Jonatanpa filisteorã soldaorã peeda
14
1 Ewari aba Saúl warra Jonatanpa mãgaji ichi escudo anipaparimaa:—Chepáde aji. To chak'e sîadait'ee filisteorã soldaorã p'anapata k'îraik'a eere bairã.
Mamîda Jonatanpa chi ak'õremaa maarepida jara–e paji. 2 Mãga nùde Saúl baji Guibeá p'uuru k'idaa, nejõ bùùrù ek'ari Migronde. Mama baji soldaorã seiscientos ome. 3 Ma soldaorã ome p'aare Abías baji. Irua efod jâ nipapachi. Iru Ajitob warra paji. Finés warra Icabod chi chîapa paji mãik'aapa Siló p'uurudepema p'aare pada Elí chi ak'õchona paji.
Mama p'anadap'edaarã apidaapa Jonatán wãda k'awada–e p'anajida. 4 Mãùmisa iru isapai pana k'inia baji filisteorã soldaorã p'anadap'edaamãi. Mama panait'ee wãyaapachida ee k'õot'ari jira bù omé esa–auk'a. Ma ee k'õot'ari aba t'âjarapachida Bosés, chi apema Sene. 5 Aba norte eere baji Micmás p'uuru k'îrapite. Chi apema sur eere baji Guibeá p'uuru k'îrapite.
6 Ma wãrutade Jonatanpa ichi escudo anipaparimaa mãgaji:
—Wãdáma aji, jã Tachi Ak'õrede ijãadak'aa beerã soldaorã p'anapatamaa. ¿Tachi Ak'õrepa tachi k'aripai–epaa? Iru–it'ee ne–inaa chaaree wê–e. Mapa tachi k'aripait'ee, chok'ara nida pùjida maa–e pùrã chok'ara–e nida pùjida.
7 Mãpai chi escudo anipaparipa mãgaji:
—Oopáde aji, pùchia k'îsia iru bùk'a. Ne–inaa jõmaade mùa k'aripait'eeda aji.
8 Mãpai Jonatanpa mãgaji:
—Sîadáma aji, ãchi p'anùmaa mãik'aapa ãchimaa tachi unupidáma aji. 9 Ãrapa jararuta pùrã ãchi nùdamerã tachi p'anùmãi, mama tachia nùdait'ee, ãchimaa eede ùt'aa wãdai k'ãyaara. 10 Mamîda jararuta pùrã ãchimaa wãdamerã, eede ùt'aa wãdáma aji, ãrapa mãga jaradak'ãri, jara k'inia bairã Tachi Ak'õrepa ãchi tachimaa p'oyaapiit'ee.
11 Mãgá ãra omé eede ùt'aa wãdade unupijida ma filisteorã soldaorã p'anapatap'edaarãmaa. Mãùrãpa unu atadak'ãri, mãgajida:
—¡Ak'àtù! Hebreorã uchia wãrutada ajida, ãchi miru p'anadap'edaa mãu tedeepa.
12 Mãpai madepema soldaorãpa biajida Jonatanmaa mãik'aapa chi escudo anipaparimaa:
—Chétù taimaa. Parãmaa ne–inaa ak'ùpidait'eeda ajida.
Mãpai Jonatanpa chi escudo anipaparimaa mãgaji:
—Mù t'êe chéji. Tachi Ak'õrepa ãchi tachi israelitaarã juade baaipiit'eeda aji.
13 Mãpai Jonatán ma eede ùt'aa juapa jita wãji. Chi escudo anipapari iru t'êe wãji. Mãgá Jonatán ma filisteorã ome unuk'ãri, ichia ãra eujãde baaipipachi. Mãpai chi escudo anipaparipa peet'aapachi. 14 Ma chõodap'edaade Jonatanpa mãik'aapa chi escudo anipaparipa veinte filisteorã peek'oojida, eujã ma–ãriide.
Israelitaarãpa filisteorã soldaorã jërek'oodap'edaa
15 Mãga unudak'ãri, filisteorã soldaorã arii p'anadap'edaarã, ãchi p'anapatap'edaamãi jâapataarã mãik'aapa chi chîara net'aa jãri nipapatap'edaarã paara auk'a p'erak'oodachida. Ma ewate auk'a awêrachai wãyaaji. Mapa audupùara p'erajida.
16 Guibeá p'uuru k'idaa Benjamín ëreerã eujãde Saúl eere p'anadap'edaa soldaorã jâapatap'edaarãpa unudak'ãri filisteorã soldaorã pariatua p'ira erreu wãda, Saulmaa jara pëijida.
17 Mãpai Saulpa mãgaji chi soldaorã poro waibùarã, ichi k'õp'ãya nipadap'edaarãmaa:
—Soldaorã juasiadapáde aji, k'awaadait'ee k'aita falta bù tachi eere p'anùdepema.
Mãga oodak'ãri, k'awaajida Jonatán mãik'aapa ichi escudo anipapari wê–e.
18 Ma ewate p'aare Ahías ãchi ome bada perã, Saulpa irumaa mãgaji:
—Tachi Ak'õre baaltek'a bùa namaa aneepáde aji.
