1 Samuel
Samuel mãik'aapa Saúl bapata
Elcaná ichideerã ome
1
1 Efraína eujã ee jêra bùdepema Ramatayin p'uurude Zufdeepa uchiadap'edaarã p'anapachida. Irudeepa uchiada ùmùk'îra aba t'âjarapachida Elcaná. Elcaná ak'õre Jeroán paji. Jeroán ak'õre Eliú paji. Eliú ak'õre Tohu paji. Tohu ak'õre Zuf paji. Ãra jõmaweda Efraín ëreerãdepema paji. 2 Elcanapa wêra omé iru baji. Aba t'âjarapachida Ana; chi apema Penina. Peninapa warra t'opachi. Mamîda Anapa warra t'ok'aa paji.3 Año chaa Elcaná ichi p'uurudeepa uchiapachi Siló p'uurudee wãit'ee Jõmaarã Ak'õre Waibùamaa ùt'aa t'âde mãik'aapa iru–it'ee ne–animalaarã paapide. Maapai Silode Elí mãik'aapa chi warrarã Ofni, Finés ome Tachi Ak'õre p'aareerã paji. 4 Elcanapa ne–animalaarã peep'eda, Tachi Ak'õre–it'ee paapik'ãri, Penina eerepema mãik'aapa chi warrarãmaa, k'aurãmaa chi chiara ûk'uru teepachi. 5 Mamîda chi pipùara bada Anamaa teepachi, iru audú k'inia iru bada perã, Tachi Ak'õrepa irumaa warra t'opik'aa paji mîda. 6 Peninapa unuk'ãri chi ùmùk'îrapa Ana audú k'inia iru bù, Ana oo iru beepachi k'îsia paraa beemerã, Tachi Ak'õrepa warra t'opik'aa pada perã.
7 Año chaa Tachi Ak'õre temaa wãdak'ãri, Peninapa Ana mãgá oo iru beepachi. Maperã Ana jêepachi mãik'aapa nek'ok'aa paji. 8 Chi ùmùk'îra Elcanapa mãga unuk'ãri, iidipachi: “Ana, ¿sãap'eda jêe nâbùma? apachi. ¿Sãap'eda k'îra pia–ee nâbùma mãik'aapa nek'o–ee nâbùma? ¿Pù–it'ee mù piara bù–ek'ã apachi, warrarã diez k'ãyaara?”
Anapa ùt'aa iidida
9 Ewari aba Siló p'uurude p'anùde, nek'odap'eda mãik'aapa ne–inaa todap'eda, Ana bainâ beeji mãik'aapa wãji Tachi Ak'õre tedee. P'aare Elí mama su–ak'ù baji Tachi Ak'õre tedepema puerta k'ait'a. 10 Ana t'ãri p'ua nâbùde mãik'aapa jêe nâbùde Tachi Ak'õremaa ùt'aa t'âmaa beeji 11 mãik'aapa nãga ooit'eeda aji: “Jõmaarã Ak'õre Waibùa, mù pù mimiapari. Pùa mù ak'ùp'eda, chupùria k'awaaru pùrã mãik'aapa mùmaa warra t'opiru pùrã, mùa pù–it'ee mãgà warra awara bùit'ee pù tede mimia bapariimerã. Ak'ùpiit'ee mùa wãara mãga ooit'ee, ma warra puda t'ùùk'aa pait'eeda” aji.
12 Ana taarã ùt'aa t'âmaa bada perã Tachi Ak'õre k'îrapite, Elipa ak'ùji iru it'aimaa k'await'ee pedeemaata bù wa mãga–e. 13 Mamîda Anapa ichi t'ãridepai ùt'aa t'âmaa baji. Mapa chi it'ai aupai mimik'a baji mîda, Elipa iru pedee ûrik'aa paji. Maperã Elipa k'îsiaji it'úapata piu bù.
14 Mãpai nãga jaraji:
—¿Sãapaita pù it'uapa piu–ee bait'eema? aji. ¡Waa vino tonaapáde! aji.
