David miruda Saúl waaweepa
21
1 David Nob p'uurudee wãji. Mama panak'ãri, p'aare Ajimélec ak'ùde wãji. Ajimelecpa David unuk'ãri, p'eradachi mãik'aapa waaweepa irumaa iidiji:—¿Sãap'eda pù ituaba cheruma aji, apidaapa pù k'õp'ãyaada–ee?
2 Davidpa p'anauji:
—Reypa jaradata oo nida aji. Mamîda irua jaraji apidaamaa jaranaamerã k'ãare–it'eeta mù pëiji mãik'aapa k'ãare ne–inaata oo ni. Soldaorã mù ome nipapataarã awara ãi mù ome unudait'eeda aji. 3 ¿Pùa pan wêe bùk'ã aji, mùmaa teemerã? Pan paraa pùrã, joisomaa k'inia bù. Maa–e pùrã, pùa iru bùta mùa jitayada aji.
4 P'aarepa p'anauji:
—Pan jîp'aa wêe bùda aji. Jîp'a pan Tachi Ak'õre–it'ee awara bùdata iru bùda aji. Teeyada aji, pùchi soldaorã wêraarã ome k'ãida–e p'anù pùrã.
5 Davidpa p'anauji:
—Ichita chõode uchiadak'ãri, wêraarã ome k'ãidak'aada aji. Uchiadak'ãri, mù soldaorã mãga p'anajida. Ârá audupùara mãga p'anùda aji, reypa jaradak'a oo p'anadairã.
6 Mãpai p'aarepa teeji ma pan Tachi Ak'õre–it'ee awara bùda. Ma pan Tachi Ak'õre mesade baji. Mamîda ma ewate ãyaa ata bù baji awaraa pan wãsia bùit'ee. P'aareerãpapai mãgee pan k'odaipia baji. Mãga baji mîda, mãgà pan Davidmaa teeji.
7 Ma ewate Saúl ovejaarã ak'ùpataarã poro waibùa mama Tachi Ak'õre tede baji Tachi Ak'õre–it'ee ne–inaa oode. Mãgà Edom eujãdepema paji; t'âjarapachida Doeg. Mãgùpa Ajimélec David ome pedeemaa p'anadap'edaa ûrii baji.
8 Mãga nùde Davidpa Ajimelecmaa iidiji:
—¿Pùa nama miasu wa espada iru bùk'ã? aji. Reypa mù isapai pëida perã, mù espada wa awaraa arma anee–e pajida aji.
9 P'aarepa p'anauji:
—Iru bùda aji, Goliat espada; ma filisteo pùa peeda Elá eujã jewedaade. Jãma efoda ãpùteik'a eere p'arude beda bùda aji. K'inia bù pùrã, ateepáde aji. Waa arma wêe bùda aji.
Davidpa p'anauji:
—Mãgara téeji. Mãgà piara bùda aji, awaraa espada k'ãyaara.
10 Ma ewate David wãji ichi ode Saúl waaweepa. Panaji filisteorã p'uuru Gatde mãik'aapa ma p'uurudepema rey Aquimaa wãji. 11 Iru Aquis k'îrapite panak'ãri, Aquis ak'ùpataarãpa mãgajida:
—¿Nãgà David–ek'ã ajida, israelitaarã eujãdepema rey? ¿Nãgù–it'ee paji–ek'ã wêraarãpa nãga k'ari p'anadap'edaa pëira jõnùde: ‘Saulpa ùmùk'îraarã mil peeji; jõdee Davidpa diez mil peeji’?
12 Davidpa mãga ûrik'ãri, k'îsia nâbeeji mãik'aapa waawee baji, Gatdepema reypa ichi peepii jîak'aapa. 13 Maperã k'îra k'awa–ee pùk'adachi. Pariatua puertade p'ã wãpachi mãik'aapa iduba ichi idak'arade chawaapiji.
14 Aquipa mãga unuk'ãri, chi ak'ùpataarãmaa mãgaji: