Tachi Ak'õre baaltek'a bù filisteorã eujãde
5
1 Filisteorãpa Tachi Ak'õre baaltek'a bù ateejida Ebenezerdeepa ãchi p'uuru waibùa Asdoddee. 2 Mama ma baaltek'a bù bùnajida ãchi ak'õre waibùa Dagón ik'aawa. Dagón ne–inaa juapa ooda paji. 3 Aù norema Asdoddepemaarã mamaa wãdak'ãri, unujida ãchi ak'õre waibùa Dagón eujãde barro baibù Tachi Ak'õre baaltek'a bù k'îrapite. Mãpai waya ichi badak'a ata bùjida chi badamãi. 4 Mamîda aù norema Asdod p'uurudepemaarã waya wãdak'ãri, waya unujida ãchi ak'õre waibùa Dagón eujãde baibù Tachi Ak'õre baaltek'a bù k'îrapite. Ma te t'îupatamãi chi poro chi jua ome k'õra jêra baji. Chi k'ap'ùa aupai ãri–ee baji. 5 Mapa maadamãiipa ârá parumaa Dagón tede ichi p'aareerã wa eperãarã t'îudak'ãri, puerta edaik'a eerepema mãu ârù t'ùada–ee t'îupata.6 Ma t'êepai Tachi Ak'õrepa Asdod p'uurudepemaarãmaa mãik'aapa ma p'uuru ik'aawa p'anapatap'edaarãmaa k'ayaa k'achia tumor ome baripiji. 7 Asdod p'uurudepemaarãpa mãga unudak'ãri, mãgajida:
—Israelitaarã Ak'õre Waibùa baaltek'a bù tachi t'ãide baik'araa bù. Jãgùpa tachimaa mãik'aapa tachi Ak'õre Waibùa Dagonmaa k'achia oomaa bùda ajida.
8 Maperã jara pëijida jõmaweda filisteorã poro waibùarã chedamerã. Mãùrãmaa ma p'uurudepemaarãpa iidijida:
—¿K'ãata oodayama ajida, israelitaarã Ak'õre Waibùa baaltek'a bù ome?
Mãùrãpa p'anaujida:
—Gat p'uurudee ateedapáde ajida.
Mapa filisteorãpa israelitaarã Ak'õre Waibùa baaltek'a bù mamaa ateejida. 9 Mamîda mama bùnadap'edaa t'êepai, Tachi Ak'õrepa ma p'uurudepemaarã auk'a miapiji. Chonaarãmaa, warrarãmaa paara k'ayaa k'achia tumor ome baripiji. Mãgá irua ãra p'erapiji. 10 Maperã filisteorãpa Tachi Ak'õre baaltek'a bù Ecrón p'uurudee pëijida.
Mamîda Tachi Ak'õre baaltek'a bù mamaa ateedak'ãri, ma p'uuru pidaarãpa nãga biajida:
—¿Israelitaarã Ak'õre Waibùa baaltek'a bù aneejida–ek'ã ajida, irua tachi jõmaweda peek'oomerã?
11 Mãgá ma p'uurudepemaarã jõmaweda p'erajida, Tachi Ak'õrepa ãramaa k'ayaa pëida perã.
Maperã t'â pëijida filisteorã poro waibùarã mãik'aapa mãgajida:
—Namãik'aapa atéetù israelitaarã Ak'õre Waibùa baaltek'a bù. Ichi badamaa teenadapáde ajida, maa–e pùrã irua tachi jõmaweda peek'ooi.
12 Chi waide piuda–e padap'edaarã tumor–idaa p'anadap'edaa perã, ma p'uurudepemaarãpa ùt'aa biajida ãchi ak'õre waibùarã apatap'edaarãmaa, ãrapa ûridai jîak'aapa.