Saúl Samuel ome unuda
9
1 Maapai eperã bapachi, t'âjarapatap'edaa Quis. Mãgà Benjamín ëreerãdepema paji. Chi ak'õre Abiel paji. Ma Abiel uchiaji Zerordeepa. Ma Zeror uchiaji Becoratdeepa. Ma Becorat uchiaji Afiadeepa. Awaraarãpa Quis waawee p'anapachida ãchi poro waibùak'a unupatap'edaa perã. 2 Quipa warra k'ûtrãa k'îra wãree, k'ap'ùa âdaa iru baji. T'âjarapachida Saúl. Awaraa israelita iruk'a wê–e paji. Awaraarã jõmaarã k'ãyaara iru ùt'ùara baji.3 Ewari aba Quis burroorã atuadachida. Mapa irua chi warra, Saulmaa mãgaji:
—Wåji tachi burroorã jùrùde. Pùchi ome mimiapari aba ateepáde aji.
4 Mãgá Saúl wãji. Wãyaajida ee jêra bùmãi Efraín ëreerã eujãde mãik'aapa Salisá eujãde. Mamîda ma burroorã atuadap'edaa mama unuda–e paji. Ichiaba wãyaajida Salín eujãde mãik'aapa Benjamín ëreerã eujãde. Mamîda mama ichiaba unuda–e paji. 5 Zuf eujãde panadak'ãri, Saulpa chi mimiaparimaa mãgaji:
—Ãpùtee wãdáma aji. Maa–e pùrã mù ak'õre tachi pari audupùara k'îsia nâbeei, ichi burroorã pari k'îsiai k'ãyaara.
6 Ma mimiaparipa p'anauji:
—Tachi Ak'õre pedee jarapari na p'uurude bapari. Jõmaarãpa iru pia ak'ùpata, irua jara bùk'a ichita p'asapari perã. Wãdáma irumaa. Irua jaraisk'a chisãgà ode tachi wãdaipia bù.
7 Saulpa p'anauji:
—Mãgara wãdáma aji. Mamîda ¿irumaa k'ãata ateedayama? aji. Tachi mochila anipapatade pan jida wêe nida. Ne–inaa wêe p'anùda aji, teedait'ee Tachi Ak'õre pedee jaraparimaa.
8 Mãpai ma mimiaparipa mãgaji:
—Mùa iru bù p'arat'a tau perá gramo õpee pait'ee bù. Mãgà teeit'eeda aji, ma Ak'õre pedee jaraparimaa, irua tachimaa o ak'ùpimerã.
9 (Chonaarãweda israelitaarãpa Tachi Ak'õremaa ne–inaa iidi k'inia p'anadak'ãri, iidipachida ‘eperãpa ne–inaa p'asait'ee bù unupari’ apatap'edaamaa. Ârá mãgee eperã Tachi Ak'õre pedee jaraparida apata.)
10 Saulpa ma mimiaparimaa mãgaji:
—Pia bùpù. Wãdáma aji.
Mãpai ãchi omeeweda wãjida ma Ak'õre pedee jarapari bapariida p'uurudee. 11 Eede ùt'aa wãrutade ma p'uurumaa, awêraarã ome unujida. Ma awêraarã pania t'ùde wã nipajida. Mãpai mãùrãmaa iidijida:
—¿Nama bùk'ã ajida, ne–inaa p'asait'ee bù unupari?
12 Ma awêraarãpa p'anaujida:
—Bùpù. Mamîda waawipai bù. Et'ewapai pacheji, idi p'uurude ne–animalaarã peedap'eda, Tachi Ak'õre–it'ee paapidait'ee perã ee ùt'à bùde ne–animalaarã paapatamãi. Isapai wãruta pùrã, iru ununadayada ajida. 13 P'uurude panadak'ãri, iru jùràtù nek'ode wãi naaweda eede ùt'aa, ne–animalaarã Tachi Ak'õre–it'ee paapatamaa. Mama iru pana–emãi eperãarã nek'oda–e, irua pedee pia jarait'ee perã nek'odai naaweda. Maap'eda chi t'â pëidaarã nek'odai. Mapa isapai wãdapáde ajida, iru unudamerã.
