Jonatanpa David k'aripada
20
1 Ma t'êepai David Nayotdeepa uchiaji mãik'aapa Jonatán badamaa wãp'eda, iidiji:—¿Mùa k'ãata oojima? aji. ¿K'ãare ne–inaa k'achiata pù ak'õremaa oojima? ¿Sãap'eda irua mù peeit'ee jùrùmaa bùma? aji.
2 Jonatanpa p'anauji:
—¡Pù piu–epù! Mù ak'õrepa ne–inaa ook'aada aji, mùmaa jara–ee. Mãga ooit'ee k'îsia iru bù pùrã, ¿sãap'eda mùmaa maarepida jara–e pajima? ¡Ma wãara–eda! aji.
3 Mamîda Davidpa mãgaji:
—Pù ak'õrepa k'awa bùda aji, pùa mù k'inia iru bapari. Maperã irua nãga k'îsia bù–ek'ã: “Jonatanpa k'awaaik'araa bù, iru t'ãri p'uanaamerã.” Tachi Ak'õre ichita chok'ai bù k'îrapite mùa juraa bù wãara pù ak'õrepa mù jùrùmaa bù peeit'ee.
4 Mãpai Jonatanpa Davidmaa iidiji:
—¿K'ãata k'inia bùma aji, mùa oomerã pù k'aripait'ee? Pùa jara bùk'a ooit'eeda aji.
5 Davidpa p'anauji:
—Nu ai ewarik'ãri fiesta oopata oodait'eeda aji. Mù wãipia bù rey ome nek'ode. Mamîda ma k'ãyaara mù mirupíji mêe, nunorema k'ewaraa paru misa. 6 Mãga nùde pù ak'õrepa mù pari iidiru pùrã, jarapáde aji, mùa chupùria iidi nâbaji mùchi p'uuru Belendee wãpimerã, mama año chaa mù ëreerãpa ne–animal Tachi Ak'õre–it'ee paapata perã na fiesta oodait'ee. 7 Irua “pia bùda” aru pùrã, jara k'inia bù iru nepùra wêe bù mù ome. Mamîda k'îraudaru pùrã, pùa k'awaai wãara irua mù peet'aa k'inia bù. 8 Mù, pù mimiapari, chupùria k'awáaji, Tachi Ak'õre k'îrapite pùa mù ome pacto ooda perã ichita k'õp'ãyo pia p'anadait'ee. Mamîda mùa ne–inaa k'achia ooji pùrã, pùchi juadoopa mù peet'áaji. ¿K'ãare–it'ee mù pù ak'õre k'îrapite ateeyama? aji.
9 Jonatanpa p'anauji:
—¡Mãga jaranaapáde! aji. Mùa k'awa ataru pùrã mù ak'õrepa pùmaa k'achia ooit'ee k'îsia bù, pùmaa jarait'eeda aji.
10 Mãpai Davidpa iidiji:
—Pù ak'õrepa k'îrau p'anauru pùrã, ¿k'aipa mùmaa jara cheit'eema? aji.
11 Jonatanpa p'anauji:
—Mêe wãdáma. Mama mùa jarait'eeda aji.
—Tachi israelitaarã Ak'õre Waibùa k'îrapite mùa pùmaa nãga juraa bù. Nunorema parumaa na horade mùa iidiit'ee k'ãata mù ak'õrepa k'îsia iru bù. Pia k'îsia bù pùrã, pùmaa jara pëiit'ee. 13 Mamîda irua pùmaa k'achia ooit'ee k'îsia bù pùrã, mùa pùmaa jarait'ee mãik'aapa mùa pù k'aripait'ee, k'ãiwee wãmerã. Mãga oo–e pùrã, Tachi Ak'õrepa mùmaa k'achia ooipia bù, chupùria k'awa–ee. Iruata pù k'aripait'ee, mù ak'õre k'aripapariidak'a. 14 Mù nãgùdeepa chok'ai uchiaru pùrã, Tachi Ak'õrepa pù chupùria k'awaa bùk'a mù chupùria k'awáaji mù peenaadamerã. 15 Jõdee mù piuru pùrã, mù warrarãmaa auk'a chupùria k'awáaji, Tachi Ak'õrepa pù k'îra unuamaa iru p'anapataarã jõmaweda jõpiru pùjida. 16 Pùa mãga oo–e pùrã, Tachi Ak'õrepa pù warrarã pia ak'ù–e pait'eeda aji.
Davidpa p'anauji:
—Pùa jarada pia bùda aji.
17 Jonatanpa David audú k'inia iru bada perã ichi k'ap'ùak'a, jaraji Davidpa juraamerã ichia jaradak'a ooit'ee. 18 Mãpai Jonatanpa mãgaji:
—Nu ai ewarik'ãri fiesta oopata oodait'ee. Pù su–ak'ù beeparimãi ak'ùdak'ãri, k'awaadait'ee pù wê–e. 19 Mamîda nunorema pida pù wã–e pak'ãri, audupùara k'awaadait'ee pù wê–e. Maperã wåji pù naaweda miru badamaa mãik'aapa mama mãu choma Ézel bùmãi miru beepáde aji. 20 Mùa sia õpee trùit'ee ma mãu choma bù eere, mùchi k'inia trùit'ee bùk'a. 21 Mãpai mùa jarait'ee mù mimiaparimaa jùrùnamerã. Mùa jararu pùrã: “Chi sia pù bùmãiipa namapai bù; atanáji”, mãgara pù k'ãiwee uchiaipia bù, maarepida pùmaa ne–inaa k'achia ooda–e pait'ee perã. Tachi Ak'õre k'îrapite mùa mãga juraa bù. 22 Mamîda mùa jararu pùrã: “Chi sia pù bùmãiipa achuwaapapai bù”, mãgara pù ãyaa wãipia bù, Tachi Ak'õrepa mãga k'inia bairã. 23 K'îra atuanaapáde aji, uchiamerã tachia juraadap'edaa Tachi Ak'õre k'îrapite.
