David ichi eere p'anadap'edaarã ome chõode wãdap'edaa
(1 Crónicas 18.1-13)
8
1 Ma t'êepai Davidpa ichi eere p'anadap'edaarã ome filisteorã p'oyaajida. Mãga oo jõnùde Méteg Amá p'uuru jãri atajida. Maadak'ãriipa israelitaarã waa p'anadak'aa paji filisteorã jua ek'ari. 2 Ichiaba Davidpa ichi eere p'anadap'edaarã ome Moab eujãdepemaarã p'oyaajida. Mãgá chõo jõnù misa, mãùrã soldaorã jêra beepidap'eda, cuerdapa chaajida. Chi teesoo ma cuerda omé uchiak'ãri, peek'oopachida. Cuerda teesoo apai uchiak'ãri, chok'ai bùpachida. Mãga oojida jõmaweda soldaorã chaa auparutamaa. T'êepai ma Moab eujãdepemaarã, chok'ai p'aneedap'edaarãpa p'arat'a tee pëipachida Davidmaa iru jua ek'ari p'aneedap'edaa perã.3 Davidpa ichi eere p'anadap'edaarã ome ichiaba p'oyaajida Sobadepema rey Rejob warra Hadad Ezer. Mãgà ichi soldaorã ome Éufrates to k'ait'a wã baji ma eujãdepemaarã waya ichi jua ek'ari bùit'ee naawedapemak'a. 4 Ma chõodap'edaade Davidpa ichi eerepemaarã ome atadachida Hadad Ezer jua ek'ari beerã soldaorã mil setecientos caballode wãdap'edaarã mãik'aapa veinte mil jîte wãdap'edaarã. Ma awara ãchi carreta jidiupata caballoorã jîru k'õrak'oo wãjida. Aba k'õrada–e paji caballoorã cien carreta jidiu p'anadap'edaarã.
5 Ma t'êepai Damasco p'uuru ik'aawa bada eujãdeepa siriorã pachejida Sobadepema rey Hadad Ezer k'aripade. Mamîda Davidpa ichi eerepemaarã ome ma siriorã veintidós mil peejida. 6 Maap'eda Davidpa soldaorã pëiji ma Damasco eujã jâade. Mãgá ma siriorã David jua ek'ari p'aneejida mãik'aapa irumaa p'arat'a p'aapachida. Maapai David chõonada chaa Tachi Ak'õrepa k'aripaji iru eere p'anadap'edaarãpa p'oyaadamerã.
7 Hadad Ezer soldaorã p'oyaap'eda, Davidpa iru jâapatap'edaarã escudo nêedee ooda jãri ataji mãik'aapa Jerusalendee ateeji. 8 Ichiaba Davidpa Tébaja mãik'aapa Berotay p'uurudepema net'aa broncedee ooda chok'ara jãri ataji. Ma p'uuru Hadad Ezer jua ek'ari p'anajida.
9 Jamatdepema rey Toupa k'awaa atak'ãri Davidpa rey Hadad Ezer iru soldaorã ome p'oyaada, 10 ichi warra Jorán Davidmaa pëiji. Iru ome tee pëiji net'aa p'arat'adee ooda, nêedee ooda mãik'aapa broncedee ooda. Salude jara pëiji mãik'aapa jara pëiji ichi o–îa bù David ome, ma Hadad Ezer p'oyaada perã. Mãgá o–îa baji aù naaweda ichi ma rey ome chõopachi perã. 11 Davidpa ma net'aa jõmaweda Tachi Ak'õre–it'ee awara bùji, awaraa net'aa nêedee ooda mãik'aapa p'arat'adee ooda ome. Ichi eere p'anadap'edaarãpa ma net'aa jãri atajida jura chõodak'ãri nãgà eperãarã ome: 12 Edom eujãdepemaarã, Moab eujãdepemaarã, amonitaarã, filisteorã, amalecitaarã mãik'aapa Sobadepema Rejob warra rey Hadad Ezer eere p'anadap'edaarã ome.
13 Maapai jõmaarãpa rey David t'o p'anapachida siriorã ome chõo bap'eda, ãpùtee chewãdade dieciocho mil Edomdepemaarã p'oyaadap'edaa perã eujã jewedaa ‘de la Sal’ apatap'edaade. 14 Ma t'êepai Davidpa soldaorã pëiji Edom eujã jõmaade jâa p'anapataadamerã. Mãgá Edomdepemaarã jõmaweda David jua ek'ari p'aneejida. Tachi Ak'õrepa David k'aripa baji iru wãrumaa chõo p'oyaamerã.
Poro waibùarã David jua ek'ari p'anadap'edaa
(2 Samuel 20.23-26; 1 Crónicas 18.14-17)
15 David Israel eujã jõmaadepema rey paji. Ichi jua ek'ari p'anadap'edaarã jõmaweda pia ak'ùpachi Tachi Ak'õrepa k'inia badak'a. 16 Iru soldaorã poro waibùara bada Sarviab warra Joab paji. Ajilud warra Josafat rey secretario paji. 17 Ajitob warra Sadoc mãik'aapa Abiatar warra Ajimélec iru jua ek'ari p'aareerã paji. Seraías reypa oopariida p'ãpari paji. 18 Joyadá warra Benaías rey jâapataarã, quereteorã mãik'aapa peleteorã poro waibùa paji. Jõdee David warrarã ichi jua ek'ari mimiapatap'edaarã poro waibùarã paji.