Anapa ùt'aa t'âda gracias jarait'ee
2
1 Mãpai Anapa nãga ùt'aa t'âji:“Tachi Ak'õre, mù t'ãri o–îa bapari, pùa mù t'ãri o–îapida perã. Pùa mù k'aripada perã, mù k'îra unuamaa iru p'anapataarãpa mù waa t'ãri p'uapida–e. ¡Maperã mù wãara o–îa bù! 2 Tachi Ak'õre, awaraa pùk'a wê–e, pù k'achia wêe bapari perã. Mãu choma bùpa tachi jâaparik'a, mãga pùk'a pùa tai jâapari. Tachi Ak'õre, awaraa pùk'a wê–e. 3 Waa audua pedee jaranáatù Tachi Ak'õrepa ne–inaa jõma k'awapari perã. Iruata eperãarãpa oopata ak'ùpari jarait'ee pia wa k'achia. 4 Irua chi juataura p'anùùrã ematrùma jõpipari.a Jõdee chi juatau wêe p'anùùrã juataura beepipari. 5 Chi naaweda chik'o waibùa iru bada ârá mimiapari pan pite aba atait'ee. Jõdee chi audú jarra oo bada waa mãgá ba–e. Wêra warra t'ok'aa padapa warra siete t'oji. Mamîda chi warra chok'ara t'opariida ârá t'ãri p'ua nâbù, warra wêe beeda perã. 6 Tachi Ak'õrepa eperãarã chok'aipipari mãik'aapa piupipari. Piudaarãmaa pëipari mãik'aapa piudaarãmãiipa uchiapipari. 7 Tachi Ak'õrépata eperãarã chupùria papipari maa–e pùrã p'arat'ara papipari; ek'ariara papipari maa–e pùrã waibùara papipari. 8 Tachi Ak'õrepa chupùria chedeerã, chi net'aa wêe beerã k'aripapari, ãra chupùria chitoonù mîda, eperã waibùarã ome su–ak'ù p'aneedamerã mãik'aapa awaraarãpa ãchi t'o p'anadamerã. Mãga ooi irua na p'ek'au eujã ooda perã mãik'aapa chi bùdamãi bùda perã ãyaa wãnaamerã. 9 Irua ichide ijãapataarã jâapari. Mamîda chi ijãadak'aa beerã p'ãriude piupata. Ãchi k'îradoopa ichita p'oyaa p'anapataada–e. 10 Tachi Ak'õrepa ichi k'îra unuamaa iru p'anapataarã jõpiit'ee. Ãchi ârù pa baaipiit'ee. Tachi Ak'õrepa na eujãdepemaarãpa ne–inaa oopata ak'ùit'ee jarait'ee pia wa k'achia. Irua jùrùt'erada rey jõmaarã k'ãyaara waibùara papiit'ee.”
11 Ma t'êepai Elcaná Ana ome wãjida ãchi temaa Ramade. Mamîda ãchi warra, Samuel, Tachi Ak'õre–it'ee mimiamaa beeji p'aare Elí jua ek'ari.
