Filisteorãpa Tachi Ak'õre baaltek'a bù ãpùtee tee pëidap'edaa
6
1 Tachi Ak'õre baaltek'a bù atane siete filisteorã eujãde baji. 2 Ma t'êepai filisteorãpa t'â pëijida ãchi eujãdepema p'aareerã mãik'aapa ne–inaa oopataarã k'awaadait'ee ne–inaa p'asait'ee bù.Mãùrã pachedak'ãri, ma filisteorãpa nãga iidijida:
—¿K'ãata oodayama ajida, israelitaarã Ak'õre Waibùa baaltek'a bù ome? ¿Sãgá pëidayama ajida, ichi badamaa?
3 Mãùrãpa p'anaujida:
—Israelitaarã Ak'õre Waibùa baaltek'a bù pëiruta pùrã, arajãgaa pëináatù. Net'aa pia téetù ãchi Ak'õre Waibùamaa ak'ùpidait'ee iru k'îrapite parãpa ne–inaa k'achia oodap'edaa. Mãga ooruta pùrã, parã jùpa p'aneedai mãik'aapa k'awaadai sãap'eda irua parãmaa k'achia oomaa bù.
4 Mãpai ma filisteorãpa iidijida:
—¿K'ãare net'aa piata teedaipia bùma? ajida.
Mãùrãpa p'anaujida:
—Tumork'a bee nêedee ooda joisomaa téetù. Ichiaba rat'ak'a bee nêedee ooda joisomaa téetù. Ma chaachaa jara k'inia bù filisteorã poro waibùa aba, parãmaa mãik'aapa parã poro waibùarãmaa paara ma tumor baripida perã. 5 Ma–it'ee nêedee óotù tumork'a bee mãik'aapa rat'ak'a bee, rat'aarãpa parã eujã jõpi wãda perã. Ma net'aa israelitaarã Ak'õre Waibùamaa teeruta pùrã, ak'ùpidai jãgà Ak'õre Waibùa waawee p'anù. Mãgá irua parãmaa, parã ak'õre waibùarãmaa mãik'aapa parã eujã waa k'achia oo–e pai. 6 ¿Sãap'eda parã k'ùùrù k'isua p'anùma ajida, Egiptodepemaarã p'anadap'edaak'a mãik'aapa Faraón badak'a? Ichia israelitaarã pëiamaa baji, ãra Ak'õre Waibùapa ichi auk'aarãmaa ne–inaa audú k'achia oo–emaa.
7 ’Parãpa nãga oodaipia bù. Carreta chiwidi oopítù. Maap'eda p'ak'a wêra omé warra paraa bee yugode jâ atátù, ma carreta jidiudamerã. Mamîda ma p'ak'a wêraarã carreta jidiu atua p'anadaipia bù. Ma p'ak'a wêraarã carretade jâdap'eda, chi chak'eerã jâa bùnátù p'ak'a jâapata temãi. 8 Mãga oodap'eda, ma baaltek'a bù carretade bùdaipia bù. Aù ik'aawa cajade p'e bùdaipia bù ma net'aa nêedee ooda iru–it'ee tee pëidait'ee, irua tachi waa miapinaamerã. Maap'eda ma carreta ituaba pëidaipia bù. 9 Mãpai chi wãrumaa ak'àtù. Ma carreta wãru pùrã israelitaarã eujãdee, Bet Semes p'uurudee, mãgara wãara ãra Ak'õre Waibùapa tachi miapi baji. Mamîda awara ãyaa wãru pùrã, k'awaadai irua tachi miapi–e paji. Jîp'a pariatuata tachi mãgá k'ayaadachida.
