Samuelpa rey Saúl ùtrùada
13
1 Saúl treinta año iru baji israelitaarã rey beek'ãri. Cuarenta y dos año taarãji israelitaarã ak'ùmaa.2 Maapai irua israelitaarã ùmùk'îraarã tres mil jùrùt'eraji soldaorã p'aneedamerã. Dos mil p'aneejida iru ome Micmás p'uurude Betel p'uuru k'ait'a ee jêra bùmãi. Jõdee chi apema mil p'aneejida ichi warra Jonatán ome Guibeá p'uurude. Ma Guibeá p'uuru Benjamín ëreerã eujãde baji. Ma soldaorã jùrùt'erap'eda, Saulpa israelitaarã p'aneedap'edaarã ãchi temaa pëiji.
3 Guibeá p'uurude p'anùde Jonatán ichi ek'ari p'anadap'edaarã ome chõonajida mama bada filisteorã soldaorã p'anapatap'edaamaa mãik'aapa mãùrã p'oyaajida. Apemaarã filisteorãpa mãga k'awaa atadak'ãri, k'îraudachida. Maperã Saulpa trompeta chaapiji israelitaarã eujãde, hebreorã chip'edaidamerã jura chõodait'ee ma filisteorã ome.
4 Israelitaarã jõmaarãpa k'awajida Saúl eere p'anadap'edaarãpa ma filisteorã ome chõodap'edaa. Maperã filisteorãpa israelitaarã k'îra unuamaa iru p'aneejida. Mapa israelitaarã soldaorã Saúl ome chip'ejida Guilgal p'uurude.
5 Mãga nùde filisteorã chip'ejida chõodait'ee israelitaarã ome. Tres mil carreta iru p'anajida seis mil soldaorã aùde wãpataarã ome mãik'aapa awaraa soldaorã cho–k'ara jîte wãjida. Mãùrã cho–k'ara p'anajida, p'usadepema ipu tau nãusaak'a. Ma soldaorã Micmadee wãjida. Mama panadak'ãri, Bet Avén oriente eere p'aneejida. 6 Ma filisteorã ãchi k'ait'a p'anapatap'edaa israelitaarã ome chõo chejida. Ma israelitaarãpa unudak'ãri ãchi ârù audú chewãda, ûk'uru miruk'oodachida mãu tede, yooro tede, mãu–idaa beemãi, zanjade mãik'aapa pozo p'oo beedade. 7 Jõdee awaraa hebreorãa Jordán to sîajida wãdait'ee Gad ëreerã eujãdee mãik'aapa Galaad eujãdee. Mamîda Saúl at'ãri Guilgalde baji. Soldaorã iru ome p'anadap'edaarã jõmaweda ãchobeepa k'ap'ùa wëre jõnajida. 8 Mama k'ãima siete Saulpa nùji, Samuelpa jarada perã ichi mama k'ãima siete nùmerã, ãra pari ùt'aa t'âit'ee. Mamîda ma ewate Samuel Guilgalde pache–e pak'ãri, soldaorã mamãik'aapa erreu wãjida.
9 Saulpa mãga unuk'ãri, ichi ek'ari p'anadap'edaarãmaa nãga jaraji:
—Ne–animalaarã atanadapáde aji. Mùa aba Tachi Ak'õre–it'ee paa jõt'aait'ee mãik'aapa awaraa ne–animalaarã paait'ee, jedek'odait'ee nama p'anùùrã ome.
Mãpai Saulpa ichi juadoopa ma ne–animal peep'eda, Tachi Ak'õre–it'ee paa jõji.
10 Ma ne–animal paa jõ aupak'ãri, Samuel pacheji. Mãpai Saúl uchiaji irumaa saludaade.
11 Mamîda Samuelpa mãgaji:
—¿Sãap'eda pùa ma ne–animal paa jõjima? aji.
Saulpa p'anauji:
—Unuji eperãarã erreu wãda pù pache–e pak'ãri pùa jarada ewate. K'awaji filisteorã Micmade see jõnù chõo chedait'ee. 12 Mapa nãga k'îsiaji: “Ãchi mù ome chõo chedait'ee nama Guilgalde, mùa Tachi Ak'õremaa ùt'aa iidii naaweda.” Maperã mùa ma ne–animal paa jõjida aji.
13 Mãpai Samuelpa mãgaji:
—¡Pùa ne–inaa k'achia pariatua oojida! aji. Pùa oo–e paji pù Ak'õre Waibùa, Tachi Ak'õrepa jaradak'a. Irua oopidak'a ooda paara, pù, pùdeepa uchiadait'eerã paara, israelitaarã rey taarã bak'aji. 14 Mamîda ârá pù ãra rey taarã ba–e pait'eeda aji. Tachi Ak'õrepa eperã ichi t'ãrimaa jùrùit'ee. Mãgùpa iru p'uuru pidaarã ak'ù bapariit'eeda aji, pùa oo k'inia–e pada perã Tachi Ak'õrepa jaradak'a.
15 Samuelpa mãga jarap'eda, Guilgaldeepa uchiaji. Mãpai Saúl ichi soldaorã ome chõode wãjida. Guilgaldeepa uchiadap'eda, wãjida Guibeá p'uurudee; ma p'uuru Benjamín ëreerã eujãde bù. Mama panadak'ãri, Saulpa ichi ome nipadap'edaarã juasiaji. Soldaorã seiscientos paji.
Israelitaarã arma wêe p'anadap'edaa
16 Saúl chi warra Jonatán mãik'aapa soldaorã ãchi eere p'anadap'edaarã p'aneejida Guibeá p'uurude Benjamín ëreerã eujãde. Jõdee filisteorãpa ãchi carpa eebai jira bùjida Micmade. 17 Mãga nùde filisteorã pia chõo k'awaa beerã t'ooda õpeede t'oodap'eda, ãchi p'anadap'edaamãiipa uchiajida chõodait'ee mãik'aapa chîara net'aa jãri atadait'ee. T'ooda abaadepemaarã wãjida Ofradee wãpari ode, Súal eujãdee. 18 Awaraa t'oodadepemaarã wãjida Bet Jorondee mãik'aapa chi apema t'oodadepemaarã wãjida ee jêra bùmaa wãpari ode, Zeboyín eujã jewedaa ik'aawa eujã pania wêe bùde.
19 Israel eujã jõmaade eperã ne–inaa hierrodee oopari wê–e paji, filisteorãpa israelitaarãmaa espada mãik'aapa miasu oopidak'aa pada perã. 20 Maapai israelitaarã wãpachida filisteorã t'ãidee ãchi net'aa metaldee ooda erapide: arado, azadón, chaara, wa jãit'e. 21 Arado wa azadón pari p'aapipachida ocho gramos p'arat'a. Jõdee chaara wa jãit'e pari p'aapipachida p'arat'a gramo k'îmari. 22 Maperã ma ewate chõode uchiadak'ãri, soldaorã Saúl ome mãik'aapa Jonatán ome nipadap'edaarãpa miasu wa espada wêe nipajida. Saulpa mãik'aapa Jonatanpapai iru p'anajida.
23 Mãga nùde filisteorã soldaorã ûk'uru p'anajida Micmás k'ait'a ee jêra bùmãi, mama wãyaapari o jâadait'ee.