Filisteadepema gigantepa israelitaarã oo iru bada
17
1 Maapai filisteorãpa ãchi soldaorã t'â pëijida jura chõodait'ee israelitaarã ome. Chip'ejida Judá ëreerãdepemaarã p'uuru Socode chõodait'ee mãik'aapa ãchi carpa eebai jira bùjida Efesdaminde, Soco, Azeca esajîak'a. 2 Mãùmisa Saulpa israelitaarã chip'e atap'eda, ãchi carpa eebai jira bùjida Elá eujã jewedaade. Mama erk'a para baji chõode uchiadait'ee ma filisteorã ome. 3 Ma filisteorã eera jêra bùmãi p'ananajida ma eujã jewedaa ide. Jõdee israelitaarã k'îraik'a eere p'ananajida eera jêra bùmãi.4 Mãga nùde filisteorã p'anadap'edaamãiipa Gat p'uurudepema chõo k'awaa bù, t'âjarapatap'edaa Goliat uchiaji. Mãgà ùt'ùa metro õpee baji. 5 Casco broncedee ooda jâ baji mãik'aapa ârùpema p'aru broncedee ooda jâ baji. Ma bronce chùk'ùa cincuenta y cinco kilo baji. 6 Ichiaba ichi jîrude ne–inaa broncedee ooda jâ baji. Ma awara jabalina broncedee ooda ik'iade anipaji. 7 Ichi miasu nêchoma baji, israelitaarã p'aru k'aparidepema pak'uruk'a. Chi k'â hierrodee ooda paji; chi chùk'ùa perá siete kilo baji. Mãgà chõo k'awaa bù nok'oore chi escudo anipapari wã nipaji.
8 Goliat israelitaarã soldaorã k'îrapite ak'ùnâ beep'eda, nãga biaji:
—¿Sãap'eda parã chõodait'eek'a erk'a nâbùma? aji. Mù filisteopù. Jõdee parã Saúl jua ek'ari p'anapataarã. Soldao aba jùrùt'erátù mù ome chõode chemerã. 9 Mù ome p'oyaa chõoru pùrã mãik'aapa mù peeru pùrã, tai parã esclavo p'aneedai. Mamîda mùa iru p'oyaap'eda, peet'aaru pùrã, parã tai esclavo p'aneedait'ee mãik'aapa tai–it'ee mimiapataadait'ee. 10 Idi mùa nãga jara bù Israeldepema soldaorãmaa: ¡Parã t'ãide ùmùk'îraarã paraa pùrã, aba pïitù mù ome chõomerã!
11 Saulpa mãik'aapa ma israelitaarã jõmaarãpa ma pedee ûridak'ãri, k'îra pia–ee p'aneejida mãik'aapa ãchobeedachida.
David Saúl badamãi panada
12 Maapai Saúl at'ãri rey bùde Belén p'uurudepema Isaí chonaa baji. Iru efrateo paji mãik'aapa warrarã ocho iru baji. Mãùrãdepema aba David paji. 13 Isaí warra naapemaarã õpee Saúl ome ma jura chõode nipajida. Chi naapema t'âjarapachida Eliab; aù eerepema Abinadab, aù eerepema Sama. 14 Mãùrã naapemaarã perã, Saúl ome nipapachida. David chi âpemaarã jõmaarã t'êepema paji mîda, 15 wãpachi Saúl badamaa mãik'aapa chepachi Belén p'uurudee chi ak'õre ovejaarã ak'ùde.
16 Mãgà filisteo tap'eda mãik'aapa k'ewara uchiapachi israelitaarã soldaorã ome chõo jùrùde. Mãga oopachi k'ãima cuarenta wãyaaru misa.
17 Mãga bùde ewari aba Isaipa chi warra Davidmaa mãgaji:
—Na trigo paada efaa aba na pan diez ome pù âpemaarãmaa ateepáde aji. 18 Ichiaba ãchi poro waibùa–it'ee na queso diez atéeji. Pù âpemaarã ak'ùp'eda, ãpùtee chek'ãri, mù–it'ee ne–inaa aneepáde aji. Mãgá mùa k'await'ee ãra k'ap'ùa pia p'anù.
