Israelitaarã amalecitaarã ome chõodap'edaa
15
1 Ewari aba Samuelpa Saulmaa nãga jaraji:—Tachi Ak'õrepa mù pëiji pù rey bùmerã ichi p'uuru pidaarã, israelitaarã t'ãide. Mapa ûríji Tachi Ak'õrepa pùmaa jara k'inia bù. 2 Jõmaarã Ak'õre Waibùapa nãga jara bù: “Mùa amalecitaarã k'achia ooit'eeda a bù, ãchia jaradap'edaa perã israelitaarã ãchi eujãde wãyaanaadamerã, Egipto eujãdeepa uchiadak'ãri. 3 Maperã wåji ãchi ome chõode. Jõmaweda jõt'áatù, ãchi net'aa ome. Chupùria k'awaanáatù. Peek'óotù ùmùk'îraarã, wêraarã, warrarã, ewaa t'o beerã paara. Ichiaba ãchi oveja, p'ak'a, camello mãik'aapa burro jõmaweda peek'oodapáde” aji.
4 Mãpai Saulpa Israeldepema chõo k'awaa beerã t'â pëiji. Telayin p'uurude chip'epip'eda, juasiaji. Doscientos mil ùmùk'îraarã jîte wãpataarã paji. Ma awara Judá ëreerã eujãdepema soldaorã diez mil paji. 5 Ma soldaorã ome Saúl wãji amalecitaarã p'uuru waibùamaa. Ma p'uuru k'ait'a to chak'e badamãi miru p'aneejida.
6 Mama p'anùde Saulpa nãga jara pëiji quenitaarã, amalecitaarã t'ãide p'anapatap'edaarãmaa: “¡Ãyaa wãdapáde aji, amalecitaarã ik'aawaapa! Maa–e pùrã parã auk'a ãra ome jõdait'ee. Taipa parã chupùria k'awaadait'ee, parã auk'aarãpa tai chonaarã k'aripadap'edaa perã Egipto eujãdeepa uchiadak'ãri.”
Mãga ûridak'ãri, ma quenitaarã ãyaa wãjida amalecitaarã t'ãideepa. 7 Mãpai Saúl mãik'aapa ichi soldaorã amalecitaarã ome chõonajida Javilá eujãdeepa Sur eujã parumaa. Mãgà Egipto eujã oriente eere bù. Saúl eere p'anadap'edaarãpa mãùrã p'oyaajida. 8 Ma amalecitaarã rey Agag jita atajida. Mamîda awaraa amalecitaarã jõmaweda espadapa peek'oojida. 9 Agag peeda–e paji. Ma awara ovejaarã piara bee, p'ak'aarã piara bee, oveja chak'eerã mãik'aapa p'ak'a chak'eerã poreera bee peeda–e paji. Ichiaba net'aa piara bee jõt'aada–e paji. Mamîda ne–animalaarã mãik'aapa net'aa servi–ee bee jõt'aajida.
Tachi Ak'õrepa Saúl yiaraa iru bada
10 Ma t'êepai Tachi Ak'õrepa Samuelmaa nãga jaraji:
11 —Párita Saúl rey bùjik'ate aji, mùde ijãa amaa beeda perã mãik'aapa mùa jaradak'a ooamaa beeda perã.
Samuelpa mãga ûrik'ãri, t'ãri ãriidachi mãik'aapa k'ãi–ee ewariji ùt'aa iidimaa. 12 Tap'edaweda Samuel Saulmaa wãit'ee paji. Mamîda wãi naaweda, irumaa nãga nepùrù chejida: “Saúl wãji Carmel p'uurudee mãu choma bùde, ichia chõo p'oyaada k'irãpadamerã. Mamãik'aapa iru wãjida ajida, Guilgaldee.”
13 Mapa Samuel Saúl badamaa wãji. Saulpa iru unuk'ãri, mãgaji:
—Mùa k'inia bù Tachi Ak'õrepa pù bendiciamerã. Irua jaradak'a mùa oojida aji.
14 Samuelpa p'anauji:
—Mãgara ¿k'ãata jara k'inia bùma aji, ovejaarã mãik'aapa p'ak'aarã biapi mùa ûri bù?
15 Saulpa p'anauji:
—Soldaorãpa amalecitaarã eujãdeepa aneejida. Ovejaarã mãik'aapa p'ak'aarã pipùara bee chok'ai ata bùjida, Tachi Ak'õre, pù Ak'õre Waibùa–it'ee paapidait'ee. Mamîda apemaarã peek'oojidada aji.
16 Mãpai Samuelpa mãgaji:
—¡K'îup'ee béeji! Mùa nepùrùit'eeda aji, Tachi Ak'õrepa mùmaa k'awapida p'ãrik'ua.
Saulpa mãgaji:
—Jarapáde aji.
