Samuelpa Saúl awara bùda israelitaarã rey pamerã
10
1 Mãpai Samuelpa aceite olivodee ooda botellade iru bada atap'eda, Saúl poro ârù weet'aaji mãik'aapa iru uritarrade k'îra ât'aap'eda, mãgaji:—Idi Tachi Ak'õrepa pù awara bùruda aji, ichi p'uuru pidaarã, israelitaarã ak'ù bapariimerã.a Pùa israelitaarã ak'ù bapariit'ee mãik'aapa ãra uchiapiit'ee ãra k'îra unuamaa iru p'anapataarã juadeepa. Nãgá pùa k'awai Tachi Ak'õrepa pù awara bùda ichi p'uuru pidaarã poro waibùa pamerã. 2 Pù namãik'aapa wãk'ãri, ùmùk'îraarã omé unuit'ee Selsa p'uurude Benjamín ëreerãdepemaarã eujãde, Raquel ùadap'edaa k'ait'a. Mãùrãpa nãga jaradait'ee: “Unu atajidada adait'ee, parãpa burroorã jùrù nipadap'edaa. Pù ak'õre waa k'îsia–e bù ma burroorãde; jîp'a parãde k'îsia nâbù. Irua iidimaa bùda adait'ee, k'ãata ooima pù unu atait'ee.”
3 ’Ma t'êepai, waawipai Tabor eujãde encina pak'uru bùmãi panak'ãri, unuit'eeda aji, ùmùk'îraarã õpee, Beteldee wãruta Tachi Ak'õremaa ùt'aa t'âde. Abaapa chivo õpee atee wãit'ee mãik'aapa abaapa pan õpee atee wãit'ee. Jõdee chi apemapa vino ne–ede t'ùda atee wãit'ee. 4 Pùmaa saludaadap'eda, pùmaa pan omé teedait'ee. Jitapáde aji.
5 ’T'êepai pù panait'ee Guibeá p'uurude Tachi Ak'õre ee apata k'ait'a, filisteorã soldaorã p'anapatamãi. Ma p'uurude t'îurude, pùa unuit'ee Tachi Ak'õre pedee jarapataarãpa iru pedee jaramaa p'anù, ùt'aa t'âpatamãiipa eede edaa wãdade. Mãùrã nok'oore unuit'ee eperãarãpa chaamaa p'anù salterio, pandero, p'ip'ana mãik'aapa arpa. 6 Mãga nùde Tachi Ak'õrepa ichi Jaure pùmaa pëiit'ee. Mãgá pù ãra ome auk'a iru pedee jaramaa beeit'ee mãik'aapa pù awara beeit'ee. 7 Mùa pùmaa jara bùk'a p'asak'ãri, óoji pùchia k'îsia bùk'a, Tachi Ak'õre pù ome bait'ee perã.
8 ’Maap'eda mù naa Guilgal p'uurudee wåji. Mama mù pù ome unuit'ee. Mama k'ãima siete nàji mù pù ome unurumaa. Tachi Ak'õre–it'ee mùa ne–animalaarã peep'eda, paa jõt'aait'ee mãik'aapa awaraa ne–animalaarã peep'eda, paait'ee jedek'odait'ee tachi auk'aarã ome. Maap'eda mùa pùmaa jarait'eeda aji, k'ãata ooipia bù.
9 Saúl Samuel ome despediip'eda, mamãik'aapa uchiak'ãri, Tachi Ak'õrepa iru t'ãri awarapiji. Ma ewateweda Samuelpa jaradak'a jõmaweda p'asaji. 10 Saúl ichi mimiapari ome panadak'ãri Guibeá p'uurude, Tachi Ak'õre pedee jarapataarã ãramaa chejida. Mãga nùde Tachi Ak'õre Jaure Saúl ome ba chep'eda, ãrak'a irua auk'a Tachi Ak'õre pedee jaramaa beeji. 11 Saúl k'awa p'anadap'edaarãpa unudak'ãri irua Tachi Ak'õre pedee jaramaa bù Tachi Ak'õre pedee jarapataarãk'a, ãchi pitapai mãgapachida:
—¿Quis warra Saúl, sãga nâbùma? ¿Iru Tachi Ak'õre pedee jarapari padachik'ã? apachida.
12 Ichiaba mãpema abaapa mãgaji:
—¿K'aima aji, jã Ak'õre pedee jarapataarã ak'õre?
Ma t'êepai eperãarãpa jarapachida: “¿Saúl jida Tachi Ak'õre pedee jaraparik'ã?” apachida. Mãga jarapachida Saúl awara unudap'edaa perã.