15 Anapa p'anauji:
—Mãga–epù. Mùa vino maa–e pùrã awaraa it'ua asia to–e bù. Jîp'a k'îsia paraa nâbù. Mapa mù t'ãri p'ua nâbù Tachi Ak'õremaa jaramaa bù. 16 Mù pù mimiapari. K'îsianáaji mù wêra k'achia. Mù taarã ùt'aa t'âmaa bajida aji, audú k'îsia nâbairã mãik'aapa audú t'ãri p'ua nâbairã.
17 Mãpai Elipa mãgaji:
—Mãgara k'ãiwee wãpáde aji. Mùa k'inia bùda aji, israelitaarã Ak'õre Waibùapa pùa chupùria iididak'a oomerã.
18 Anapa p'anauji:
—Mùa k'inia bùda aji, pùa mù, pù mimiapari ichita mãgá pia ak'ù bamerã.
Ma t'êepai Ana ãpùtee cheji ichi badamaa mãik'aapa t'ãri o–îa nek'oji. Maadak'ãriipa waa k'îra pia–ee bak'aa paji. 19 Aù norema tap'edaweda Tachi Ak'õremaa ùt'aa t'âde wãdap'eda, ãpùtee chejida ãchi temaa Ramade. Ma t'êepai Elcaná waya chi wêra Ana ome araa k'ãiji. Tachi Ak'õrepa Ana chupùria k'awaaji. 20 Mãgá Ana biak'oo beeji. Chi ewarimaa pak'ãri, ùmùk'îra warra t'o ataji mãik'aapa mãgaji: “Iru t'â bùit'eeda aji, Samuel,b mùa Tachi Ak'õremaa iru iidida perã.”
Anapa Samuel Tachi Ak'õre–it'ee awara bùda
21 Ma t'êepai Elcaná ichideerã ome waya Siló p'uurudee wãji ichia ooit'eeda adak'a oode, mãik'aapa ne–animalaarã Tachi Ak'õre–it'ee paapide ichia año chaa paapipariidak'a. 22 Mamîda Ana wã–e paji, aù naaweda chi ùmùk'îramaa nãga jarada perã:
—Mù wã–eda aji, warra ju amaa–emaa. Ju amaak'ãrita, mùa teenait'ee mãik'aapa Tachi Ak'õre–it'ee awara bùit'ee, mama iru tede bapariimerã.
23 Chi ùmùk'îra Elcanapa p'anauji:
—Pùa k'îsia bùk'a oopáde aji. Béeji warra ju amaaru misa. Mùa k'inia bù Tachi Ak'õrepa pù k'aripamerã mãgá oomerã pùa irumaa jaradak'a.
Mãgá Ana teeda beeji chi warra ju amaarumaa. 24 Samuel ju amaak'ãri, at'ãri ma–ãri bùta, Anapa ateeji Tachi Ak'õre temaa Siló p'uurude. Ichiaba ateeji p'ak'a ùmùk'îra año õpee iru bù, harina litro veintidós mãik'aapa vino ne–ede t'ùda. 25 Ma p'ak'a peedap'eda mãik'aapa Tachi Ak'õre–it'ee paapidap'eda, chi warra ateejida p'aare Elimaa.
26 Mãpai Anapa mãgaji:
—P'aare, mùa juraa bù mùta paji chi nama pù k'ait'a taarã Tachi Ak'õremaa ùt'aa t'âmaa bada. 27 Tachi Ak'õremaa iidiji irua mùmaa warra teemerã. Irua mù chupùria k'awaap'eda, na warra teeji. 28 Mùa jaraji warra teeru pùrã, ma warra aneeit'eeda aji, ichi piurumaa iru–it'ee mimiamerã. Nama bùda aji.
Elipa mãga ûrik'ãri, Tachi Ak'õre k'îrapite bedabaidachi mãik'aapa ùt'aa t'âji.