Jonatán David ome k'õp'ãyo meraada
18
1 David Saúl ome pedeeda t'êepai, Saúl warra Jonatán David ome k'õp'ãyo meraaji. K'inia iru bapachi ichi k'ap'ùa k'inia iru bapariidak'a. 2 Ma ewateweda Saulpa Davidmaa jaraji ichi palaciode ichi–it'ee mimia beemerã. Chi ak'õre temaa pëi–e paji. 3 Jonatanpa David mãgá audú k'inia iru bada perã, iru ome pacto ooji ichita k'õp'ãyo pia p'anadait'ee. 4 Mãga nùde Jonatanpa Davidmaa teeji ichi ârùpema p'aru jâ bada, ichi espada, ematrùma mãik'aapa k'ùrrùde jâpari.5 Maapai Saulpa iru chõode pëik'ãri, Davidpa oopachi irua jaradak'a. Maperã Saulpa David soldaorã poro waibùa papiji. Mãga ook'ãri, soldaorã o–îa p'aneejida, ãchi poro waibùarã paara.
Saulpa David k'îra unuamaa iru beeda
6 Davidpa filisteo peeda t'êepai, israelitaarã soldaorã pachedak'ãri, Israeldepema p'uuru chaa wêraarã uchiajida Saúl k'îrachuude. T'ãri o–îa k'arijida mãik'aapa pëirajida lira, pandereta chaa p'anùde. 7 Mãgá k'ari p'anadak'ãri mãik'aapa pëira p'anadak'ãri, nãga jarapachida: “Saulpa ùmùk'îraarã mil peeji; jõdee Davidpa diez mil peeji.”
8 Saulpa mãga ûrik'ãri, t'ãri ãrii bap'eda, k'îraudachi mãik'aapa mãgaji:
—Davidpa ùmùk'îraarã diez mil peejida a p'anù. Mamîda mùa milpai peejida a p'anù. ¿Iru reyta papi k'inia p'anù–ek'ã? aji.
9 Maadak'ãriipa Saúl ichi t'ãridepai David ome k'îrau beeji, ichi k'ãyaara waibùara pai jîak'aapa.
10 Aù norema Tachi Ak'õrepa Saulmaa jaure k'achia pëiji. Mãgá Saúl k'îra k'awa–ee pùk'adachi ichi palaciode mãik'aapa ichi juade miasu anipaji. Mãùmisa Davidpa ichi arpa chaamaa baji ichia oopariidak'a. 11 Mamîda mãgá chaamaa bùde Saulpa Davidmaa ichi miasu bat'aji, paredmaa iru su atai jîak'aapa. Davidmaa bat'ada omé bat'aji mîda, oopi–e paji.
12 Saulpa k'awaji Tachi Ak'õrepa David k'aripa baji; jõdee ichi waa k'aripa–e bù. Maperã ichia David waawee baji. 13 Mapa ichi palaciodeepa David ãyaa pëiji mãik'aapa iru bùji soldaorã mil poro waibùa pamerã, mãgá ãra nok'oore chõode uchiamerã. 14 Maapai Davidpa ne–inaa oopariida jõmaweda pia uchiapachi, Tachi Ak'õrepa iru k'aripa bada perã. 15 Mapa Saulpa iru audupùara waawee bapachi. 16 Mamîda Israeldepema soldaorãpa mãik'aapa Judadepema soldaorãpa David k'inia iru p'anapachida, chõode wãdak'ãri, iruta ãchi naa wãpachi perã.
David Saúl k'au ome miak'ãida
17 Ewari aba Saulpa Davidmaa mãgaji:
—Mù k'au naapema Merab teeit'eeda aji, pù iru ome miak'ãimerã, mù jua ek'ari bùde pù Tachi Ak'õre–it'ee sõcharra chõoru pùrã.
Saulpa mãga jarak'ãri, ichi t'ãridepai k'îsia baji: “Piara bù filisteorãpa David peet'aadamerã, mùchi juapa peet'aai k'ãyaara.”
18 Mamîda Davidpa p'anauji:
—Mù pù k'au ome miak'ãiik'araa bùda aji, mù mãik'aapa mùchideerã ek'ariara p'anadairã awaraa israelitaarã k'ãyaara. Mãga bùta, ¿sãgá mù rey wiu payama? aji.
19 T'êepai Saulpa chi k'au Merab Davidmaa teeit'ee pada ewate pak'ãri, irumaa teei k'ãyaara, Mejolá p'uurudepema t'âjarapatap'edaa Adrielmaa teeji.
20 Mamîda Merab t'êepema Micalpa David k'inia baji. Saulmaa mãga nepùrùnadak'ãri, iru o–îa beeji, 21 k'îsia bada perã: “Mù k'au teeit'eeda ait'ee. Mamîda iru k'ap'ùa David filisteorã juade baaipiit'ee.”
Maperã Davidmaa nãga jaraji:
—Ârá wãara pù mù wiu pait'eeda aji.
22 Ma t'êepai Saulpa nãga jaraji chi mimiapataarãmaa:
—Parã David ome pedéetù eperãarã wê–emãi. Jaradapáde aji, mùa iru audú k'inia iru bairã mãik'aapa mù mimiapataarãpa iru auk'a k'inia iru p'anadairã, k'inia p'anù iru mù wiu pamerã.
23 Mãpai Davidmaa mãga jarajida.
Mamîda Davidpa p'anauji:
—¿Parãpa k'îsia p'anùk'ã mãga p'asai? ¿Sãgá rey k'au ome mù miak'ãiyama aji, mù nãgá chupùria, p'arat'a wêe bùta?
24 Ma mimiapataarãpa Saulmaa mãga jaranajida.
25 Mãpai Saulpa k'îsia k'achia iru bada perã David filisteorã juade baaipiit'ee, ma mimiapataarãmaa nãga jaraji:
—Davidmaa nãga jaranadapáde aji: “P'arat'a teei k'ãyaara pùchi wêra pari, reypa k'inia bù pùa Filisteadepema ùmùk'îraarã cien peep'eda, ãchi me e irumaa tee chemerã. Mãgá irua filisteorãmaa k'achia ooyada aji, ãchia tachimaa k'achia oopata pari.”
26 Davidmaa mãga jaranadak'ãri, iru mãgá rey wiu padai k'inia baji mãik'aapa k'îsia beeji sãga ooit'ee Saulpa jaradak'a, chi fecha jarada pai naaweda. 27 Mãpai David uchiaji ichi soldaorã ome. Peenajida Filisteadepema ùmùk'îraarã doscientos. Maap'eda Davidpa ãchi me e reymaa ateeji, ma pari chi k'au teemerã. Mãga ooda perã, Saulpa chi k'au Mical Davidmaa teeji.
28 Saulpa k'awaji Tachi Ak'õrepa David k'aripa bada mãik'aapa chi k'au Micalpa David k'inia bada. 29 Mapa irua David audupùara waawee beeji mãik'aapa ichita k'îra unuamaa iru bapachi.
30 Maapai filisteorã poro waibùarã chõode wãdak'ãri, Davidpa chõo chok'araara p'oyaapachi awaraa Saúl soldaorã poro waibùarã k'ãyaara. Maperã jõmaarãpa David t'o p'anapachida.