Elí warrarã ne–inaa k'achia ooyaa p'anapatap'edaa
12 Elí warrarã Ofni, Finés ome ne–inaa k'achia ooyaa p'anapachida. P'aareerã paji mîda, Tachi Ak'õre waaweedak'aa paji. 13 Mapa eperã chek'ãri, ne–animal peep'eda Tachi Ak'õre–it'ee paapide, ma p'aareerãpa oodak'aa paji Tachi Ak'õrepa jaradak'a p'aareerãpa oodamerã. Ma k'ãyaara ãchi mimiapari pëipachida tenedor choma k'ida õpee bùpa nechiara ûk'uru ãchi–it'ee su atamerã. Chi ne–animal aneedapa ma nechiara paamaa bùde wa chuumaa bùde Tachi Ak'õre–it'ee teeit'ee, 14 ãchi mimiaparipa ma tenedorpa nechiara k'uurude wa pailade su ata wãpachi ãchi–it'ee. Mãga oojida jõmaweda israelitaarã ome, Tachi Ak'õre–it'ee ne–animalaarã paapi chedak'ãri Siló p'uurude. 15 Ma awara chi aneedapa ma ne–animal traa Tachi Ak'õre–it'ee paapiit'ee pak'ãri, aù naaweda ãchi mimiapari chepachi nechiara ûk'uru iidide. “Mù–it'ee nechiara teepáde apachi, paait'ee p'aareerã–it'ee. Ãrapa nechiara chuuda k'iniada–e. Õk'oota k'inia p'anùda” apachi. 16 Ma ne–animal aneedapa jarapachi: ‘‘Ichiak'au bàji netraa paapirumaa Tachi Ak'õre leyde jara bùk'a. Mãpai pùa ateei pùchia k'inia bùta.’’
Mamîda ma mimiaparipa mãgapachi: “¡Âraweda k'inia bùda! apachi. Tee–e pùrã, mùchi juadoopa jãri atayada” apachi. 17 Mãgá ma k'ûtrãarãpa Tachi Ak'õre k'îrapite p'ek'au k'achia oo wãpachida, israelitaarãpa ne–inaa Tachi Ak'õre–it'ee aneedap'edaa ãchi–it'ee jãri ata wãdap'edaa perã.
Samuel Tachi Ak'õre tede bapariida
18 Samuel efod apatap'edaa linodee oodab jâpachi mãik'aapa Tachi Ak'õre–it'ee chok'ek'ee mimiapachi. 19 Año chaa chi nawepa ârùpema p'aru chiwidi oopachi chi warrapa jâmerã. Ma p'aru ateepachi chi ùmùk'îra ome wãk'ãri Tachi Ak'õre–it'ee ne–animal paapide. 20 Elipa Elcaná chi wêra Ana ome unuk'ãri, na pedee pia jarapachi Elcanamaa: “Mùa k'inia bùda apachi, Tachi Ak'õrepa na wêramaa awaraa warrarã t'opimerã, na warra iru–it'ee awara bùda pari.” Maap'eda Elcaná Ana ome waya wãpachida ãchi temaa.
21 Ma t'êepai Tachi Ak'õrepa Ana pia ak'ùpachi. Ana waya biak'oo beeji. Mamãik'aapa Anapa ùmùk'îra warrarã õpee, wêra k'aurã omé t'oji. Mãùmisa Samuel wari wãji mama Tachi Ak'õre k'îrapite iru tede.
Elí chi warrarã ome
22 Maapai Elí chonaa baji. Mamîda k'awaa baji chi warrarãpa ne–inaa k'achia oopatap'edaa israelitaarã ome. Ãchia wêraarã Tachi Ak'õre te t'îupatade mimiapataarã ome paara k'ãipachida.
23 Maperã Elipa nãga jaraji:
—Jõmaarãpa jara chepatada aji, parãpa ne–inaa k'achia oopata. ¿Sãap'eda parãpa mãga ooi awaa p'anùma? aji. 24 Mù warrarã, mãga p'anadaik'araa bùda aji. Ma k'aurepa israelitaarãpa parã ãpùte pedee k'achia jara p'anù. 25 Eperãpa ne–inaa k'achia ook'ãri awaraa eperãmaa, Tachi Ak'õrepa ma eperã chupùria k'awaai mãik'aapa ma nepùradeepa k'aripai. Mamîda parãpa Tachi Ak'õremaa ne–inaa k'achia oodak'ãri, ¿k'áipata parã chupùria k'awaaima? aji.
Elipa mãga jaraji mîda, chi warrarãpa ûri k'iniada–e paji, Tachi Ak'õrepa k'îsia iru bada perã ãchi peek'ooit'ee.
26 Ãchi mãgá p'anùde Samuel wari wãji. Tachi Ak'õrepa iru pia ak'ùpachi; eperãarãpa paara.