19 Maapai Saúl mãik'aapa David âpemaarã, awaraa israelitaarã paara, eujã jewedaa Elade filisteorã ome chõomaa p'anajida.
20 Aù norema tap'edaweda Davidpa ooji chi ak'õrepa jaradak'a. Eperã awaraamaa ichi ovejaarã jâapip'eda, iru wãji Isaipa net'aa teeda ome. Panak'ãri soldaorã p'anadap'edaamaa, unuji soldaorã bia jõnù chõode uchiadait'ee. 21 Filisteorã israelitaarã k'îrapite erk'a ak'ùnâ p'anajida chõodait'ee. 22 Davidpa ichia ne–inaa aneeda soldao ne–inaa ùapari ome atabëip'eda, p'iraji soldaorã erk'a ak'ùnâ p'anadap'edaamaa chi âpemaarã saludaade. 23 Ãra ome pedee bù misa, filisteorã p'uuru Gatdepema chõo k'awaa bù Goliat uchiaji ma filisteorã t'ãideepa. Ichia jarapariidak'a jaraji israelitaarãdepema aba ichi ome chõode chemerã mãik'aapa ichi pedeepa chõo jùrù beeji. Mãga jarada Davidpa ûriji. 24 Israelitaarãpa mãgà chõo k'awa bù unudak'ãri, ãpùtee p'irajida p'era jõnùpa. 25 Mãpai nãga pedee para beeji: “¿Jãgà eperã unu p'anùk'ã? ajida. ¡Israelitaarã ome chõode cheruda! ajida. ¿K'aipa iru p'oyaaima? Abaapa iru p'oyaaru pùrã, tachi reypa p'arat'a waibùa teei, mãik'aapa chi k'au teei aù ome miak'ãimerã. Ma awara ma eperã te pidaarãmaa reypa impuesto waa p'aapi–eda” ajida.
26 Mãpai Davidpa nãga jaraji soldaorã ichi k'ait'aara p'anadap'edaarãmaa:
—Chi jãgà filisteo peerupa ne–inaa pia ooit'ee tachi israelitaarã–it'ee, jãgà ijãak'aa bùpa Tachi Ak'õre, chi ichita chok'ai bù ome chõo jùrù bairã, tachi p'uuru pidaarã auk'a. Eperãpa jãgà filisteo peeru pùrã, ¿ma eperãmaa k'ãata teedayama a p'anùma? aji.
27 Ma soldaorãpa auk'a p'anaujida apemaarãpa aù naaweda jaradap'edaak'a. Chi Goliat peerumaa reypa ma ne–inaa teeit'eeda ajida.
28 Mamîda David âpema naapema Eliabpa David ma soldaorã ome pedeemaa bù ûrik'ãri, k'îraudachi mãik'aapa iidiji:
—¿K'ãare–it'ee pù nama chejima? aji. ¿K'ai ome bëijima pùchi ovejaarã chok'ara–e p'anù jã eujã pania wêe bùde? Mùa k'awa bù pùa k'îsia k'achia k'îsia bù. Audua bapari perã ¿chõo ak'ùde cheji–ek'ã? aji.
29 Davidpa p'anauji:
—¿Mùa k'ãata oojima aji, pù k'îraudaimerã? Jîp'a iidi bajida aji.
30 Mãpai chi âpema ik'aawaapa ãyaa wãji mãik'aapa reypa jarada awaraarãmaa iidi wãji. Ãrapa auk'a p'anaujida. 31 Soldaorã ûk'uruurãpa ûridak'ãri Davidpa iidi wãda, Saulmaa jaranajida. Mapa Saulpa t'â pëiji. 32 Saúl k'îrapite Davidpa mãgaji:
—Rey Waibùa, israelitaarã p'eradaik'araa bùda aji, jã filisteo k'aurepa. Mù, pù mimiapari, jãgà ome chõode wãit'eeda aji.
33 Saulpa p'anauji:
—Pù k'ûtrãa bairã, pù ituaba jã filisteo ome p'oyaa chõo–eda aji. Jãgà ma–ãriweda chõoparida aji.
34 Mãpai Davidpa mãgaji:
—Rey Waibùa, mù, pù mimiaparipa mù ak'õre ovejaarã ak'ù bak'ãri, edaare león wa oso uchiaji oveja jita atait'ee mãik'aapa k'oit'ee. 35 Mãga bùde mù ma ne–animal t'êe wãp'eda, golpe teepachi, chi it'aideepa oveja jãri atarumaa. Ma ne–animalpa mùmaa orra chek'ãri, chi otaude jita atap'eda, golpe teepachi peet'aarumaa. 36 Mù, pù mimiaparipa león mãik'aapa oso mãgá peedoo. Auk'a mãga ooit'eeda aji, jã filisteo ijãak'aa bù ome. Peet'aait'eeda aji, irua Tachi Ak'õre, chi ichita chok'ai bapari soldaorã oo iru bairã. 37 Tachi Ak'õrepa mù k'aripa ataji león mãik'aapa oso p'isiideepa. Auk'a mù k'aripa atait'eeda aji, jãgà filisteo juadeepa.
Mãpai Saulpa mãgaji:
—Mãgara chõode wåji. Mùa k'inia bùda aji, Tachi Ak'õre pù ome bamerã.
38 Mãpai Saulpa jaraji ichi chõopata p'aru David k'ap'ùade jâ bùdamerã. Mãga oojida mãik'aapa casco broncedee ooda jâ bùjida. Ichiaba chi ârùpema p'aru broncedee ooda jâ bùjida. 39 Maap'eda Davidpa ichi k'ùrrùde espada jâ bùji. Mamîda t'ùa wãk'ãri, pia p'oyaa t'ùa–e paji, aù naaweda mãgee jâk'aa pada perã. Mapa Saulmaa mãgaji:
—Nãgee ome p'oyaa t'ùa–eda aji, mùa nãgee waide jâk'aa perã.