13 Saúl mãgá pedee bap'eda, wãji eede ùt'aa, mãpema Tachi Ak'õremaa ùt'aa t'âpatamaa. 14 Saúl chîapapa iru unuk'ãri, iidiji irumaa mãik'aapa chi mimiaparimaa:
—¿Sãmaa wãjidama? aji.
Saulpa p'anauji:
—Burroorã jùrù nipajida. Mamîda unuda–e pak'ãri, Samuelmaa iidinajidada aji.
15 Mãpai chi chîapapa mãgaji:
—¿Samuelpa pùmaa k'ãata jarajima? aji. Mùmaa jarapáde aji.
16 Saulpa p'anauji:
—Jîp'a jarajida aji, ma burroorã unudap'edaa.
Mamîda Saulpa jara–e paji Samuelpa ichi rey pait'eeda ada.
17 Ma t'êepai Samuelpa israelitaarã t'â pëiji Tachi Ak'õremaa ùt'aa t'ânadamerã Mizpa p'uurude.
18 Mama chip'edaidak'ãri, Samuelpa mãgaji:
—Tachi Ak'õre, israelitaarã Ak'õre Waibùapa nãga jara bùda aji. “Mùa parã israelitaarã Egipto eujãdeepa uchia ataji. Ma awara mùa parã uchiapiji Egipto pidaarã jua ek'ariipa mãik'aapa awaraa eujãdepemaarã jua ek'ariipa.” 19 Mamîda ârá parãpa Tachi Ak'õre yiaraa iru p'anù, irua parã mãgá k'aripa ataji mîda ma k'achiade p'anadap'edaamãiipa mãik'aapa ma chupùria p'anadap'edaamãiipa. Iru k'ãyaara reyta k'inia p'anùda apata. Maperã Tachi Ak'õre k'îrapite chedapáde aji, ëreerã chaa mãik'aapa te pidaarã chaa.
20 Mãga jarap'eda, Samuelpa Israeldeepa uchiadap'edaa ëreerã chaa k'ait'a chepip'eda, suerte jemeneji k'awaait'ee Tachi Ak'õrepa chisãgà ëreerã jùrùt'eraji madeepa rey uchiamerã. Mãgá k'awaajida Benjamín ëreerã jùrùt'erada. 21 Maap'eda jaraji Benjamín ëreerãdepema te pidaarã chaa k'ait'a chedamerã. Mãpai suerte jemenek'ãri, k'awaajida Matri te pidaarã jùrùt'erada. Ma t'êepai suerte jemenek'ãri, k'awaajida Matrideepa uchiada Quis warra, Saúl, jùrùt'erada. Mamîda Saúl jùrùnadak'ãri, unuda–e paji. 22 Mãpai Tachi Ak'õremaa iididak'ãri k'awaapimerã Saúl bù wa wê–e, irua k'awapiji Saúl miru bù net'aa p'e bùdap'edaamãi. 23 Mãpai p'ira wãjida, iru mamãik'aapa aneedait'ee. Israelitaarã k'îrapite aneedak'ãri, k'awaajida Saúl ùt'ùara bù israelitaarã jõmaarã k'ãyaara.
24 Mãpai Samuelpa jõmaarãmaa mãgaji:
—Tachi Ak'õrepa rey jùrùt'erada ak'àtù. Iruk'a awaraa israelitaarã wê–eda aji.
Mãpai israelitaarãpa biajida:
—¡Tachi Rey, pia bapariipáde! ajida.
25 Maap'eda Samuelpa israelitaarãmaa jarateeji ley rey–it'ee; sãgá bapariipia bù ichi jua ek'ari p'anapataarã ome. Mãpai librode ma ley jõma p'ãp'eda, Tachi Ak'õre ome unupata tede ùa bùji. Maap'eda Samuelpa eperãarã ãchi te chaa pëiji.
26 Saúl ichiaba wãji ichi temaa Guibeade. Israelitaarã sõcharra beerã ûk'uru iru ome auk'a wãjida, Tachi Ak'õrepa ãramaa k'îsiapida perã mãga oodamerã.
27 Mamîda ûk'uru t'ãri k'achia–idaa beerãpa mãgajida:
—¿Jãgàpata tachi k'aripa ataik'ã ajida, tachi k'îra unuamaa iru p'anapataarã jua ek'ariipa?
Mãùrãpa iru pia ak'ùda–e paji mãik'aapa irumaa net'aa pia teeda–e paji. Mãùrãpa mãga jarajida mîda, Saúl k'îup'ee beeji.