Tachi Ak'õrepa Samuel t'âda
3
1 Samuel k'ûtrãa bak'ãri, Tachi Ak'õre–it'ee mimiapachi Elí jua ek'ari. Maapai Tachi Ak'õrepa eperãarãmaa mak'ùara pedeek'aa paji. Ichiaba eperãarãmaa irua mak'ùara unupik'aa paji k'ãimok'araa pùk'a bùde.2 Elí audú chonaa bak'ãri, tau p'ãriu wãji. Mapa pia unuk'aa paji. Ewari aba Elí ichi cuartode k'ãi bùde, 3 Samuel k'ãi baji Tachi Ak'õre ome unupata tede, iru baaltek'a bù k'ait'a. Lámpara mama bapariida at'ãri k'oo nâbaji.
4 Mãga nùde Tachi Ak'õrepa t'â jaraji:
—Samuel aji.
Samuelpa p'anauji:
—Nama bùda aji.
5 Mãpai Samuel p'ira wãji Elí k'ãi badamaa mãik'aapa mãgaji:
—Mù nama bùda aji. ¿K'ãare–it'ee mù t'â jarajima? aji.
Mãpai Elipa mãgaji:
—Mùa pù t'â jara–e pajipù. Waya k'ãide wãpáde aji.
Mãpai Samuel wãp'eda, k'ãi beeji.
6 Mamîda Tachi Ak'õrepa waya t'â jaraji:
—Samuel aji.
Mãpai Samuel p'irabaiji mãik'aapa Elimaa wãp'eda, mãgaji:
—Mù nama bùda aji. ¿K'ãare–it'ee mù t'â jarajima? aji.
Elipa p'anauji:
—Warra, mùa pù t'â jara–e pajipù. Waya k'ãinapáde aji.
7 Samuelpa k'awa–e baji sãgá Tachi Ak'õrepa eperãmaa pedeepari, Tachi Ak'õrepa waide irumaa pedee–e bada perã.
8 Mãpai t'âda õpee t'â jaraji:
—Samuel aji.
Naawedapemak'a Samuel p'irabaiji mãik'aapa Elimaa wãp'eda, mãgaji:
—Mù nama bùda aji. ¿K'ãare–it'ee mù t'â jarajima? aji.
—K'ãinapáde aji. Waya pù t'â jararu pùrã, nãga p'anáuji: “Tachi Ak'õre, pedéeji. Mù, pù mimiaparipa pù pedee ûriit'eeda” apáde aji.
Mãpai Samuel jêra banaji.
10 Ma t'êepai Tachi Ak'õre waya chep'eda, Samuel k'ait'a ak'ùnâ beeji mãik'aapa naawedapemak'a t'â jaraji:
—¡Samuel! ¡Samuel! aji.
Samuelpa p'anauji:
—Pedéeji. Mù, pù mimiaparipa pù pedee ûri bùda aji.
11 Mãpai Samuelmaa Tachi Ak'õrepa nãga jaraji:
—Israelitaarã t'ãide mùa ne–inaa ooit'eeda aji. Mãga ûridak'ãri, eperãarã p'eradait'ee. 12 Ma ewate mùa jõmaweda Elimaa jaradak'a ichideerãmaa ooit'ee. 13 Ichideerãmaa ne–inaa k'achia ooit'ee chi warrarãpa ne–inaa k'achia oopatap'edaa pari. Ãrapa mùmaa pedee k'achia jarapachida. Mamîda irua ãra ùtrùa–e paji. 14 Maperã mùa juraaji Elideerãpa ne–inaa k'achia oopatap'edaa mùa k'îra atua–e pait'ee, ãrapa ne–animalaarã peedap'eda, mù–it'ee paapiruta pùjida wa ne–inaa pia tee cheruta pùjida.
15 Maap'eda Samuel jêra beeji. Aù norema tap'eda irua Tachi Ak'õre tedepema puerta ewaji. Mamîda ãchobee baji Elimaa nepùrùit'ee Tachi Ak'õrepa jarada k'ãimok'araa pùk'a bùde.
16 Mamîda taarã–e nùde Elipa iru t'â jarap'eda, mãgaji:
—¡Warra, Samuel!
Samuelpa p'anauji:
—¿K'ãata Tachi Ak'õrepa pùmaa jarajima? aji. Pedee apida jara–eda anáaji. Jõma jara–e pùrã, Tachi Ak'õrepa pùmaa ne–inaa audú k'achia ooipia bùda aji.
18 Mãpai Samuelpa jõma nepùrùji. Pedee apida mera–e paji.
Mãpai Elipa mãgaji:
—Iruta Tachi Ak'õre. Irua k'îsia iru bùk'a ooipia bùda aji.
19 Samuel mãgá wari wãji. Tachi Ak'õre iru ome baji. Jõma oopachi ichia jaradak'a Samuel k'ap'ùa pari. 20 Mãgá israelitaarã jõmaarãpa Dan p'uurudeepa Berseba p'uurude parumaaa k'awaa wãjida Tachi Ak'õrepa Samuel ichi pedee jarapari papiji. 21 Siló p'uurude Tachi Ak'õrepa Samuelmaa ichi unupipachi. Mama Samuelmaa k'awapipachi ichia jara pëi k'inia bada. Mãpai Samuelpa israelitaarãmaa jarapachi.