7
1 Mãgá Quiriat Yearín p'uurudepemaarãpa Tachi Ak'õre baaltek'a bù atanadap'eda, bùnajida eperã Abinadab te ee nok'ode badade. Mãpai chi warra Eleazar awara bùjida ma baaltek'a bù ak'ù bamerã.Samuel israelitaarã poro waibùa pada
2 Tachi Ak'õre baaltek'a bù taarã baji Quiriat Yearín p'uurude; perá veinte año. Maapai israelitaarãpa audú Tachi Ak'õrede ijãa k'inia p'aneejida.
3 Mapa Samuelpa israelitaarã jõmaarãmaa mãgaji:
—Parãpa waya t'ãripa Tachi Ak'õrede wãara ijãa k'inia p'anù pùrã, awaraa eujãdepemaarã ak'õre waibùa apataarã mãik'aapa ak'õre waibùa apata Astartek'a bee ãyaa bat'ak'óotù. Mãpai p'anapatáatù Tachi Ak'õrepa k'inia bùk'a mãik'aapa irumaa aupai ùt'aa t'âpatáatù. Mãga ooruta pùrã, irua parã filisteorã jua ek'ariipa uchiapiit'eeda aji.
4 Israelitaarãpa mãga oojida. Ãyaa bat'ak'oojida net'aa jõma iru p'anadap'edaa aù k'îrapite ùt'aa t'âpata, Baal k'îrak'a bee, Astarté k'îrak'a bee paara. Mãpai Tachi Ak'õremaa aupai ùt'aa t'âmaa p'aneejida.
5 Maap'eda Samuelpa nãga jaraji:
—Israelitaarã jõmaweda Mizpa p'uurude chip'edarítù. Mama parã pari mùa Tachi Ak'õremaa ùt'aa iidiit'eeda aji.
6 Mãgá israelitaarã Mizpade chip'edaidak'ãri, pania atadap'eda, Tachi Ak'õre k'îrapite weejida. Mãga oojida ak'ùpidait'ee waa p'ek'au k'achia oo k'iniada–e p'anù. Ma ewate nek'oda–e paji mãik'aapa jarajida:
—Tachi Ak'õre k'îrapite tachia p'ek'au k'achia oojidada ajida.
Mama p'anùde Samuel ãchi poro waibùa beeji.
7 Filisteorãpa k'awaa atadak'ãri israelitaarã Mizpade chip'e jõnù, ãchi poro waibùarãpa jarajida chõode wãdamerã. Israelitaarãpa mãga k'awaadak'ãri, p'eradachida. 8 Mãpai Samuelmaa mãgajida:
—Tachi Ak'õremaa ùt'aa iidiparíiji, irua tachi k'aripa atamerã filisteorã juadeepa.
9 Mãpai Samuelpa oveja chak'e ataji mãik'aapa peep'eda, Tachi Ak'õre–it'ee paa jõpiji. Ma t'êepai israelitaarã pari ùt'aa iidiji.
Tachi Ak'õrepa nãga k'aripaji. 10 Samuelpa at'ãri ma oveja chak'e paamaa bù misa, filisteorã pachejida israelitaarã ome chõodait'ee. Mãga nùde Tachi Ak'õrepa pa golpe jîwaapiji. Mãga ûridak'ãri, ma filisteorã p'eradachida mãik'aapa israelitaarã taide ãchi eujãdee jîchoo wãjida. 11 Aramata israelitaarã Mizpadeepa uchiajida ma filisteorã t'êe. Bet Car waawí parutamaa chõo wãjida. Mãgá israelitaarãpa ma filisteorã pee wãjida. 12 Ma t'êepai Samuelpa mãu atap'eda, bùji Mizpa p'uuru, Sen p'uuru esajîak'a.
Mãpai mãgaji:
—Na mãu t'â bùit'eeda aji, Ebenezer,a nama Tachi Ak'õrepa tachi k'aripada perã.
13 Maadak'ãriipa filisteorãpa waa chõo jùrùda–e paji israelitaarã eujãde, israelitaarãpa ãra p'oyaadap'edaa perã. Samuel israelitaarã poro waibùa bù misa,b Tachi Ak'õrepa maarepida filisteorãmaa p'oyaapi–e paji. 14 Ma awara israelitaarãpa waya atajida ãchi p'uuru filisteorãpa jãri iru p'anadap'edaa Ecrondeepa Gat parumaa. Mãgá israelitaarãpa ãchi eujã filisteorã juadeepa jãri atajida. Maapai israelitaarã k'ãiwee p'anapachida amorreorã ome.
15 Samuel piurumaa iru israelitaarã poro waibùa paji. 16 Año chaa iru wãpachi Betel p'uurudee, Guilgal p'uurudee mãik'aapa Mizpa p'uurudee israelitaarã nepùra ak'ùde. 17 Maap'eda ichi temaa wãpachi Ramá p'uurudee. Mama ichiaba israelitaarã nepùra ak'ùpachi mãik'aapa mama Tachi Ak'õre–it'ee altar ooji.