pi–ia oodamerã. 12 Davidpa mãga unuk'ãri, wãara k'awaaji Tachi Ak'õrepa ichi p'uuru pidaarã k'inia iru bada perã, iru israelitaarã rey papiji mãik'aapa ne–inaa jõmaade bendiciaji.
Davidpa awaraa warrarã ooda
(1 Crónicas 3.5-9; 14.3-7)
13 David Hebrondeepa uchiak'ãri Jerusalende banait'ee, awaraa wêraarã ataji, wêra k'ãipariirã paara. Mãùrã ome awaraa warrarã mãik'aapa k'aurã ooji. 14 Nãgà warrarã t'ojida Jerusalén p'uurude: Samúa, Sobab, Natán, Salomón, 15 Ibjar, Elisúa, Néfeg, Jafía, 16 Elisama, Eliadá mãik'aapa Elifelet.
Davidpa filisteorã p'oyaada
(1 Crónicas 14.8-17)
17 Filisteorãpa k'awaadak'ãri Israel eujãdepemaarãpa David rey papidap'edaa, chõode chejida. Mamîda Davidpa mãga k'awaa atak'ãri, ichi soldaorã ome t'îuji ãchi soldaorã p'anapatap'edaamãi murallapa t'ùak'au badade. 18 Mãpai ma filisteorã p'ananajida Refayin eujã jewedaa jõmaade.
19 Mãga k'awaak'ãri, Davidpa Tachi Ak'õremaa iidiji:
—¿Filisteorã ome chõode wãipia bùk'ã? aji. ¿Pùa ãra mù juade baaipiit'eek'ã? aji.
Tachi Ak'õrepa p'anauji:
—Ãra ome chõode wãipia bùda aji, mùa ãra pùmaa p'oyaapiit'ee perã.
20 Mãpai David ichi soldaorã ome chõonajida Baal Perazinde. Mama mãùrã p'oyaajida. Maperã Davidpa mãgaji: “To k'ida chaareepa to i ùrapiparik'a, mãga pùk'a Tachi Ak'õrepa mù k'îra unuamaa iru p'anapataarã mùmaa p'oyaapijida” aji. Ma chõo p'anadap'edaamãi t'â bùji Baal Perasín, jara k'inia bù ‘Tachi Ak'õrepa ùrapida’. 21 Ma filisteorã jîchoo wãdak'ãri, ãchi net'aa aù k'îrapite ùt'aa t'âpata atabaibëijida. Mãpai Davidpa ichi soldaorã ome ma net'aa p'e atajida.
22 Mamîda t'êepai filisteorã waya chõo chejida eujã jewedaa Refayin jõmaade. 23 Davidpa mãga k'awaak'ãri, Tachi Ak'õremaa waya iidiji.
Mãpai Tachi Ak'õrepa p'anauji:
—K'îrapite eereepa chõonáaji. Ãra p'anùmãi p'ùrrabai atap'edata, ãpùteik'a eereepa wãp'eda bálsamo pak'uru jêra bùmãi, ãra ârù wåji. 24 Ma pak'uru ùt'à biuk'a ûrik'ãri soldaorã t'ùapatak'a, ãra ome chõonapáde aji, mù parã naa wãit'ee perã ma filisteorã soldaorã peede.
25 Davidpa ooji Tachi Ak'õrepa jaradak'a. Mãgá filisteorã soldaorã p'oyaa wãjida Gabaondeepa Guezerde parumaa.