Ma jõma êrat'aap'eda, 40 ichi oveja ak'ùpata pak'uru ataji mãik'aapa mãu k'ak'ayaa joisomaa jùrùnaji to chak'ede. Ma mãu p'e atap'eda, bùji ichi bolso anipapatade mãik'aapa chi hondab juade ateeji. Mãgá Goliatmaa wãji chõode.
Davidpa Goliat p'oyaada
41 Mãga nùde ma filisteo David k'ait'aara cheji piak'ãa. Chi escudo anipapari ichi naa chewãji. 42 Ma filisteopa David pia ak'ùk'ãri, k'awaaji iru k'ûtrãa bù; k'ap'ùa pia, k'îra wãree.
—¿Mù usak'ã aji, jãgá pak'urupa mù ome chõode cheru?
—Chepáde aji, mùa pù k'ap'ùa k'opiit'ee perã ãkosoorãmaa mãik'aapa ne–animal k'achia beerãmaa.
45 Davidpa p'anauji:
—Pù chõo che bù espadapa, miasupa mãik'aapa jabalinapa. Mamîda mù pù ome chõo cheru Jõmaarã Ak'õre Waibùa juapa. Iruta tai israelitaarã soldaorã Ak'õre Waibùa. Pùa iru ome chõo jùrù bairã, irua mù k'aripait'ee. 46 Idi Tachi Ak'õrepa pù mù juade baaipiit'ee. Mùa pù peet'aait'ee mãik'aapa pù poro t'ùap'et'aait'ee. Filisteorã k'ap'ùata ãkosoorãpa mãik'aapa ne–animal k'achia beerãpa k'odait'ee. Mãgá na p'ek'au eujã jõmaade k'awaadait'ee israelitaarã Ak'õre Waibùata jõmaarã k'ãyaara waibùara bù. 47 Nama p'anùùrã jõmaarãpa k'awaadait'ee Tachi Ak'õrepa chõo p'oyaa–e espadapa wa miasupa. Irua júapata chõo p'oyaapari. Mapa irua parã taimaa p'oyaapiit'ee.
48 Mãpai Goliat Davidmaa k'ait'aara cheji. Jõdee David ma filisteomaa p'ira wãji 49 mãik'aapa ichi bolsodeepa mãu êt'a atap'eda, chi hondade bùji. Bat'ak'ãri, ma filisteo tau bùùrùde awa nâbanaji. Mãpai Goliat k'îrapa eujãde baainaji. 50 Mãgá Davidpa ma filisteo p'oyaaji. Hondapa mãu bat'adapapai ma filisteo peet'aaji. Davidpa espada anipa–e paji. 51 Maperã ma filisteomaa p'irap'eda, Goliat espada êt'a ataji mãik'aapa chi otau t'ùap'et'aaji.
Filisteorãpa ãchi chõopari pipùara bù mãgá piu baibù unudak'ãri, ãpùtee p'ira erreudachida. 52 Mãpai Israeldepema mãik'aapa Judadepema soldaorã chõopata bia biadap'eda, ãra t'êe wãjida chõode. Chõo wãjida Filisteadepema p'uuru Gat t'îupatade parutamaa mãik'aapa Ecrón t'îupatade parutamaa. Sajarayin p'uurudeepa Gat mãik'aapa Ecrón parumaa, ma ode filisteorã k'ap'ùa piuda chok'ara paraaji.
53 Mãgá mãùrã t'êe chõo wãdap'eda, israelitaarã ãpùtee chejida ma filisteorã p'anadap'edaamaa ãrapa net'aa atabëidap'edaa p'e atade. 54 Mãpai Davidpa Goliat poro jitaji mãik'aapa t'êepai Jerusalendee ateeji. Mamîda chi arma ùa bùnaji ichi te ne–edee oodade.
55 Ma chõodap'edaa naaweda, Saulpa unuk'ãri David uchiaru ma filisteo chõo k'awa bù ome chõode, ichia iidiji ichi jua ek'ari bada soldaorã poro waibùa Abnermaa:
—Abner, ¿jã k'ûtrãa ak'õre, k'aima? aji.
Abnerpa p'anauji:
—Mùchi Rey Waibùa, juraa bùda aji, mùa k'awa–e bù.
56 Mãpai Saulpa mãgaji:
—Mãgara iidi wãpáde aji, iru k'ai warrata a bù.
57 Mapa David pachek'ãri ma filisteo peep'eda, iru poro t'ùap'eda ome, Abnerpa iru Saulmaa ateeji.
58 Mãpai Saulpa Davidmaa iidiji:
—K'ûtrãa, ¿pù ak'õre, k'aima? aji.
Davidpa p'anauji:
—Mù Belendepema Isaí warra. Mùchi Rey Waibùa, mù ak'õre pù jua ek'ari pia baparida aji.