Mãga jaraji ma ewate Tachi Ak'õre baaltek'a bù anipadap'edaa perã.
19 Mamîda Saúl ma p'aare ome pedeemaa bùde, audupùara biuk'a para beeji filisteorã p'anadap'edaamãi. Mapa Saulpa ma p'aaremaa mãgaji:
—Aneenaapáde aji.
20 Aramata Saulpa ichi soldaorã chip'e atap'eda, chõode wãjida. Mamîda ma filisteorã audú k'îra k'awa–e pùk'a k'oodaidap'edaa perã, ãchi auk'aarã peek'oo wãpachida. 21 Ma awara hebreorã,b taarãweda filisteorã soldaorã p'anapatap'edaamãi p'anadap'edaarãpa mãga unudak'ãri, wãyaak'oodachida israelitaarã, Saúl mãik'aapa Jonatán ome p'anadap'edaarã eere. 22 Mãpai ma israelitaarã Efraín ëreerã eujãdepema ee jêra bùde mirudaidap'edaarãpa k'awaa atadak'ãri ma filisteorã jîchoo wãda, ichiaba ãra t'êe wãjida chõode. 23 Mãgá chõo wãjida Bet Avén waawí parutamaa. Mãgá ma ewate Tachi Ak'õrepa israelitaarã k'aripaji ma filisteorã p'oyaadamerã.
Saulpa juraada
24 Israelitaarãpa mãgá p'oyaajida mîda, ãchi k'ap'ùa t'ûmaadachida, nek'oda–ee p'anadap'edaa perã Saulpa juraada k'aurepa. Ma ewate tap'edaweda soldaorã jõmaarã taide irua nãga juraaji: “Idi mù k'îra unuamaa iru p'anapataarã p'oyaadai naaweda, apida nek'oru pùrã, k'achiade baaiit'eeda” aji. Maperã apida nek'oda–e paji. 25 Maap'eda ma soldaorã pak'uru jêra bùde t'îudak'ãri, eujãde jùrrù miéle unu atajida. 26 Jùrrù miéle waibùa baji mîda, apidaapa seneda–e paji, waawee p'anadap'edaa perã Saulpa juraada k'aurepa. 27 Mamîda Jonatanpa k'awa–e baji chi ak'õrepa juraada soldaorã taide. Mapa ma pak'uru jêra bùde wãyaa wãde, ma jùrrù miéle unu atak'ãri, ichi juade anipada pak'uru k'âpa ma jùrrù mielede sut'aaji mãik'aapa senet'aaji. Mãpai aweda juatauradachi.
28 Mamîda mama bada soldaopa mãga unuk'ãri, jaraji:
—Soldaorã taide pù ak'õrepa nãga juraaji: “Idi apida nek'oru pùrã, k'achiade baaiit'eeda” aji. Maperã na soldaorã audú k'ap'ùa t'ûmaa p'anù.
29 Mãpai Jonatanpa mãgaji:
—Mù ak'õrepa mãga jarak'ãri, tachi p'uuru pidaarãmaa ne–inaa k'achia oojida aji. Pùchá ak'àji. Na jùrrù miéle ma–ãri senep'eda, mù juataura beeji. 30 Jõmaarãpa chik'o jãri atadap'edaa filisteorã juadeepa k'odap'edaa paara, ¡ãra jõmaweda p'oyaak'ajidada! aji.
31 Ma ewate israelitaarãpa ma filisteorã peek'oo wãjida Micmadeepa Ayalón parutamaa. Mamîda maap'eda israelitaarã soldaorã audú k'ap'ùa t'ûmaa p'aneejida. 32 Maperã ma filisteorã net'aa jãri atadap'edaadepema ûk'uru ovejaarã, p'ak'aarã mãik'aapa p'ak'a chak'eerã eujãde peejida ãchia unu atadap'edaamãi. Maap'eda ma nechiara waasoo õk'oo k'ojida, audú jarrapisia p'anadap'edaa perã. 33 Mãga unudak'ãri, awaraa soldaorãpa Saulmaa nepùrùnajida:
—Tachi Ak'õre k'îrapite soldaorãpa p'ek'au k'achia oomaa p'anùda ajida, nechiara õk'oo k'omaa p'anadairã.
Mãpai Saulpa mãgaji:
—Wåtù eperãarã ome pedeede mãik'aapa jarátù ãchi p'ak'a wa oveja aneedamerã. Nama otau t'ùap'edai chi waa uchiamerã mãik'aapa chi chiara k'odai. Mãgá Tachi Ak'õre k'îrapite waa p'ek'au k'achia ooda–e pait'ee nechiara waa ome k'o p'anù k'aurepa.
Ma p'ãrik'uaweda ma eperã chaachaa ichia p'ak'a iru bada aneejida mãik'aapa mama chi otau t'ùap'ejida. 35 Mãgá Saulpa Tachi Ak'õre–it'ee ma mãudee altar ooji. Ma altar ichia naapùara ooda paji.
36 Ma t'êepai Saulpa ichi soldaorãmaa mãgaji:
—Na p'ãrik'ua wãdáma filisteorã jõk'oode mãik'aapa ãchi ne–inaa jõmaweda jãri ata wãdáma ewarirumaa. Jõmaweda peek'oodáma aji.