10 Mãpai p'aareerãpa jaradap'edaak'a oojida. P'ak'a wêra omé warra paraa bee atajida. Ma p'ak'a wêraarã carretade jâdap'eda, chi chak'eerã jâa bùnajida p'ak'a jâapata temãi. 11 Maap'eda Tachi Ak'õre baaltek'a bù mãik'aapa ma caja ma carretade bùjida. Ma cajade p'anajida ma rat'ak'a bee mãik'aapa tumork'a bee nêedee ooda. 12 Ma p'ak'a wêraarã carreta ome pëidak'ãri, Bet Semedee wãpari ode wãjida. Ma p'ak'a wêraarã jîp'a ma ode bia wãjida, juaraare wa ju bi eere t'îuda–ee. Filisteorã poro waibùarã ma carreta t'êe wãjida Bet Semes p'uuru k'ait'a parumaa.
13 Bet Semedepemaarã ûk'uru ma eujã jewedaade trigo ewa p'anadap'edaarãpa unudak'ãri Tachi Ak'õre baaltek'a bù cheru, o–îadachida. 14 Bet Semedepema Josué eujãmãi panak'ãri, ma carreta ak'ùnâ beeji. Mama mãu choma baji. Mãpai ma Bet Semedepemaarãpa ma carreta wãrat'aadap'eda, ma pak'urudee t'ùpù oro atajida mãik'aapa ma p'ak'a wêra omé peedap'eda, Tachi Ak'õre–it'ee paa jõpijida. 15 Leví ëreerãdepemaarã, chi mama p'anapatap'edaarãpa Tachi Ak'õre baaltek'a bù mãik'aapa ma caja net'aa nêedee ooda iru bada atajida chi carreta wãrat'aadai naaweda mãik'aapa ma mãu choma bù ârù bùnajida. Ma ewate Bet Semedepemaarãpa awaraa ne–animalaarã peedap'eda, ûk'uru Tachi Ak'õre–it'ee paajida mãik'aapa ûk'uru iru–it'ee paa jõpijida. 16 Ma filisteorã poro waibùa joisomaarãpa t'ùmùùpa ma oomaa p'anadap'edaa ak'ùmaa p'anajida. Maap'eda ma ewateweda ãpùtee wãjida ãchi p'uuru Ecrondee.
17 Filisteorãpa ma tumork'a bee nêedee ooda joisomaa Tachi Ak'õre–it'ee teejida ãchia ne–inaa k'achia oodap'edaa pari. Aba teejida ãchi p'uuru Asdod pari, aba ãchi p'uuru Gaza pari, aba ãchi p'uuru Ascalón pari, aba ãchi p'uuru Gat pari mãik'aapa aba ãchi p'uuru Ecrón pari. 18 Ma awara ma rat'ak'a bee nêedee ooda teejida p'uuru ãchi poro waibùarã joisomaa jua ek'ari p'anadap'edaa pari, chi p'uuru murallapa t'ùak'au wêe bee pari paara. Ma mãu choma bù, aù ârù Tachi Ak'õre baaltek'a bù bùdap'edaa at'ãri mama bù ma Bet Semedepema Josué eujãde.
19 Mamîda Tachi Ak'õre baaltek'a bù Bet Semes p'uurude bùde ûk'uru Bet Semedepemaarãpa ma edajãde ak'ùjida, k'awa k'inia p'anadap'edaa perã k'ãata aùde paraa. Maperã Tachi Ak'õrepa ma ak'ùdap'edaarã setenta k'iniipiji. Bet Semedepemaarãpa mãga unudak'ãri, t'ãri p'uapa jêemaa p'aneejida, Tachi Ak'õrepa ãra mãgá audú miapida perã.
20 Mãpai Bet Semedepemaarãpa mãgajida:
—Tachi Ak'õre k'achia wêe bapari. ¿K'aita chooima iru k'îrapite? ¿K'airãmaa chi baaltek'a bù pëidayama ajida, iru tachi t'ãideepa ãyaa wãmerã?
21 Maap'eda nãga jara pëijida Quiriat Yearín p'uurudepemaarãmaa: “Filisteorãpa Tachi Ak'õre baaltek'a bù aneejida. Mapa ata chedapáde” ajida.