Samuelpa israelitaarãmaa jarada
12
1 T'êepai Samuelpa israelitaarã jõmaarãmaa nãga jaraji:—¡Ûrítù! Mùa oodoo parãpa iididap'edaak'a. Rey k'inia p'anùda adak'ãri, mùa rey bùji parã ak'ù bapariimerã. 2 Nama bùda aji, pãchi rey. Irua parã ak'ù bapariit'ee mãik'aapa parãmaa jarait'ee k'ãata oodaipia bù. Mù audú chonaa bù. Poro t'orroo bù. Mù warrarã parã t'ãide p'anù. K'ûtrãaweda mùa parã k'aripadoo ârá parumaa. 3 Mù nama iru p'anù. Âraweda jarátù Tachi Ak'õre k'îrapite mãik'aapa irua rey jùrùt'erada k'îrapite mùchi–it'ee ataji pùrã awaraarã p'ak'a wa burro, maa–e pùrã parãdepema apidaamaa ne–inaa k'achia ooji pùrã, maa–e pùrã p'arat'a jitaji pùrã eperã aba piara ak'ùit'ee awaraarã k'ãyaara. Jaradapáde aji. Mùa ma pari p'aait'ee.
4 Mãpai arii p'anadap'edaarãpa p'anaujida:
—Mãga ook'aa pajida ajida. Pùa taimaa ne–inaa k'achia apida oo–e paji, tai k'achia iru ba–e paji pùchi jua ek'ari mãik'aapa p'arat'a jitak'aa paji ne–inaa k'achia oo–e bù ùmùateeit'ee.
5 Mãpai Samuelpa mãgaji:
—Mãgara Tachi Ak'õrepa mãik'aapa irua jùrùt'erada reypa ûri p'anù parãpa nepùra apida mù ome wêe p'anù.
Ãrapa p'anaujida:
—Mãgada ajida.
6 Ma awara Samuelpa israelitaarãmaa nãga jaraji:
—Moisés k'ap'ùa mãik'aapa Aarón k'ap'ùa Tachi Ak'õrepa parã chonaarã Egipto eujãdeepa uchiapiji. 7 Ârá Tachi Ak'õre k'îrapite ak'ùnâ p'anéetù charra k'îrapite ak'ùnâ p'aneek'ajidak'a, mùa parã ùmùateeit'ee perã. Ûrítù mùa parãmaa k'irãpapiru misa irua ooda parã chonaarã ome mãik'aapa parã k'aripait'ee.
8 ’Jacob ichideerã ome Egipto eujãde p'anadap'eda, taarã pak'ãri, Egipto pidaarãpa ãra k'achia iru p'anapachida ãchi jua ek'ari. Maapai parã chonaarãpa Tachi Ak'õremaa chupùria iidipachida, irua ãchi k'aripamerã. Mãpai Tachi Ak'õrepa Moisés Aarón ome pëiji. Ãrapa parã chonaarã Egipto eujãdeepa uchia atajida mãik'aapa aneejida na eujãdee. 9 Mamîda nama p'anùde parã chonaarãpa ichi k'inia Ak'õre Waibùa k'îra atuajida. Maperã irua ãra baaipiji Jazor p'uurudepema soldaorã poro waibùa Sísara juade, ma awara filisteorã juade mãik'aapa Moab eujãdepema rey juade. Mãùrã jõmaweda parã chonaarã ome chõopachida. 10 Mamîda ma t'êepai parã chonaarãpa k'awaajida ãchia ne–inaa k'achia oodap'edaa Tachi Ak'õre k'îrapite, ùt'aa t'â p'anadak'ãri awaraarã ak'õre waibùa apata Baal mãik'aapa Astarté k'îrapite. Mãpai chupùria iidijida Tachi Ak'õrepa ãchi uchiapimerã ãchi k'îra unuamaa iru p'anadap'edaarã jua ek'ariipa. Irumaa aupai ùt'aa t'âdait'eeda ajida.
