Tachi Ak'õrepa David israelitaarã rey bùda
16
1 T'êepai Tachi Ak'õrepa Samuelmaa nãga jaraji:—¿Sãapai pù waa jêe–e pait'eema aji, Saúl pari? Mùa iru yiaraa iru bù, waa k'inia–e bairã iru rey bamerã. Ne–animal cachode aceite t'ù bùp'eda, wåji Belén p'uurudepema Isaía temaa. Mùa ichi warra aba jùrùt'erajida aji, israelitaarã rey pamerã.
2 Samuelpa p'anauji:
—Mù, ¿sãga wãyama? aji. ¡Saulpa k'awaa ataru pùrã, mù peet'aayada! aji.
Mãpai Tachi Ak'õrepa p'anauji:
—P'ak'a chak'e atéeji, mãik'aapa nãga jaráji: “Tachi Ak'õre–it'ee paade cheji.” 3 Ma awara jara pïiji Isaí chemerã ma p'ak'a chak'e paak'ãri. Iru chek'ãri, mùa jarait'ee pùa k'ãata ooipia bù. Aceite weeipia bù eperã mùa ak'ùpiru ârù. Mãgá iru awara bùpáde aji.
4 Samuelpa ooji Tachi Ak'õrepa jaradak'a. Belén p'uurude panak'ãri, p'uuru pidaarã poro waibùarã waaweede irumaa chejida mãik'aapa nãga iidijida:
—¿Nepùra wêe cheruk'ã? ajida.
5 Samuelpa p'anauji:
—Nepùra wêe cheruda aji. Tachi Ak'õre–it'ee ne–animal paade cheruda aji. Óotù Tachi Ak'õre k'ait'a wãdait'ee pak'ãri oopatak'a mãik'aapa mù ome chétù na p'ak'a chak'e paade.
Samuelpa Isaí chi warrarã ome ununak'ãri, ooji Tachi Ak'õrepa oopiparik'a ichi k'ait'a wãdamerã mãik'aapa jaraji wãdamerã ma p'ak'a chak'e paaruta ak'ùde. 6 Ãchi pachedak'ãri mãik'aapa Samuelpa Isaí warra naapema t'âjarapata Eliab unuk'ãri, k'îsiaji: “¿Nãgù–ek'ã aji, Tachi Ak'õrepa jùrùt'erada rey pamerã?”
7 Mamîda Tachi Ak'õrepa Samuelmaa mãgaji:
—Jã iru–e. Ak'ùnáaji chi k'îra wa chi ùt'ùa. Eperãarãpa eperã k'ap'ùa ak'ùpata k'awadait'ee pia wa k'achia. Mamîda mùa eperã t'ãrita ak'ùparida aji.
8 Mãpai Isaipa chi warra Abinadab t'â ataji mãik'aapa Samuelmaa ak'ùpiji.
Mamîda Samuelpa mãgaji:
—Nãgà ichiaba Tachi Ak'õrepa jùrùt'era–e pajida aji.
9 Maap'eda Isaipa chi warra Sama ak'ùpiji.
Mamîda Samuelpa mãgaji:
—Nãgà ichiaba Tachi Ak'õrepa jùrùt'era–e pajida aji.
10 Mãgá Isaipa chi warrarã siete Samuelmaa ak'ùpiji.
Mamîda Samuelpa irumaa mãgaji:
—Madepema apida Tachi Ak'õrepa jùrùt'era–e pajida aji.
11 Mãpai Samuelpa Isaimaa iidiji:
—¿Pùa warra waa wêe bùk'ã? aji.
Isaipa p'anauji:
—Chi k'ûtrãara bù wê–eda aji. Irua ovejaarã ak'ùmaa bùda aji.
Samuelpa mãgaji:
—T'â pëipáde aji. Iru che–emaa na p'ak'a chak'e peedap'eda, paada–e mãik'aapa su–ak'ù p'aneeda–eda aji, madepema nechiara jedek'odait'ee.
12 Mãpai Isaipa t'â pëiji. Mãgá ma k'ûtrãa cheji. Iru k'îra wãree baji; chi tau pi–ia baji mãik'aapa k'ap'ùa pia baji.
Mãpai Tachi Ak'õrepa Samuelmaa mãgaji:
—Nãgùda aji. Iru awara bùpáde aji, israelitaarã rey pamerã.
13 Aramãgá Samuelpa ne–animal cachode aceite iru bada ataji mãik'aapa weet'aaji ma k'ûtrãa poro ârù chi âpemaarã taide. Ma k'ûtrãa t'âjarapachida David. Mãgaweda Tachi Ak'õre Jaure David ome ba cheji. Ma t'êepai Samuel ãpùtee wãji Ramadee.
David Saúl jua ek'ari mimiapariida
14 Maapai Tachi Ak'õre Jaure Saúl ik'aawaapa uchiaji. Ma pari Tachi Ak'õrepa jaure k'achia pëiji. Ma jaure k'achiapa Saúl k'ãiwee bapik'aa paji. 15 Mapa Saúl mimiapataarãpa mãgajida:
—Tachi Poro Waibùa, jaure k'achia Tachi Ak'õrepa pëida pù k'ãiwee bapik'aada ajida. 16 Pù nãgá chupùria bairã, tai pïiji arpa chaa k'awaa bù jùrùde. Ma jaure k'achiapa pù joree chek'ãri, irua arpa chaai. Mãga chaak'ãri, pù k'ãiwee beeyada ajida.
17 Saulpa p'anauji:
—Mãgara jùrùnátù eperã arpa pia chaa k'awaa bù mãik'aapa aneedapáde aji.
18 Mãpai mimiapari abaapa mãgaji:
—Mùa unudooda aji, Belendepema Isaí warrapa arpa pia chaapari. Mãgà k'ûtrãa sõcharra mãik'aapa chõo k'awaa bapari. K'îsia k'awaa pedeepari, k'îra wãree bapari mãik'aapa Tachi Ak'õre iru ome bapari.
19 Mãpai Saulpa Isaimaa nãga jara pëiji: “Mùmaa pïiji pù warra David, chi ovejaarã ak'ùpari.” 20 Mãpai Isaipa chi warra David Saulmaa pëiji. Iru ome Saul–it'ee tee pëiji pan bulto burro ârù, chivo chak'e mãik'aapa vino ne–ede t'ùda. 21 David panak'ãri, Saúl jua ek'ari mimiamaa beeji. Saulpa iru k'inia iru bapachi. Mapa iru bùji ichi arma anipapariimerã. 22 Ma t'êepai Saulpa Isaimaa nãga jara pëiji: “Mùa k'inia bù pù warra David mù jua ek'ari mimia beemerã, mùa iru pia ak'ù bairã.” 23 Mãgá David beeji. Ma jaure k'achia Tachi Ak'õrepa pëidapa Saúl joree chek'ãri, Davidpa ichi arpa chaapachi. Mãga ook'ãri, Saúl t'ãri o–î–îa mãik'aapa k'ãiwee beepachi. Ma awara ma jaure k'achia iru ik'aawaapa ãyaa wãpachi.