Tachi Ak'õrepa Davidmaa jarapida
(1 Crónicas 17.1-7)
7
1 Maapai rey David ichi palaciode k'ãiwee bapachi, chõo–ee ichi k'îra unuamaa iru p'anapatap'edaarã ome.2 Mãga nùde rey Davidpa jaraji Tachi Ak'õre pedee jarapari Natanmaa:
—Pùa unu bùk'a, mù palacio pi–ia cedro pak'urudee oodade bapari. Jõdee Tachi Ak'õre baaltek'a bù jîp'a cortina teesoo t'ùak'au bùde bùda aji.a
3 Natanpa p'anauji:
—Rey Waibùa, pùa oo k'inia bùta ooipia bùda aji, Tachi Ak'õre pù ome bapari perã.
4 Mamîda ma ewate p'ãrik'ua Tachi Ak'õrepa Natanmaa mãgaji:
5 —Nãga jaranapáde aji, mù mimiapari Davidmaa: “Tachi Ak'õrepa nãga jara bù: ‘Pùata mù–it'ee te oo–e pait'ee, mù aùde bapariimerã. 6 Mùa israelitaarã Egipto eujãdeepa uchiapidak'ãriipa ârá parumaa, mù te pak'urudee oodade bak'aa. Jîp'a ãra wãrutamaa mù bapari te ne–edee oodade. 7 Mù ãra ome nipak'ãri mãik'aapa ãra poro waibùarãmaa jarak'ãri ãra ak'ùpataadamerã oveja ak'ùparipa ichi ovejaarã ak'ùparik'a, maarepida iidi–e paji mù–it'ee te cedrodee oodamerã.’ 8 Maperã nãga jarapáde aji, mù mimiapari Davidmaa: ‘Jõmaarã Ak'õre Waibùapa jara bù: Mùa pù uchiapiji ovejaarã ak'ù badamãiipa israelitaarã poro waibùa papiit'ee. 9 Mù pù ome bapari pùchi wãrumaa. Pù k'ap'ùa mùa ãra k'îra unuamaa iru p'anapataarã jõpiji. Idideepa jõmaarãpa pù t'â t'o p'anadait'ee na eujãdepemaarã poro waibùara beerã t'âk'a. 10 Mùa na eujã awara bùji mù p'uuru pidaarã, israelitaarã aùde k'ãiwee p'anapataadamerã. Ne–inaa k'achia ooyaa beerãpa ãra p'erapida–e pait'ee naawedapemak'a, 11 mùa poro waibùa awara–awaraa bùda jua ek'ari p'anadak'ãri. Pùa mù p'uuru pidaarã ak'ù bapariit'ee. Ma awara mùa pù jâait'ee pù k'îra unuamaa iru p'anapataarã juade baainaamerã mãik'aapa pùmaa warrarã oopiit'ee.b 12 Pù piuk'ãri mãik'aapa pù ùadak'ãri pùchi ak'õreerã ùadap'edaamãi, mùa pùdeepa uchiada aba rey bùit'ee pù pari, mù p'uuru pidaarã ak'ù bapariimerã. 13 Mãgàpata mù–it'ee te ooit'ee. Mùa iru bùit'ee ichita rey pamerã. 14 Mù iru ak'õre pait'ee; jõdee iru mù warra pait'ee. Irua ne–inaa k'achia ook'ãri, mùa iru miapiit'ee, ak'õre jîp'aapa ichi warra ome ooparik'a. 15 Mamîda mùa iru ichita k'inia iru bapariit'ee. Iru ik'aawaapa ãyaa wã–e pait'ee mù Saúl ik'aawaapa ãyaa wãdak'a, iru pari pù rey bùk'ãri. 16 Pùdeepa uchiadait'eerã ichita rey padait'eeda aji, mùa ichita ãra ak'ù bapariit'ee perã.’ ”
