Davidpa Queilá p'uurudepemaarã k'aripada
23
1 Ewari aba Davidmaa nãga jara chejida:—Filisteorã israelitaarã p'uuru Queiladepemaarãmaa chõode chejida mãik'aapa trigo tau ewaa chi edeepa ãyaa atada chùa atajidada ajida.
2 Davidpa mãga ûrik'ãri, Tachi Ak'õremaa nãga ùt'aa iidiji:
—¿Mù filisteorã ome chõode wãipia bùk'ã? aji.
Tachi Ak'õrepa p'anauji:
—Wãpáde aji, mãgùùrã juadeepa Queilá p'uurudepemaarã k'aripade.
3 Mamîda David jua ek'ari p'anadap'edaarãpa mãgajida:
—Tai nama Judá eujãde waawee p'anapata, Saúl ichi eere p'anùùrã chõode chedai jîak'aapa. ¡Audupùara waawee p'anapataadait'eeda ajida, Queilá p'uurudee wãruta pùrã filisteorã ome chõode!
4 Mãpai Davidpa waya Tachi Ak'õremaa ùt'aa iidiji k'awaait'ee wãdai wa wãda–e pai.
Tachi Ak'õrepa p'anauji:
—Queilá p'uurudee wåtù. Mùa parãmaa filisteorã p'oyaapiit'eeda aji.
5 Mãpai David Queiladee wãji ichi jua ek'ari p'anadap'edaarã ome. Ará panadak'ãri, filisteorã ome chõomaa p'aneejida. Ãra p'oyaajida mãik'aapa ãra ne–animalaarã jãri atajida. Mãgá Davidpa ma Queilá p'uurudepemaarã filisteorã juadeepa k'aripa ataji.
6 Aù naaweda Ajimélec warra Abiatar mirunak'ãri Davidmaa, Tachi Ak'õre tedepema efod ateeji. Mapa Queilade anipaji.
Saúl David t'êe wãda
7 Saulpa ûrik'ãri David ichi eere p'anadap'edaarã ome Queilá p'uurude p'anù, k'îsiaji: “Tachi Ak'õrepa iru mùmaa p'oyaapiit'ee. ¿Sãgá uchiayama aji, p'uuru murallapa t'ùak'au bùdeepa, puerta ma murallade bee candao ome jâa bee pùrã?” 8 Mãpai Saulpa chi soldaorã jõmaweda chip'e ataji wãdait'ee Queilá p'uuru wap'ùra atade mãik'aapa David jita atade.
9 Mamîda Davidpa mãga k'awaa atak'ãri, jaraji Abiatarmaa efod aneemerã. 10 Mãpai Davidpa ùt'aa iidiji:
—Tachi Ak'õre, israelitaarã Ak'õre Waibùa, mù, pù mimiaparipa k'awa bù mù k'aurepa Saulpa k'îsia iru bù cheit'ee na p'uurudepemaarã peek'oode. 11 ¿Wãara Saulpa mù jùrù cheit'eek'ã? ¿Queiladepemaarãpa mù irumaa teedaik'ã? Tachi Ak'õre, israelitaarã Ak'õre Waibùa, mù, pù mimiaparimaa jarapáde aji.
Tachi Ak'õrepa p'anauji:
—Saúl cheit'eeda aji.
12 Mãpai Davidpa waya iidiji:
—¿Queiladepemaarãpa mù, mùchi soldaorã ome Saulmaa teedaik'ã? aji.
Tachi Ak'õrepa p'anauji:
—Teedait'eeda aji.
13 Mãpai David ichi soldaorã ome Queiladeepa uchiaji. Perá seiscientos paji. Pariatua nipajida, Saulpa ãra ununaamerã. Saulpa k'awaak'ãri ãra Queiladeepa uchiadap'edaa, mamaa wã–e paji.
David eujã pania wêe bùde
14 David chi soldaorã ome mirunajida soldaorã mirupatap'edaamãi eujã pania wêe bùde, ee jêra bùmãi Zif p'uuru k'ait'a. Ewari chaa Saulpa ãra jùrùpachi. Mamîda Tachi Ak'õrepa unupik'aa paji. 15 Mãga baji mîda, Davidpa Saúl waawee baji, ichi peet'aait'ee jùrùmaa bada perã. Maperã beeji Hores p'uurude, eujã pania wêe bùde Zif p'uuru k'ait'a.
16 Mama p'anùde ewari aba Saúl warra Jonatán wãji Horedee David ak'ùde. Mama irua David ûraaji waapùara Tachi Ak'õrede ijãamerã. 17 Mãgaji:
—Waaweenáaji mù ak'õrepa pù jita ata–e pait'ee perã. Pù israelitaarã rey pait'eepù. Jõdee mù pù jua ek'ari poro waibùa pait'ee. Mù ak'õrepa mãga k'awa bùda aji.
18 Mãpai Tachi Ak'õre k'îrapite ãra pedeeteejida ichita chik'inia p'anapataadait'ee. Maap'eda Jonatán ichi temaa wãji. Jõdee David Horede beeji.
19 Mamîda ûk'uru Zif p'uurudepemaarã Guibeá p'uurudee wãdap'eda, Saulmaa nãga jarajida:
—David ichi soldaorã ome tai eujãde miru p'anùda ajida. Eujã pania wêe bù sur eere soldaorã mirupatamãi Hores p'uurude p'anù Jaquilá eede. 20 Maperã, Tachi Rey Waibùa, wåji pùchi wã k'inia bak'ãri. Taipa pù juade David baaipidait'eeda ajida.
21 Saulpa p'anauji:
—Tachi Ak'õrepa parãmaa pia ooipia bù, mù chupùria k'awaadap'edaa perã. 22 Ârá wåtù mãik'aapa iidítù iru sãmata bù. Ma awara iidítù k'aipa iru unudoo. Mãgá mùa k'awai wãara iru mama bù wa mãga–e, mùmaa jarapata perã David ik'awaa bapari. 23 Iru miruparimãi jõmaweda k'awaadak'ãri, mùmaa jara chétù. Mãpai mù wãit'ee parã ome. Wãara iru ma eujãde bù pùrã, mùa iru jùrùit'ee Judá ëreerãdepema uchiadap'edaarã eujã jõmaade.
24 Zif p'uurudepemaarã Saúl ome despediidap'eda, ãchi eujãdee wãjida. Mãga nùde David chi soldaorã ome p'anajida Maón eujã pania wêe bùde. Mãgà eujã Arabá eujãde bù, Jesimón eujã pania wêe bù sur eere. 25 Mama p'anùde Saúl ichi soldaorã ome iru jùrùde wãjida. Eperãarãpa Davidmaa mãga nepùrùdak'ãri, ichi eere p'anadap'edaarã ome wãjida awara ãi, ma Maón eujã pania wêe bùde. Mama mãu–idaa bùmãi p'aneejida. Saulpa k'awaa atak'ãri, ma Maón eujã pania wêe bùdee wãji David jùrùde. 26 Ee bi abaade Saúl ichi soldaorã ome wãjida. Jõdee chi apema ee bi eere David ichi soldaorã ome isapai wã nipajida, k'awa p'anadap'edaa perã Saúl ãchi k'ait'a cheru. Mãùmisa Saulpa ichi eere p'anadap'edaarã ome David mãik'aapa iru soldaorã wap'ùra atajida. Mamîda ãra jita atadait'ee jõnùde, 27 eperã awara ãiipa pëida pacheji mãik'aapa Saulmaa mãgaji:
—¡Rey Waibùa, isapai ãpùtee chéji, filisteorã tachi eujãde t'îudap'edaa perã tachi ome chõode!
28 Mãga ûrik'ãri, Saúl ichi soldaorã ome ãpùtee wãjida filisteorã ome chõode. Maperã ma ee jêra bùmãi t'â bùjida ‘peñade awara–awaraa wãdap'edaa’.
29 Mamãik'aapa David wãji Engadidee, soldaorã mirupatap'edaamaa.