Israelitaarãpa rey k'inia p'anadap'edaa
8
1 Samuel chonaa bak'ãri, ichi pari chi warrarã bùji charraarã mimia oodamerã israelitaarã t'ãide. 2 Chi naapema t'âjarapachida Joel; chi apema Abías. Ãra Berseba p'uurude p'anapachida mãgá israelitaarã nepùra ak'ùdak'ãri. 3 Mamîda ãchi chi ak'õrek'a p'anadak'aa paji. Ma k'ãyaara p'arat'a audú k'inia p'anadap'edaa perã, p'arat'a jitapachida ma p'arat'a teedap'edaarãpa oopidap'edaak'a oodait'ee. Mãgá israelitaarã nepùra ak'ùdak'aa paji Tachi Ak'õrepa oopi bùk'a. 4 Maperã israelitaarã poro waibùarã chip'edaidap'eda, Ramadee wãjida Samuel ome pedeede. 5 Mãgajida:—Pù chonaa bùda ajida, mãik'aapa pù warrarã pùk'a p'anadak'aa. Maperã taipa k'inia p'anù pùa rey bùmerã, irua tachi ak'ùpariimerã. Rey k'inia p'anùda ajida, awaraa eujãdepemaarãpa iru p'anapatak'a.
6 Mãgá rey k'inia p'anùda adak'ãri, Samuel t'ãri ãriidachi. Maperã Tachi Ak'õremaa ùt'aa t'âmaa beeji.
7 Mãpai Tachi Ak'õrepa nãga p'anauji: —Óoji ãchia iidi p'anùk'a. Pù yiaraa iru p'anù–e. Mùta yiaraa iru p'anù, k'iniada–e p'anadairã mù ãchi rey waa bamerã. 8 Pùmaa oo p'anù mùmaa oopatak'a mùa ãchi Egipto eujãdeepa uchia atadak'ãriipa ârá parumaa. Mùde ijãa amaapata ùt'aa t'ânadait'ee awaraa ak'õre waibùa apatamaa. 9 Mãga p'anapata perã, óoji ãchia iidi p'anùk'a. Mamîda aù naaweda k'îra jîp'a ûraapáde aji, k'awaadamerã sãga p'anapataadait'ee rey jua ek'ari.
—Rey jua ek'ari nãga p'anapataadait'eeda aji. Reypa parã warrarã ûk'uru soldaorã papiit'ee; awaraarã bùit'ee caballo ârù wãdamerã chõode; awaraarã bùit'ee ichi carreta naa p'ira wãdamerã mãik'aapa ichi jâadamerã. 12 Ûk'uru soldaorã mil poro waibùa papiit'ee; awaraarã soldaorã cincuenta poro waibùa papiit'ee. Awaraarã bùit'ee ichi eujãde mimiadamerã; ne–uudamerã mãik'aapa ne–uu chauda ewadamerã. Awaraarã bùit'ee metaldee oodamerã arma mãik'aapa carreta oodak'ãri, ne–inaa metaldee ooda aùde bùdait'ee. 13 Parã k'aurã jida atait'ee k'era oodamerã, nechuudamerã mãik'aapa pan oodamerã. 14 Parã eujã piara bee, uva k'ãi mãik'aapa olivo k'ãi piara bee ichi–it'ee atap'eda, teeit'ee poro waibùarã ichi jua ek'ari mimiapataarãmaa. 15 Parã net'a tau ewada mãik'aapa uva oroda diezdepema chaa aba ichimaa teepiit'ee ichi ak'ùpataarã–it'ee mãik'aapa awaraarã ichi jua ek'ari mimiapataarã–it'ee. 16 Ichiaba parã mimiapataarã, ùmùk'îraarã, wêraarã paara mãik'aapa parã p'ak'a pipùara bee, burroorã paara atait'ee ichi–it'ee mimiapataadamerã. 17 Parã ovejaarã waridadepema diezdepema chaa aba atait'ee. Ma awara pãchi jida iru–it'ee mimiadait'ee. 18 Mãga pak'ãri, parãpa rey jùrùt'eradap'edaapa ma jõma oo bù k'aurepa parãpa Tachi Ak'õremaa chupùria iididait'ee. Mamîda irua ûri–e pait'eeda aji.
19 Samuelpa mãga jaraji mîda, israelitaarãpa ûri k'iniada–e paji. Mapa irumaa nãga jarajida:
—Tai–it'ee pù ûraa maarepida p'ua–e bùpù. Taipa rey k'inia p'anùda ajida, 20 awaraa eujãdepemaarãpa iru p'anapatak'a. K'inia p'anù reypa tai ak'ù bapariimerã mãik'aapa tai naa wãpariimerã awaraarã ome chõonadak'ãri.
21 Samuelpa mãga ûrip'eda, Tachi Ak'õremaa ma pedee jaraji.
22 Mãpai Tachi Ak'õrepa p'anauji:
—Óoji ãchia iidi p'anùk'a. Rey bùpáde aji, ãchi ak'ùpariimerã.
Mãpai Samuelpa ‘‘pia bùda’’ ap'eda, jaraji israelitaarã wãdamerã ãchi p'uuru chaa.