17 Mãpai Natanpa Tachi Ak'õrepa k'awapida jõmaweda Davidmaa jaranaji.
David ùt'aa t'âda
(1 Crónicas 17.16-27)
18 Davidpa mãga ûrik'ãri, Tachi Ak'õre baaltek'a bùmãi t'îuji mãik'aapa nãga ùt'aa t'âji:
—Jõmaarã Ak'õre Waibùa, pù Tachi Ak'õre. ¿K'aima aji mù, pùa mùchideerã nãgá audú pia ak'ù bamerã? 19 Jõmaarã Ak'õre Waibùa, pù Tachi Ak'õre. Pùa mùmaa pia ooji mù israelitaarã rey bùk'ãri. Ârá ma k'ãyaara piara jara bù mùdeepa uchiadait'eerã pia ooit'ee. Jõmaarã Ak'õre Waibùa, Tachi Ak'õre, ¿nãgata pùa eperãarã pia ooparik'ã? ¡Awaraa pùk'a wê–e! 20 Jõmaarã Ak'õre Waibùa, mùchi Ak'õre Waibùa, ¿mùa waa k'ãata jaraima? Pùa mù, pùchi mimiapari, pia k'awa bùda aji. 21 Pùa k'inia bada perã, na ne–inaa pi–ia jõmaweda ooji pùa jaradak'a, mùa ma jõma k'awaamerã. 22 Jõmaarã Ak'õre Waibùa, wãara pù jõmaarã k'ãyaara waibùara bù. Taipa ûridooda wãara; awaraa Ak'õre Waibùa pùk'a wê–e. Awaraa eujãdepemaarã ak'õre waibùa apataarãpa maarepida p'oyaa ooda–e pùa ooparik'a. 23 Ichiaba awaraa p'uuru pidaarã wê–e pùa p'uuru pidaarã jùrùt'erada, israelitaarãk'a. Pùa pù p'uuru pidaarã uchiapiji Egipto pidaarã juadeepa p'anapataadamerã pùa k'inia bùk'a. Ma awara ãra–it'ee ne–inaa pi–ia ooji; ne–inaa eperãarãpa p'oyaa oodak'aa ãchi juadoopa. Mapa jõmaarãpa pù p'uuru pidaarã t'o p'anapata. Pùa na eujãdepemaarã ãchi ak'õre waibùa apataarã ome jërek'ooji pù p'uuru pidaarã naa. 24 Mãga ooji israelitaarã pùchi p'uuru pidaarã ichita padamerã mãik'aapa pù ãra Ak'õre Waibùa ichita pamerã.
25 ’Jõmaarã Ak'õre Waibùa, Tachi Ak'õre, ichita pùa jaradak'a óoji mùdeepa uchiadait'eerã ome. Mù pù mimiapari. Óoji pùa jaradak'a. 26 Mãgá eperãarãpa pù t'â t'o p'anadait'ee mãik'aapa jaradait'ee: ‘‘¡Jõmaarã Ak'õre Waibùa israelitaarã Ak'õre Waibùa!’’ Mù, pù mimiaparipa k'inia bù pùa ichita mùdeepa uchiadait'eerã rey papimerã. 27 Jõmaarã Ak'õre Waibùa, israelitaarã Ak'õre Waibùa, pùata mùmaa k'awapiji mùdeepa uchiadait'eerã ichiaba rey padait'ee. Mapa mù, jîp'a pù mimiapari bù mîda, pùmaa nãga ùt'aa t'âmaa bù. 28 Mùchi Ak'õre Waibùa, pù ichita Jõmaarã Ak'õre Waibùa pait'ee. Pùa ichita oopari pùa jaradak'a. Jaraji mù, pù mimiapari pia ooit'eeda aji. 29 Mapa mù, pù mimiaparipa chupùria iidimaa bù pùa mùdeepa uchiadait'eerã bendiciamerã, mãgá ãchi pù jua ek'ari ichita pia p'anapataadamerã. Pù, Jõmaarã Ak'õre Waibùapa mùmaa mãga jaraji. Pùa ãra mãgá bendiciak'ãri, ichita ãra pia p'anapataadait'eeda aji.