David Adulande mãik'aapa Mizpade
22
1 David ma Gat p'uurudeepa uchiap'eda, mirunaji mãu te Adulán apatade. Chi âpemaarãpa, chi ak'õrepa mãik'aapa chi ak'õre tedepemaarãpa k'awaa atadak'ãri iru mama bù, irumaa wãjida. 2 Ma awara Davidmaa chejida nepùrade p'anadap'edaarã, Saulmaa p'arat'a paraa p'anadap'edaarã mãik'aapa Saúl jua ek'ari k'îra pia–ee p'anadap'edaarã. Mãgá David ãchi poro waibùa beeji. Ma chedap'edaarã cuatrocientos ùmùk'îraarã paji.3 Mamãik'aapa David Mizpa p'uurudee wãji. Ma p'uuru Moab eujãde baji. Mama panak'ãri, Moabdepema reymaa nãga jaraji:
—Mùa pùmaa chupùria iidi bùda aji, mù ak'õreerã nama p'anapimerã, mùa k'awaaru misa Tachi Ak'õrepa mù ome k'ãata ooit'ee.
4 Reypa p'anauji:
—Pia bùda aji.
Mãgá Davidpa chi ak'õreerã ateeji moabitaarã rey palaciodee. Mama ãra p'anapachida, David mêe miru bù misa.
5 Maapai Tachi Ak'õre pedee jarapari Gadpa Davidmaa nãga jaraji:
—Pùchi miru bùmãi waa banáaji. Waya Judá eujãdee wãpáde aji.
Mãgá David mamãik'aapa wãp'eda, banaji Jaret pak'uru jêra bùmãi. Mãgà Judá ëreerã eujãde baji.
Saulpa Nobdepema p'aareerã peepida
6 Mãùmisa Saúl Guibeá p'uurude baji ichi soldaorã poro waibùarã ome. Eede iru su–ak'ù baji tamarisco pak'uru ek'ari. Chi miasu juade iru baji. Saulpa k'awa atak'ãri David ichi eere p'anadap'edaarã ome unu atadap'edaa, 7 ichi soldaorã poro waibùarãmaa mãgaji:
—Ûrítù. Parã mùk'a, Benjamín ëreerãdepemaarã. ¿Parãpa k'îsia p'anùk'ã aji, Judá ëreerãdepema Isaí warra Davidpa parãmaa teeit'ee eujã mãik'aapa uva k'ãi mùa oodak'a? ¿K'îsia p'anùk'ã irua parã jua ek'ari soldaorã mil wa cien bùit'ee, mãùrã poro waibùarã padamerã? 8 ¿Parãpa mù ãpùte pedeetee p'anù–ek'ã? aji. Apidaapa jarada–e paji mù warrapa pacto ooda Isaí warra ome. ¡Parãdepema apidaapa mùde k'îsiada–e paji jarada–e pak'ãri mù warrapa mù mimiapari k'aripamaa bù mù k'îra unuamaa iru beemerã! Maperã ârá mù mimiaparipa mù nùmaa bù peet'aait'ee.
9 Mãpai Edom eujãdepema Doeg, mama Saúl soldaorã poro waibùarã ome ak'ùnâ badapa, mãgaji:
—Mùa Isaí warra unuji Nob p'uurude. Ajitob warra Ajimélec ome pedee baji. 10 Ma awara Ajimelecpa Tachi Ak'õremaa ùt'aa iidiji David pari mãik'aapa irumaa teeji chik'o filisteo Goliat espada ome.
11 Saulpa mãga ûrik'ãri, Ajitob warra Ajimélec t'â pëiji awaraa Nobdepema p'aareerã ome. Mãùrã Ajimélec ëreerã paji. Ãra Saúl k'îrapite pachedak'ãri, 12 ichia Ajimelecmaa mãgaji:
—Ajitob warra, ûríji.
Ajimelecpa p'anauji:
—Rey Waibùa, pùa jara bùk'a mùa oo k'inia bùda aji.
13 Mãpai Saulpa iidiji:
—¿Sãap'eda pù Isaí warra ome mù ãpùte ne–inaa k'achia oojidama? aji. Pùa irumaa teeji pan, espada ome. Ma awara iru pari ùt'aa iidiji, irua mù k'îra unuamaa iru beemerã mãik'aapa mù jùrùmerã peet'aait'ee, ârá oomaa bùk'a.
14 Ajimelecpa p'anauji:
—Pù mimiapataarã t'ãide wê–eda aji, ne–inaa ichita pia oopataarã Davidk'a. Ma awara iru pù wiu mãik'aapa pù soldaorã poro waibùa. Pù palaciodepemaarãpa iru pia ak'ùpata. 15 Iru pari mùa ichita ùt'aa iidipari. Maperã Mùchi Rey Waibùa, pùa mù mãik'aapa mù ëreerã nepùrade baaipiik'araa bù. Mù, pù mimiaparipa maarepida k'awa–e bùda aji, pùa David ome nepùra iru bù.
16 Mamîda rey Saulpa mãgaji:
—¡Ajimélec, pù, pù ak'õre ëreerã paara piudait'eeda! aji.
17 Mãga jarap'eda, ichi jâapataarãmaa nãga jaraji:
—¡Tachi Ak'õre p'aareerã peek'óotù, ãra jida David eere p'anadairã! Ãrapa k'awajida David miru wãda. Mamîda mùmaa jarada–e pajida aji.
Mamîda Saúl jâapataarãpa Tachi Ak'õre p'aareerã pee k'iniada–e paji. 18 Maperã reypa Edomdepema Doegmaa mãgaji:
—¡Mãgara, pùa peek'oopáde! aji.
Mãpai Doeg ma p'aareerã ârù wãp'eda, peek'ooji. Ma ewate p'aareerã efod linodee k'ada jâ p'anadap'edaarã ochenta y cinco peek'ooji. 19 T'êepai Saúl wãji Nob p'uurudee, p'aareerã p'anapatap'edaa p'uurude. Mama espadapa peek'oojida ùmùk'îraarã, wêraarã, warrarã, ewaa t'o beerã paara, ma awara ãra p'ak'aarã, burroorã mãik'aapa ovejaarã.
20 Mamîda mãga oomaa p'anùde Ajimélec warra aba t'âjarapatap'edaa Abiatar uchiaji ãra juadeepa mãik'aapa Davidmaa wãji. 21 Mama panak'ãri, Davidmaa nepùrùji Saulpa Tachi Ak'õre p'aareerã peek'oopida.
22 Mãpai Davidpa mãgaji:
—Ma ewate Nob p'uurude jã edomita Doeg unuk'ãri, mùa k'awaji irua Saulmaa jarak'oonait'ee mù pedee bada Ajimélec ome. Mù k'aurépata pùchideerã jõmaweda piujidada aji. 23 Mamîda waaweenáaji. Mù ome béeji. Chi pù peedait'ee jùrùmaa p'anùùrãpa mù jida jùrùmaa p'anù. Pù mù ome beeru pùrã, mùa pù jâait'eeda aji.