Saulpa jùrùpariida David peet'aait'ee
19
1 Ma t'êepai Saulpa jaraji chi warra Jonatanmaa mãik'aapa ichi ak'ùpataarãmaa David peet'aadamerã. Mamîda Jonatanpa David audú k'inia iru bada perã, irumaa jarak'oonaji. 2 Mãgaji:—Mù ak'õre, Saulpa pù peet'aa k'inia bùda aji. Mapa nu tap'edaweda tauk'a nipáji mãik'aapa mirudaríiji eperãarã p'anadak'aamãi. 3 Mù wãit'ee mù ak'õre ome pù miru bù k'ait'a. Mùa iidiit'ee pù pari mãik'aapa k'awaak'ãri irua k'îsia iru bù, pùmaa jaranait'eeda aji.
4 Aù norema Jonatán chi ak'õre Saúl ome pedeeji David k'aripait'ee. Mãgaji:
—Mùchi Rey Waibùa, pù mimiapari Davidmaa ne–inaa k'achia oonáaji. Irua maarepida pùmaa ne–inaa k'achia oo–e bù. Ma k'ãyaara pù–it'ee ne–inaa piata oopari. 5 Iru piuk'aji ma filisteo chõo k'awa bù ome chõonak'ãri. Mamîda irua p'oyaaji. Mãgá Tachi Ak'õrepa israelitaarãmaa ãra p'oyaapiji. Pùa mãga unuji mãik'aapa irua ooda k'aurepa pù o–îa beeji. ¿Sãap'eda pùa iru pee k'inia bùma, irua ne–inaa k'achia oo–e bùta? Pùa mãga ooru pùrã, p'ek'au k'achia ooit'eeda aji.
6 Saulpa Jonatán pedee ûrip'eda, ijãaji mãik'aapa mãgaji:
—Tachi Ak'õre ichita chok'ai bù k'îrapite mùa juraa bùda aji, David peepi–e pait'ee.
7 Mãpai Jonatanpa David t'â atap'eda, nepùrùji ãchi pedeedap'edaa. Maap'eda Saúl k'îrapite ateeji. Mãgá David Saúl ome waya mimia beeji.
8 Ma t'êepai israelitaarã waya jura chõonajida filisteorã ome. Made David uchiaji ichi soldaorã ome mãik'aapa filisteorã p'oyaajida. Mapa ãchi naa mãùrã jîchoojida.
9 Mamîda Tachi Ak'õrepa jaure k'achia pëidapa waya Saulmaa joree cheji. Iru ichi palaciode su–ak'ù baji miasu ome juade. Davidpa arpa chaamaa bù misa, 10 Saulpa David paredmaa su atait'ee paji ma miasupa. Mamîda Davidpa ichimaa oopi–e paji. Mapa ma miasu paredmaata su awa nâbeeji. Mãpai ma ewate p'ãrik'ua David mirudachi.
11 Aramata Saulpa chi soldaorãmaa jaraji David temaa wãdamerã iru jâade mãik'aapa aù norema tap'edaweda peet'aadamerã.
Mamîda ãra panadai naaweda, David wêra Micalpa irumaa nãga jaraji:
—Pù na p'ãrik'ua wã–e pùrã, nu pù piuit'eeda aji.
12 Aramata Micalpa David ùrabait'aaji ventanadeepa. Mãgá David mirudachi. 13 Ma t'êepai Micalpa eperãk'a bù pak'urudee ooda aù k'îrapite ùt'aa t'âpata atap'eda, p'arude bùji. Chi pudak'arak'a beemerã, chivo k'aradee k'ada bùji mãik'aapa ma jõma porobapa t'ap'a bùji.
14 Saulpa ichi soldaorã pëik'ãri David jita atade, Micalpa jaraji:
—David k'ayaa bùda aji.
15 Mãpai Saulmaa mãga jaranajida.
Mamîda irua ichi soldaorã waya pëiji nãga jarap'eda:
—¡Iru ichi camade k'ayaa bù pùjida, aneedapáde! aji. ¡Mùa iru peet'aait'ee!
16 Mãpai ma soldaorã David temaa wãdap'eda, chi cama badamãi t'îujida. Mamîda jita atadait'ee pak'ãri, unujida ma muñecak'a bù ma chivo k'ara k'ada ome.
17 Maap'eda Saulpa chi k'aumaa ijâatù iidiji:
—¿Sãap'eda mù k'ûrajima? aji. ¿Mù k'îra unuamaa iru bapari pëit'aaji–ek'ã? aji.
Mãpai Micalpa p'anauji:
—Mùmaa jarajida aji, mù peet'aait'ee, ichi pëi–e pùrã.
18 Mãgá David mirudaida perã, Saúl juadeepa uchiaji. Mãpai David Ramadee wãji mãik'aapa Samuelmaa ma jõma nepùrùji. Ma t'êepai David Samuel ome p'ananajida Nayotde, Ramá p'uuru k'ait'a. 19 Saulpa k'awaa atak'ãri David Nayotde bù, 20 ichi jua ek'ari p'anadap'edaa soldaorã pëiji David jita atanadamerã. Mama panadak'ãri, ma soldaorãpa unujida Tachi Ak'õre pedee jarapataarã pedeemaa p'anù Tachi Ak'õrepa pedeepidak'a. Ãra Samuel jua ek'ari p'anajida. Mãga nùde Tachi Ak'õre Jaure cheji ma soldaorãmaa mãik'aapa auk'a pedeemaa p'aneejida Tachi Ak'õrepa jarapidak'a. 21 Saulpa mãga k'awaa atak'ãri, awaraa soldaorã pëiji. Mamîda ãra auk'a Tachi Ak'õre pedee pedeemaa p'aneejida. Maperã Saulpa waya awaraarã pëiji. Mamîda ãra ome auk'a mãga p'asaji. 22 Mapa ichi k'ap'ùak'ù Ramadee wãji.
Panak'ãri pozo waibùa badamãi Secude, arii p'anadap'edaarãmaa iidiji:
—¿Sãma p'anùma aji, Samuel mãik'aapa David?
P'anaujida:
—Nayotde p'anùda ajida, Ramá k'ait'a.
23 Mãpai Saúl mamaa wãji. Mamîda Tachi Ak'õre Jaure ichiaba irumaa cheji. Mapa Tachi Ak'õrepa jarapidak'a pedee wãji Nayotde panarumaa Ramá k'ait'a. 24 Ma awara ichi p'aru êrat'aap'eda, Samuel k'îrapite eujãde ãk'adaa beeji pedeemaa Tachi Ak'õrepa pedeepidak'a. Mãga beeji k'ãima aba; ãstaawa, p'ãrik'ua pida. Saulpa mãga ooda perã, eperãarãpa nãga jarapachida: “¿Saúl jida Tachi Ak'õre pedee jaraparik'ã?” apachida.