24 Mãpai David miru beeji Jonatanpa jaradak'a. Ai ewarik'ãri fiesta oopata pak'ãri, rey Saúl mesade su–ak'ù beeji nek'oit'ee. 25 Pared ik'aawa ichi su–ak'ù beeparimãi su–ak'ù beeji. Jõdee Jonatán iru k'îrapite su–ak'ù beeji. Soldaorã poro waibùa Abner Saúl ik'aawa su–ak'ù beeji. Mamîda David su–ak'ù beeparimãi arajãgaa beeji. 26 Ma ewate Saulpa maarepida iidi–e paji David pari, nãga k'îsiada perã: “Irua oo–e paji Tachi Ak'õrepa oopiparik'a ichi k'îrapite t'îuipia beemerã. ¿Maperã che–e paji–ek'ã?” aji. 27 Mamîda aù norema ma atanede ewari omeede David su–ak'ù beeparimãi at'ãri arajãgaa baji. Mapa Saulpa chi warra Jonatanmaa nãga iidiji:
—¿Sãap'eda Isaí warra nuweda mãik'aapa idi pida nek'ode che–e pajima? aji.
28 Jonatanpa p'anauji:
—Davidpa mùmaa chupùria iidi nâbajida aji, Belendee wãpimerã. 29 Mùmaa nãga jaraji: “Mùchi p'uurudee wãpipáde aji, mùchi p'uurudepemaarãpa na fiestade ne–animal Tachi Ak'õre–it'ee paapata perã. Mù âpemapa jara pëijida aji, mù wãmerã. Pùa mù pia ak'ùru pùrã, mù wãpipáde aji, mùchi âpemaarã ak'ùde.” Mùchi Rey Waibùa, maperã iru pù ome nek'ode che–e pajida aji.
30 Mãga ûrik'ãri, Saúl k'îraudachi Jonatán ome mãik'aapa mãgaji:
—¡Pù k'ùùrù k'isua k'achia–idaa baparida aji, ne–animalk'a! ¿K'îsia bùk'ã aji, mùa k'awa–e bù pù k'õp'ãyo pia Isaí warra ome? Mãga oo bù k'aurepa pùchi nawe k'îra nejasiapimaa bùda aji. 31 ¡Isaí warra chok'ai bù misa, pù rey pa–e pait'ee! ¡Mapa iru jùrùde pïiji, mãik'aapa namaa aneepáde aji, iru peet'aait'ee perã!
32 Mãpai Jonatanpa p'anauji:
—¿Sãap'eda iru pee k'inia bùma? aji. ¿Irua k'ãare ne–inaa k'achiata oojima? aji.
33 Mãpai Saulpa ichi miasu atap'eda, Jonatán suit'ee paji. Mãgá Jonatanpa k'awaaji wãara chi ak'õrepa David peet'aa k'inia bù. 34 Mapa Jonatán k'îraudaip'eda, rey mesadeepa uchiaji. Ma ewate, ma fiesta ewari omeedepema chik'o k'o–e paji, iru audú t'ãri p'ua nâbada perã chi ak'õrepa David ãpùte pedee k'achia jarada k'aurepa.
35 Aù norema tap'edaweda Davidmaa jarada horade Jonatán mêe wãji k'ûtrãa ichi jua ek'ari mimiapari ome. 36 Chi mimiaparimaa mãgaji:
—P'irapáde aji, mùa sia trùit'ee bù atade.
Chi mimiapari p'irak'ãri, Jonatanpa sia trùji. Mãgà sia waawí baainaji. 37 Chi mimiapari ma sia baaida k'ait'a panak'ãri, Jonatanpa nãga golpe biaji:
—¿Achuwaapai bù–ek'ã? aji.
38 Mãpai chi mimiaparimaa waya biaji:
—Isapai p'iráji. Ak'ùnâ beenaapáde aji.
Mãgá chi mimiaparipa ma sia p'e atap'eda, chiparimaa aneeji. 39 Mamîda chi mimiaparipa maarepida k'awa–e paji. Jonatanpa mãik'aapa Davidpapai k'awa p'anajida k'ãata jara k'inia bù.
40 Maap'eda Jonatanpa ichi ematrùma chi mimiaparimaa teeji mãik'aapa irumaa mãgaji:
—Ãpùtee p'uurudee wãpáde aji.
41 Ma k'ûtrãa wãda t'êepai, David uchiaji ichi miru badamãiipa. Mãpai Jonatán k'îrapite bedabaida õpee bedabaidachi, tau bùùrù eujãde t'õbairumaa. Mãpai k'îra tarrade âdap'eda, ãchi omeeweda jêedachida. Mamîda David audupùara jêeji.
42 Mãpai Jonatanpa mãgaji:
—K'ãiwee wãpáde aji, Tachi Ak'õre k'îrapite tachia juraadap'edaa perã tachideerã chaa ichita pia ak'ù p'anadait'ee. Tachi Ak'õre tachi ome baparipù mãik'aapa iruata tachi k'aripait'ee mãga oodamerã.
Maap'eda David ichi ode wãji. Jõdee Jonatán ãpùtee p'uurudee wãji.