Filisteorãpa Tachi Ak'õre baaltek'a bù jãri atadap'edaa
4
1 Maapai filisteorã soldaorã chip'edaidap'eda, israelitaarã ome chõode wãjida. Ichiaba israelitaarã soldaorã chip'edaidap'eda, auk'a uchiajida chõode filisteorã ome. Punto Ebenezer k'ait'a ma israelitaarãpa ãchi carpa ne–edee ooda eebai jira bùjida mama k'ãidait'ee. Jõdee Afec p'uuru k'ait'a filisteorãpa ãchi carpa eebai jira bùjida. 2 Mamãik'aapa ãchi soldaorã uchiadak'ãri, israelitaarã ome chõomaa p'aneejida. Mãgá chõomaa p'anùde filisteorãpa p'oyaajida. Mama chõo p'anadap'edaamãi, ãchia israelitaarã cuatro mil peejida.3 Israelitaarã chok'ai uchiadap'edaarã ãpùtee chedak'ãri ãchi carpa eebai jira bùdap'edaamãi, ãchi poro waibùarãpa iidijida:
—¿Sãap'eda Tachi Ak'õrepa jã filisteorãmaa tachi p'oyaapijima? ajida. Siló p'uurudee wãdáma Tachi Ak'õre tedepema baaltek'a bù atade. Tachi ome ateedáma ajida, mãgá Tachi Ak'õre tachi ome nipamerã mãik'aapa tachi k'îra unuamaa iru p'anapataarã juadeepa tachi k'aripa atamerã.
4 Aramãgá soldaorã ûk'uru Siló p'uurudee pëijida Tachi Ak'õre baaltek'a bù atade, ijãadap'edaa perã Tachi Ak'õre ma baaltek'a bù t'ap'a ârù bù.a Ma soldaorã ãpùtee chedak'ãri ma baaltek'a bù ome, mãgà ak'ùpataarã, Elí warrarã Ofni Finés ome auk'a chejida. 5 Ma baaltek'a bù israelitaarã p'anadap'edaamãi pachek'ãri, o–îapa golpe biajida ma eujã wërerumaa.
6 Filisteorãpa biuk'a para nâbù ûridak'ãri, mãgajida:
—¿Sãap'eda audú biuk'a para nâbùma ajida, hebreorã p'anùmãi?
Mamîda k'awaa atadak'ãri Tachi Ak'õre baaltek'a bù aneedap'edaa, 7 p'erak'oodachida mãik'aapa mãgapachida:
—¡Ãchi ak'õre waibùa cheji ãchi carpa eebai jira bùdap'edaamãi! Aai, tachi k'achiade baairutada ajida. Waide awaraarã soldaorãpa tachi ome nãga oodak'aa paji. 8 ¡Aai, tachi k'achiade baairuta! ¿K'aipa tachi k'aripayama ajida, baainaadamerã ãchi ak'õre waibùarã juade? Ãchi eujã pania wêe bùde p'anadak'ãri, mãgùùrãpa Egipto pidaarã jõpijida k'ayaa k'achiapa. 9 ¡Filisteorã, sõcharra p'anadáma! ¡Chõodáma hebreorã ome, maa–e pùrã tachi ãchi esclavo p'aneedait'ee, ãchi tachi jua ek'ari esclavo p'anapatak'a!
10 Mãpai ma filisteorã chõomaa p'aneejida israelitaarã ome mãik'aapa ma chõo p'oyaajida. P'era jõnadap'edaa perã, israelitaarã mirudachida ãchi te chaa. Cho–k'ara piujida. Israelitaarã soldaorã treinta mil peek'oojida. 11 Ma awara chõo jõnùde ma filisteorãpa Tachi Ak'õre baaltek'a bù atadachida mãik'aapa Elí warrarã omé, Ofni Finés ome peejida.
Elí piuda
12 Mamîda ma chõomaa p'anadap'edaamãiipa Benjamín ëreerãdepema soldao aba p'ira jirabodachi mãik'aapa ma ewateweda Siló p'uurude panaji. Chi p'aru jõma jê baji mãik'aapa ichi porode yooro p'ora iru baji ak'ùpiit'ee audú t'ãri p'ua bù. 13 Ma soldao Siló p'uurude panak'ãri, Elí su–ak'ù baji o ik'aawa p'uurudepema puerta k'ait'a. Omaa ak'ùmaa baji, k'îsia nâbada perã Tachi Ak'õre baaltek'a bùde. Ma soldaopa p'uuru pidaarãmaa jõma nepùrùk'ãri, biuk'a para beeji.
14 Elipa mãga ûrik'ãri, iidiji:
—¿Sãap'eda audú biuk'a para nâbùma? aji.
Mãpai ma soldao p'ira wãji Elimaa nepùrùde. 15 Maapai Elí noventa y ocho año iru baji mãik'aapa tau p'ãriu baji. 16 Ma soldaopa Elimaa nãga jaraji:
—Mù chejida aji, chõo p'anùmãiipa. Idiweda mù miru uchiajida aji.
Mãpai Elipa mãgaji:
—Warra, ¿sãgajima? aji.
17 Ma soldaopa p'anauji:
—Israelitaarã filisteorã naa jîchoojidada aji. Soldaorã cho–k'ara k'iniijida. Made pù warrarã omé, Ofni Finés ome piujida. Ma awara filisteorãpa Tachi Ak'õre baaltek'a bù atadachidada aji.
18 Elipa ûrik'ãri Tachi Ak'õre baaltek'a bù ateedap'edaa, ichi silladeepa ãpùtee k'oreudachi p'uurude t'îupatamãi. Chonaa bada perã mãik'aapa k'ap'ùa chùa bada perã, chi otau k'õradachi. Mãgá piudachi. Cuarenta año wãyaarude Elí israelitaarã poro waibùa paji.
19 Elí ãigu, Finés wêra warra t'oyama baji. Ma wêrapa ûrik'ãri filisteorãpa Tachi Ak'õre baaltek'a bù ateedap'edaa mãik'aapa chi ùmùk'îra, chi chãure paara piudap'edaa, bi p'iradachi warra t'oit'ee. Âjaabaip'eda, chi warra t'oji. Mamîda ma warra pia p'oyaa t'o–e paji.
20 Mama p'anadap'edaa parteraarãpa iru piu wã unudak'ãri, mãgajida: —Waaweenáaji. Pùa ùmùk'îra warra t'ojida ajida.
Mamîda irua ãra pedee p'anau–e paji, audú t'ãri p'ua nâbada perã. 21 Piui naaweda, chi warra t'â bùji Icabod, jara k'inia bù ‘Tachi Ak'õre waa wê–e tachi ome’. Mãga t'â bùji israelitaarã–it'ee Tachi Ak'õre k'îra wãree wêe beeda perã filisteorãpa iru baaltek'a bù ateedak'ãri; ma awara chi ùmùk'îra, chi chãure paara piudak'ãri.
22 Chi warra mãgá t'â bùk'ãri, mãgaji:
—Israel eujãdeepa Tachi Ak'õre k'îra wãree ateejidada aji, iru baaltek'a bù atadak'ãri.