14 Aramãgá Saúl ma mimiapari ome p'uurudee wãjida. Ará panadak'ãri, unujida Samuel wãru eede ùt'aa ne–animalaarã paapatamaa.
15 Aù noreweda, Saúl pai naaweda, Tachi Ak'õrepa Samuelmaa nãga k'awapiji: 16 “Nu, nãgà horade mùa Benjamín ëreerãdepema aba pùmaa pëiit'eeda aji. Mãgà awara bùpáde aji, mù p'uuru pidaarã ak'ùpariimerã. Mãgùpa israelitaarã uchiapiit'ee filisteorã juadeepa. Mãgá mùa ak'ùpiit'ee wãara ûriji mù p'uuru pidaarãpa chupùria iididap'edaa.”
17 Samuelpa Saúl unuk'ãri, Tachi Ak'õrepa mãgaji:
—Nãgùda aji, mùa eperã jarada. Nãgùpa mù p'uuru pidaarã ak'ù bapariit'eeda aji.
18 Saúl p'uurude t'îupatamãi panak'ãri, Samuel k'ait'a wãp'eda, nãga jaraji:
—Mù chupùria k'awáaji. Jarapáde aji, sãma bù ne–inaa p'asait'ee bù unupari te.
19 Samuelpa p'anauji:
—Mùpù chi ne–inaa p'asait'ee bù unupari. Mù naa eede ùt'aa wåtù ne–animalaarã Tachi Ak'õre–it'ee paapatamaa, idi parã mù ome nek'odait'ee perã. Nu mùa jarait'ee pùa mùmaa iidi k'inia bù. Maap'eda mùa parã wãpii. 20 K'îsianáaji pù burroorã k'ãima õpee atua p'anù unu atadap'edaa perã. Awaraarã k'ãyaara israelitaarãpa pù mãik'aapa pùchi ak'õredeerã piara ak'ùpataadait'eeda aji.
21 Mãpai Saulpa p'anauji:
—Mamîda mù Benjamín ëreerãdepema, Israeldeepa uchiadap'edaarã ëreerã ma–ãriara bùdepema. Ma awara Benjamín ëreerãdepemaarãde mùchideerã ek'ariara p'anù awaraa te pidaarã k'ãyaara. Mãga bùta, ¿sãap'eda pùa mùmaa mãga jara bùma? aji.
22 Mãpai Samuelpa Saúl chi mimiapari ome ateeji nek'opatamaa. Su–ak'ù beepiji t'â pëidaarã treinta p'anadap'edaa ome, eperãarã poro waibùara bù su–ak'ù beeparimãi.
23 Maap'eda Samuelpa chi nejooparimaa mãgaji:
—Aneepáde aji, nechiara mùa jarada awara bùmerã.
24 Aramãgá ma nejooparipa ne–animal mak'ara aba atanap'eda, Saulmaa tee cheji. Mãpai Samuelpa mãgaji:
—Jãgà pù–it'ee awara iru baji. K'opáde aji, mùa na t'â pëidaarã t'âda perã pù ome auk'a nek'ode chedamerã.
Mãgá ma ewate Saúl nek'oji Samuel ome. 25 Ma ee ùt'ùa badamãiipa uchiadak'ãri, p'uurude t'îujida. Maap'eda Samuel tedepema terrazade Saul–it'ee k'ãimerã ooteejida. Mama Samuel Saúl ome pedeeji. 26 Maap'eda Saúl jêra beeji mãik'aapa k'ãiji.
Aù norema Samuelpa Saúl t'âji mãik'aapa nãga jaraji:
—P'irabáiji mãik'aapa pùchi ode wãpáde aji.
Mãgá Saúl p'irabaiji mãik'aapa Samuel ome taawaa uchiaji. 27 P'uurudeepa uchiadait'ee pak'ãri, Samuelpa Saulmaa mãgaji:
—Pù mimiapari naa pïiji. Mamîda pù, arak'atùa beepáde aji, mùa jara k'inia bairã Tachi Ak'õrepa mùmaa jarada.
Mãpai Saúl mimiapari ichi naa wãji.