11 ’Maapai Tachi Ak'õrepa pëiji Yerubaal,a Barac, Jefté mãik'aapa mù, Samuel, parã ak'ùpataadamerã irua parã uchiapiru misa parã k'îra unuamaa iru p'anapatap'edaarã jua ek'ariipa, mãgá parã k'ãiwee p'anapataadamerã.
12 ’Mamîda parãpa k'awaadak'ãri amonitaarã rey Najapa k'îsia iru bada parã ome chõoit'ee, mùmaa iidijida parã rey jua ek'ari bùmerã. Mãga iidijida parãpa rey pipùara iru p'anù mîda; mãgà parã Ak'õre Waibùa. 13 Nama bù rey parãpa jùrùt'eradap'edaa. Tachi Ak'õrepa parãmaa rey teeji. 14 Ârá parãpa Tachi Ak'õre waaweedaipia bù, irumaa aupai ùt'aa t'âpataadaipia bù mãik'aapa irua jara bùk'a oodaipia bù. Parãpa, parã reypa paara ichita oodaipia bù Tachi Ak'õrepa k'inia bùk'a. Mãga ooruta pùrã, pia p'anapataadait'ee. 15 Mamîda iru pedee ûridaamaa p'aneeruta pùrã mãik'aapa irua jara bùk'a ooda–e pùrã, irua parã, parã rey paara miapiit'ee, parã chonaarã miapidak'a.
16 ’Ãyaa wãnaadapáde aji, unudait'ee perã ne–inaa pi–ia Tachi Ak'õrepa ooit'ee bù parã k'îrapite. 17 Naapai trigo ewapata k'oi chek'aa perã. ¿Wãara–ek'ã? aji. Mùa Tachi Ak'õremaa ùt'aa iidiit'ee pa jîwaapimerã mãik'aapa k'oi chepimerã. Mãgá parãpa k'awaadait'ee Tachi Ak'õre k'îrapite ne–inaa k'achia oojida, iru awara rey iididak'ãri.
18 Aramãgá Samuelpa Tachi Ak'õremaa ùt'aa iidiji. Ma ewateweda Tachi Ak'õrepa pa jîwaa nâbeepiji mãik'aapa k'oi chepiji. Mãga unudak'ãri, israelitaarã jõmaarãpa Tachi Ak'õre mãik'aapa Samuel waawee p'aneejida.
19 Mapa Samuelmaa mãgajida:
—Tachi Ak'õre, pù Ak'õre Waibùamaa chupùria iidíji, tai, pù mimiapataarã pari, irua tai piupinaamerã. Tai–it'ee rey iididak'ãri, waapùara k'achia oojidada ajida, naaweda oodap'edaa k'ãyaara.
20 Mãpai Samuelpa mãgaji:
—P'eranáatù. Wãara, parãpa ne–inaa audú k'achia oojida. Mamîda ichita Tachi Ak'õrede ijãapatáatù mãik'aapa t'ãripa oopatáatù irua jara bùk'a. 21 Waa jùrùnáatù awaraa ak'õre waibùa apataarãmaa ùt'aa t'âpataadait'ee. Mãùrãpa parã maarepida k'aripada–e, servi–e p'anadairã. 22 Tachi Ak'õrepa ichita oopari ichia jara bùk'a. Mapa ichi p'uuru pidaarã ituaba atabëi–e. Irua k'inia bù parã ichi p'uuru pidaarã padamerã. 23 Mùata ichita ùt'aa iidiit'ee parã pari, mãgá p'anapataadamerã. Mùa mãga oo–e pùrã, Tachi Ak'õre k'îrapite p'ek'au k'achia ooit'ee. Parãmaa jarateeit'ee iru o piade nipapataadamerã. 24 Aba parãpa Tachi Ak'õre waaweedaipia bù mãik'aapa t'ãripa irua jara bùk'a oopataadaipia bù. K'irãpadaipia bù irua ne–inaa jõmaweda ooda parã k'aripait'ee. 25 Mamîda at'ãri ne–inaa k'achia oo p'aneeruta pùrã, parã mãik'aapa pãchi rey paara jõdait'ee.