Saulpa amonitaarã p'oyaada
11
1 Ma t'êepai amonitaarã rey Najapa ichi soldaorã chip'e atap'eda, wãjida Galaad eujãdee Jabés p'uurudepemaarã ome chõode. Ma p'uuru wap'ùra iru p'anùde, ma p'uurudepemaarãpa irumaa jara pëijida:—Tai ome pedéeji chõoda–ee p'anapataadait'ee. Mãga ooru pùrã, pù jua ek'ari p'anapataadait'eeda ajida.
2 Ma amonita Najapa p'anauji:
—Pia bùpù. Pacto oodáma chõoda–ee p'anapataadait'ee. Mamîda mùa parã jõmaarã juaraarepema tau êet'aait'eeda aji, ma k'aurepa israelitaarã k'îra nejasia p'aneedamerã.
3 Jabés p'uurudepema poro waibùarãpa p'anaujida:
—K'ãima siete nàji, taipa jara pëiruta misa israelitaarã jõmaarãmaa tai k'aripa chedamerã. Apidaapa tai k'aripa cheda–e pùrã, pùa jara bùk'a oodayada ajida.
4 Mãpai ma poro waibùarãpa eperãarã pëijida Guibeadee, Saúl baparimaa. Mãpemaarãmaa nepùrùdak'ãri, jêe para beeji. 5 Mãga nùde Saúl pacheji ichi p'ak'a arado jidiupataarã ome mãik'aapa ma p'uurudepemaarã mãgá unuk'ãri, iidiji:
—¿Eperãarã sãgajidama? aji. ¿Sãap'eda jêe para nâbùma? aji.
Mãpai nepùrùjida Jabés p'uurudepemaarãpa jara pëidap'edaa. 6 Saulpa mãga ûrik'ãri, Tachi Ak'õrepa ichi Jaure irumaa pëiji. Mapa Saúl k'îraudachi ma amonitaarã ome. 7 P'ak'a omé atap'eda, peek'ooji mãik'aapa t'ùap'ek'ooji. Ma p'ak'a k'ap'ùa piuda t'ùap'eda beeda awara–awaraa pëiji israelitaarã jõmaarãmaa mãik'aapa ma nechiara ateedap'edaarã ome nãga jara pëiji: “Na p'ak'a ome oodak'a ooit'eeda aji, chi mù eere mãik'aapa Samuel eere chõode cheda–e p'anùùrã p'ak'aarã ome.”
Israelitaarãpa mãga ûridak'ãri, p'erak'oodachida. Mapa eperã abapai pùk'a chejida Saúl eere chõodait'ee. 8 Bézec p'uuru k'ait'a chip'edaidap'eda, Saulpa ichi eere p'anadap'edaa soldaorã juasiak'ãri, trescientos mil Israeldepemaarã paji. Jõdee treinta mil Judadepemaarã paji.
9 Ma t'êepai Saulpa jaraji ma Jabedeepa chedap'edaarãmaa:
—Jabés p'uurudepemaarãmaa nãga jaranátù: “Nu imat'ùpa pai naaweda taipa parã k'aripanadait'eeda” aji.
Mãpai ãra wãjida. Saulpa jara pëida nepùrùnadak'ãri, Jabés p'uurudepemaarã o–îadachida. 10 Mãpai seewata amonitaarã rey Najamaa nãga jara pëijida: “Nu pù jua ek'ari p'aneedait'eeda ajida, pùa tai ome oomerã pùchia k'inia bùk'a.”
11 Aù norema Saulpa ichi soldaorã t'ooda õpeede t'ooji. Âdatùpodopa wãjida amonitaarã carpa eebai jira bùdap'edaamaa mãik'aapa mãùrã peek'oo wãjida imat'ùpa parumaa. Chi chok'ai uchiadap'edaarã waaweepa jîchoo wãjida. Mãgá eperãarã omé araa p'aneeda–e paji.
Israelitaarãpa Saúl k'inia p'anadap'edaa ãchi rey pamerã
12 Maap'eda israelitaarã ûk'uruurãpa Samuelmaa mãgajida:
—¿K'airãpa jarajidama ajida, Saúl tachi rey panaamerã? ¡Ma eperãarã taimaa teepáde ajida, peek'oodait'ee perã!
13 Mamîda Saulpa mãgaji:
—Idi apida piuda–eda aji, Tachi Ak'õrepa idi tachi israelitaarã k'aripada perã.
14 Mãpai Samuelpa jõmaarãmaa nãga jaraji:
—Guilgaldee wãdáma aji, Saúl rey bùdait'ee.
15 Mãgá israelitaarã jõmaweda Guilgaldee wãjida. Mama Tachi Ak'õre k'îrapite Saúl ãchi rey bùjida. Ichiaba ne–animalaarã peedap'eda, Tachi Ak'õre–it'ee paapijida ãchi auk'aarã ome jedek'odait'ee. Mama Saúl mãik'aapa israelitaarã o–îa p'aneejida.