17 Mãpai Samuelpa mãgaji:
—¿Wãara–ek'ã, aji, pù–it'ee pù awaraarã k'ãyaara ek'ariara baji mîda, Tachi Ak'õrepa israelitaarã ëreerã chaa pù jua ek'ari bùji mãik'aapa pù awara bùji ãchi rey pamerã? 18 Irua jaraji jã amalecitaarã p'ek'au k'achia ooyaa beerã jõt'aadamerã. 19 ¿Sãap'eda irua jaradak'a oo–e pajima? Ma k'ãyaara ãchi ne–animalaarã, net'aa paara p'e wãjida. Mãga oodak'ãri, Tachi Ak'õre k'îrapite ne–inaa k'achia oojidada aji.
20 Mãpai Saulpa p'anauji:
—Mùa oojida aji, Tachi Ak'õrepa jaradak'a. Amalecitaarã peek'ooji. Jîp'a ãchi rey Agag chok'ai bëiji. 21 Jõdee mù soldaorãpa jã ovejaarã, p'ak'aarã mãik'aapa net'aa pipùara bee atajidada aji, Guilgalde panadak'ãri, Tachi Ak'õre, pù Ak'õre Waibùa–it'ee paapidait'ee.
22 Mãpai Samuelpa mãgaji:
—Tachi Ak'õrepa audupùara k'inia bapari eperãarãpa oodamerã ichia jara bùk'a, ichi–it'ee ne–animalaarã paa jõpidai k'ãyaara. Piara bù oodait'ee irua jara bùk'a ovejaarã traa paadai k'ãyaara. 23 Chi oo–e bùpa irua jara bùk'a p'ek'au k'achia oomaa bù. Nãgee p'ek'au oopataaråk'ata bù: ne–inaa oopataarã k'awaadait'ee ne–inaa p'asait'ee bù; ichi k'inia ne–inaa k'achia oopataarã mãik'aapa ne–inaa juapa ooda k'îrapite ùt'aa t'âpataarã. Irua jara bùk'a pùa oo–e bairã, irua waa k'inia–e bù pù rey bamerã.
24 Mãpai Saulpa mãgaji:
—Wãara, mùa p'ek'au k'achia oojida aji. Tachi Ak'õrepa jaradak'a mãik'aapa pùa jaradak'a oo–e paji, mùa soldaorã waawee bada perã. 25 Ârá mùa chupùria iidi bù pùa perdonaamerã mùa p'ek'au k'achia ooda. Mù ome chepáde aji, Tachi Ak'õremaa ùt'aa t'âde.
26 Mãpai Samuelpa mãgaji:
—Mù pù ome wã–eda aji. Pùa Tachi Ak'õrepa jaradak'a oo–e pada perã, irua pù waa k'inia–e bù israelitaarã rey bamerã.
27 Samuel p'ùrrabaik'ãri wãit'ee, Saulpa iru ârùpema p'aru i jita ataji. Mãgá jitarude iru p'aru i jêdachi.
28 Mãpai Samuelpa Saulmaa mãgaji:
—Nãga pùk'a idiweda Tachi Ak'õrepa pù rey mimia jãri atajida aji, teeit'ee awaraa israelita, pù k'ãyaara pipùara bùmaa. 29 Tachi Ak'õre, israelitaarã Ak'õre Waibùa ichita baparipa seewa jarak'aa mãik'aapa ne–inaa ooit'eeda ak'ãri, mãga oopari. Iru eperãk'a bù–epù ne–inaa ooit'eeda ap'eda, oo–e pait'ee.
30 Mãpai Saulpa waya mãgaji:
—Wãara mùa p'ek'au k'achia oojida aji. Mamîda mùa pùmaa chupùria enenee nâbù israelitaarã poro waibùarã k'îrapite mù k'îra nejasiapinaamerã. Mù ome chepáde aji, israelitaarã k'îrapite Tachi Ak'õremaa ùt'aa t'âde.
31 Mãgá Samuel Saúl ome ãpùtee cheji. Mãpai Saúl Tachi Ak'õremaa ùt'aa t'âji.
32 Maap'eda Samuelpa mãgaji:
—Amalecitaarã rey Agag aneedapáde aji.
Agag k'ãiwee cheji Samuel k'îrapite, k'îsia bada perã ichi piu k'achia piu–e pait'ee.
33 Mamîda Samuelpa Agagmaa nãga jaraji:
—Pùa wêraarã chok'ara warra wêe p'anapiji, pù espadapa ãra warrarã peek'ãri. Ârá auk'a pù nawe warra wêe beeit'eeda aji.
Mãpai Samuelpa peet'aaji mãik'aapa chi k'ap'ùa t'ùap'ek'ooji. Mãga ooji Guilgalde Tachi Ak'õre k'îrapite.