Ãchia p'anaujida:
—Pùchia oo k'inia bùk'a oopáde ajida.
Mamîda p'aarepa mãgaji:
—Naapùara Tachi Ak'õremaa ùt'aa iididáma aji.
37 Mãpai Saulpa Tachi Ak'õremaa ùt'aa iidiji:
—¿Filisteorã t'êe wãdaipia bùk'ã aji, wa mãga–e? ¿Pùa tai israelitaarãmaa p'oyaapiit'eek'ã? aji.
—Soldaorã poro waibùarã jõmaweda namaa chétù. Iidi wãdapáde aji, k'awaadait'ee idi k'ãare p'ek'au k'achiata oojida. 39 ¡Tachi Ak'õre, israelitaarã k'aripapari k'îrapite mùa juraa bù, chi ma p'ek'au k'achia ooda piuit'ee, mù warra Jonatán pùjida!
Ma soldaorã poro waibùarãdepema apidaapa p'anauda–e paji. 40 Mapa Saulpa mãgaji israelitaarã soldaorã jõmaarãmaa:
—Na eere ak'ùnâ p'ana chedapáde aji, mãik'aapa parã k'îrapite mù, mù warra Jonatán ome ak'ùnâ p'aneedait'ee.
Ma soldaorãpa p'anaujida:
—Pùchia k'îsia bùk'a oopáde ajida.
41 Mãpai Saulpa nãga ùt'aa t'âji:
—Israelitaarã Ak'õre Waibùa, ¿sãap'eda mùa ùt'aa iidida p'anau–e pajima? Mùa wa mù warra Jonatanpa ne–inaa ooda k'aurepa pùrã, suerte jemenedak'ãri, Urim uchiapíji. Jõdee israelitaarãpa ne–inaa oodap'edaa k'aurepa pùrã, suerte jemenedak'ãri, Tumim uchiapipáde aji.c
Mãpai suerte jemenedak'ãri, Jonatán Saúl ome uchiaji. Ma soldaorã k'aurepa–e paji.
42 Mãpai Saulpa mãgaji:
—Suerte jemenétù k'awaadait'ee mù k'aurepa wa Jonatán k'aurepa.
Mãga oodak'ãri, Jonatán uchiaji.
43 Mãpai Saulpa Jonatanmaa iidiji:
—¿K'ãata oojima? aji. Jarapáde aji.
Mãpai Jonatanpa jaraji:
—Wãara mùa jùrrù miéle ma–ãri seneji mùa pak'uru anipada k'âde. ¿Ma k'aurépata mù piuipia bùk'ã? aji. Mãga pùrã, mù nama bùda aji, waawee–e bù piuit'ee.
44 Mãpai Saulpa mãgaji:
—¡Jonatán, pù piu–e pùrã, Tachi Ak'õrepa mùmaa k'achia ooipia bùda aji, mù chupùria k'awa–ee!
45 Mamîda israelitaarãpa mãgajida:
—¿Sãga Jonatán piuyama? ajida. ¡Iru k'aurepa tachi israelitaarãpa filisteorã p'oyaajida! ¡Iru piu–eda! ajida. ¡Tachi Ak'õre ichita chok'ai bù k'îrapite taipa juraa p'anù, iru porodeepa puda apida baai–e pait'ee! Irua ooda idi Tachi Ak'õre juapa oojida ajida.
Mãga jaradap'edaa k'aurepa Saulpa Jonatán peepi–e paji. 46 Ichiaba maapai Saulpa filisteorã waa jùrù–e paji. Mapa filisteorã ãchi eujãdee erreu wãjida.
Saúl rey bùde israelitaarã chõodap'edaa
47 Mãgá Saúl israelitaarã poro waibùa beeji. Chõopachida ãchi k'îra unuamaa iru p'anadap'edaarã; moabitaarã ome, amonitaarã ome, edomitaarã ome, Sobá p'uurudepema reyrã ome mãik'aapa filisteorã ome. Ma chõode wãdap'edaa chaa p'oyaapachida. 48 Ichiaba Saulpa ichi soldaorã ome chip'edaip'eda, amalecitaarã p'oyaajida. Mãgá ma nechùayaa beerã israelitaarã eujãdeepa jërek'oojida.
Sauldeerã
49 Saúl warrarã t'âjarapachida Jonatán, Isvíd mãik'aapa Malquisúa. Chi naapema k'au t'âjarapachida Merab; chi t'êepema Mical. 50 Saúl wêra t'âjarapachida Ajinoán. Mãgà Ajimaz k'au paji. Saúl soldaorã poro waibùa t'âjarapachida Abner. Mãgà Saúl chîapa Ner warra paji. 51 Saúl ak'õre Quis mãik'aapa chi chîapa Ner ak'õre Abiel paji.
52 Saúl chok'ai bak'ãri, taarã jura chõopachida filisteorã ome. Maperã Saulpa soldaorã juataura, sõcharra beerã ichita jùrùpachi ichi ome nipapataadamerã.