Tachi Ak'õrepa jarapida Elí ëreerãdé
27 Maapai Tachi Ak'õrepa iru pedee jarapari Elimaa pëiji.
Mãgùpa mãgaji:
—Tachi Ak'õrepa nãga jara pëiruda aji, pùmaa: “Pù chonaarã Egipto eujãde p'anadak'ãri Faraónc jua ek'ari, ãramaa mù unupiji. 28 Awaraa ëreerã k'ãyaara mùa parãd jùrùt'eraji awaraa israelitaarã pari p'aareerã mimia oopataadamerã. Parãta jùrùt'eraji mù altar k'ait'a wãdamerã mãik'aapa ne–animalaarã peedap'eda, mù–it'ee paa jõdamerã. K'inia baji paråpata mù k'îrapite ne–inaa t'ûa bapari paapataadamerã mãik'aapa mù–it'ee mimiadak'ãri, efod jâpataadamerã. Ma awara mùa jaraji israelitaarãpa ma ne–animalaarã mù–it'ee paapidap'edaa chiara ûk'uru parã ëreerã–it'ee awara bùdamerã. 29 ¿Sãap'eda parãpa ma ne–animalaarã mãik'aapa net'aa mù–it'ee tee chepata ne–inaa k'achiak'a unupatama? ¿Sãap'eda pùa mùchi p'uuru pidaarãpa ne–inaa aneepatadepema nechiara pipùara bù pù warrarãmaa teepiparima aji, mãgùpa audupùara poreedaidamerã? ¿Ãra mù k'ãyaara pipùara ak'ùpari–ek'ã?
30 ”Mù, israelitaarã Ak'õre Waibùapa jaraji pù, pùchideerã ome mù–it'ee mimiapataadamerã. Mamîda ârá mùa nãga jara bù. ¡Mùa parãmaa waa p'aareerã mimia oopi–e pait'ee! Mùa pia ak'ùpari chi mù waawee p'anapataarã. Mamîda mù waaweeda–ee p'anùùrã pia–ee ak'ùpari. 31 Taarã–ee mùa pùchideerã mãik'aapa pù ak'õredeepa uchiadap'edaarã jõpiit'ee. Ãradepema apida chonaa pa–e pait'ee. 32 Pùa ak'ùk'ãri mùa ne–inaa pia oo bù israelitaarã t'ãide, pù k'îsia nâbeeit'ee, pùa ma mimia waa oo–e pait'ee perã mãik'aapa pùchideerã apida chonaa pa–e pait'ee perã. 33 Pùdeepa uchiait'ee bù abapai mù altar k'ait'a wãpariit'ee. Mamîda iru tau soo bait'ee jêe nâbùpa mãik'aapa audú t'ãri p'ua bapariit'ee, apemaarã pùdeepa uchiadait'eerã jõmaweda eperãarã juapa piudait'ee perã. 34 Pùchi warrarã Ofni Finés ome ewari abaade piudait'ee. Ma ewate pùa k'await'ee wãara mùa jaradak'a p'asaji. 35 Ma t'êepai mùa p'aare pia bùit'ee mù–it'ee mimiapariimerã. Mãgùpa oopariit'ee mùa oopi bùk'a, mù ome t'ãri auk'a bapariit'ee perã. Irudeepa uchiadait'eerã mùa pia ak'ùpariit'ee perã, ãra ichita mimiadait'ee mùa jùrùt'erada rey jua ek'ari. 36 Maapai pùdeepa uchiadait'eerã, chi at'ãri chok'ai p'aneerutaarã ma p'aaremaa chedait'ee mãik'aapa iru k'îrapite bedabaidap'eda, chupùria iididait'ee irua ãramaa teemerã p'arat'a tau wa pan pite chak'e. Irumaa enenee chedait'eeda aji, irua mimia teemerã, mãgá chik'o k'odait'ee iru p'anadamerã.”