Davidpa Tachi Ak'õre baaltek'a bù ateeda
(1 Crónicas 13.5-14)
6
1 Davidpa waya Israeldepema soldaorã pipùara p'anadap'edaarã treinta mil chip'e ataji. 2 Mãùrã chip'e ataji ichi ome wãdamerã Judá eujãdepema Balá p'uurudee Tachi Ak'õre baaltek'a bùa atade, Tachi Ak'õre ma baaltek'a bù ârù bapachi perã. 3 Tachi Ak'õre baaltek'a bù bùjida carreta chiwidide mãik'aapa ateejida Abinadab te ee nok'ode badadeepa. Abinadab warrarã Uza mãik'aapa Ajío ma carreta ome jîte wãjida chi o jaratee wãdait'ee. 4 Ajío Tachi Ak'õre baaltek'a bù nok'oore wã nipaji; jõdee Uza aù ik'aawa wã nipaji. 5 Ma carreta atee wãda misa, David israelitaarã ome o–îapa audú k'ari wãjida mãik'aapa pëira wãjida nãgee chaa p'anùde: arpa, salterio, pandereta, castañuela mãik'aapa címbalo. 6 Eperã t'âjarapatap'edaa Nacón eujãde ichi net'a tau jariparimãi panadak'ãri, p'ak'a ma carreta jidiu atee wãdadap'edaarãpa t'êneudachida. Mapa Uzapa Tachi Ak'õre baaltek'a bù jitaji baaipiamaapa. 7 Mamîda Tachi Ak'õre k'îraudachi Uza ome, ma baaltek'a bù t'õbaida perã. Mapa iru mama peet'aaji. (Tachi Ak'õre leyde jara baji apidaapa ichi baaltek'a bù t'õbainaadamerã.) Mãgá Uza ma carreta ik'aawa piu baaiji.8 Mãga unuk'ãri, David k'îraudachi Tachi Ak'õrepa Uza peeda perã. Maperã Davidpa ma punto t'â bùji Peres Uzab At'ãri mama mãga t'âjarapata. 9 Ma ewateweda David ãchobeedachi. Mãgaji: “Mãga pùrã, mùa Tachi Ak'õre baaltek'a bù p'oyaa atee–eda” aji. 10 Davidpa Tachi Ak'õre baaltek'a bù David p'uuruc apatap'edaadee atee k'inia–e pada perã, jaraji Obed Edom temaa ateedamerã. Ma eperã Gat p'uurudepema paji. 11 Mãgá Tachi Ak'õre baaltek'a bù atane õpee mama beeji. Mama bùde Tachi Ak'õrepa Obed Edom mãik'aapa ichi tedepemaarã bendiciaji.
Tachi Ak'õre baaltek'a bù Jerusalende ateedap'edaa
(1 Crónicas 15.1—16.6)
12 Rey Davidmaa nepùrùdak'ãri Tachi Ak'õre baaltek'a bù k'aurepa Obed Edom te pidaarã, ichi net'aa paara bendiciada, iru mamaa wãji mãik'aapa ma baaltek'a bù aneeji David p'uuru apatap'edaadee. Iru mãik'aapa iru ome nipadap'edaarã jõmaweda o–îa p'anajida. 13 Chi baaltek'a bù atee wãdap'edaarã t'ùada seis t'ùadap'eda, Davidpa p'ak'a mãik'aapa p'ak'a k'aipee poree bada peep'eda, Tachi Ak'õre–it'ee paapiji. 14 Ma chewãdade Davidpa efod linodee ooda jâ baji mãik'aapa audú o–îapa Tachi Ak'õre–it'ee pëira chewãji. 15 Davidpa mãik'aapa israelitaarãpa Tachi Ak'õre baaltek'a bù mãgá atee wãdak'ãri, o–îapa bia chewãjida mãik'aapa trompeta chaa chewãjida.
16 Tachi Ak'õre baaltek'a bù David p'uurude pachek'ãri, Saúl k'au, Micalpad ventanadeepa ak'ùji. Irua unuk'ãri David Tachi Ak'õre–it'ee jâtù mãik'aapa pëira bù, David ome t'ãri ãrii beeji.
17 Ma baaltek'a bù bùnajida te ne–edee oodade, Davidpa ma–it'ee oopidamãi mãik'aapa Davidpa ne–animalaarã peep'eda, Tachi Ak'õre–it'ee paa jõpiji mãik'aapa awaraa ne–animalaarã paapiji ichi auk'aarã ome jedek'odait'ee. 18 Maap'eda Jõmaarã Ak'õre Waibùa k'ap'ùa pari Davidpa pedee pia jaraji arii p'anadap'edaa israelitaarãmaa. 19 Mãpai arii p'anadap'edaarã ùmùk'îraarãmaa, wêraarãmaa paara Davidpa teeji pan, ne–inaa p'ep'edee bù aba datiljõdee ooda mãik'aapa ne–inaa p'ep'edee bù aba uva p'oodadee ooda. Maap'eda jõmaweda ãchi temaa erreu wãjida.
20 David ichi temaa wãk'ãri ichideerãmaa pedee pia jarade, Saúl k'au, Mical uchiap'eda, iru ùtrùaji:
—¿Pù–it'ee pia bùk'ã aji, pù Israeldepema rey bùta, k'îra nejasia wêe beerãk'a ãk'adaa pëira chek'ãri pù mimiapataarã jua ek'ari beerã esclavaarã taide?
21 Davidpa p'anauji:
—Tachi Ak'õre taide mù o–îapa pëira baji. Iruata mù rey bùji pù ak'õre pari mãik'aapa irudeerã jõmaarã pari. Irua k'inia baji mùta israelitaarã poro waibùa pamerã. Maperã mù iru–it'ee pëira baji 22 mãik'aapa mãgá pù taide mù audupùara ek'ariara beeru pùjida, mùa mãga oo bùde jã esclavaarãpa mù pia ak'ùdait'ee.
23 Maperã Saúl k'au Mical warra t'o–ee piuji.