Davidpa Saúl pee–e pada
24
1 Saúl filisteorã ome chõo bap'eda, ãpùtee chek'ãri, eperãarãpa nepùrùjida David miru bù eujã pania wêe bù Engadi apatap'edaade. 2 Mãpai Saulpa Israeldepema soldaorã tres mil jùrùt'erap'eda, ‘mêepema cabraarã’ apatap'edaa ee mãu–idaa jêra bùdee wãjida David jùrùde.3 Ma wãdade ovejaarã t'ùak'au paraa bùmãi panajida. Mama mãu te bada perã, Saúl ãde t'îuji. David ichi soldaorã ome ma mãu te edupùara miru p'anajida. Mamîda Saúl eere p'anadap'edaarãpa k'awada–e paji.
4 Saúl mama bùde David k'õp'ãyoorãpa Davidmaa nãga jarajida:
—Idi Tachi Ak'õrepa ooit'eeda ajida, ichia pùmaa nãga jaradak'a: “Pù k'îra unuamaa iru bapari pù juade baaipiit'ee, pùa iru ome oomerã pùchia oo k'inia bùk'a.”
Mãpai David juajîa wãp'eda, Saúl ârùpema p'aru i t'ùù ataji. Saulpa k'awa–e paji. 5 Mamîda Saúl uchiada t'êepai, David k'îsia p'ua nâbeeji mãga ooda perã.
6 Mapa chi soldaorãmaa mãgaji:
—Taawa Tachi Ak'õrepa mù k'aripai mùchi rey waibùamaa ne–inaa k'achia oonaamerã. ¡Mùa iru p'oyaa pee–e parãpa jaradap'edaak'a, Tachi Ak'õrépata iru jùrùt'erada perã tachi rey pamerã!
7 Mãgá Davidpa ichi soldaorãmaa jaraji Saúl peenaadamerã. Saúl mãu tedeepa uchiap'eda, ichi ode wãit'ee paji. 8 Mamîda David iru t'êe isapai uchiap'eda, t'ùmùùpa nãgá t'âmaa beeji:
—¡Rey Waibùa, Rey Waibùa!
Saulpa ãpùtee ak'ùk'ãri, David bedabaidachi tau bùùrù eujãde t'õbairumaa, ak'ùpiit'ee Saúl waawee bù.
9 Maap'eda mãgaji:
—Rey Waibùa, ¿sãap'eda pùa eperãarã pedee ijãa bùma aji, jaradak'ãri mùa pù jùrùmaa bù pùmaa ne–inaa k'achia ooit'ee? 10 Idi pùa pùchi taupa unu bù Tachi Ak'õrepa pù mù juade baaipiji na mãu tede. Mù soldaorãpa mù ùmùajida pù peet'aamerã. Mamîda mùa pùmaa maarepida k'achia oo k'inia–e paji. Mapa mùa jaraji: “Mùa rey p'oyaa pee–eda aji, Tachi Ak'õrepa iru jùrùt'erada perã tachi rey pamerã.”
11 ’Pù mù ak'õrék'ata bù. Ak'àji mùa pù ârùpema p'aru pite t'ùù atada mù juade iru bùda aji. Mùa mãga t'ùù ataji mîda, pù pee–e paji. Mãgá k'awáaji mùa pùmaa ne–inaa k'achia oo k'inia–e bù. Mùa ichita oopari pùa jara bùk'a. Mãgá mùa pùmaa ne–inaa k'achia oo–e bù mîda, pùa mù jùrùmaa bù peeit'ee. 12 Tachi Ak'õrépata k'awa bù k'aipa ne–inaa k'achia oomaa bù, pùa wa mùa. Iruata pù miapiit'ee pùa mùmaa k'achia oo bù pari. Mamîda, Rey Waibùa, mùa pùmaa ne–inaa k'achia oo–e pait'ee. 13 ¿K'îsia k'awaa beerãpa nãga jarapata–ek'ã? aji. ‘‘K'achia beerãdeepa ne–inaa k'achia uchiaparida’’ apata. Maperã mùa pùmaa ne–inaa k'achia oo–e pait'ee. 14 Pù, israelitaarã rey bùta, ¿k'ai t'êe nima? ¿K'aita jùrù nima? Pù k'îrapite mù usa piudák'ata bù maa–e pùrã pulgák'ata bù. 15 Maperã Tachi Ak'õrepa tachi omeeweda ak'ùit'ee mãik'aapa jarait'ee k'aipa ne–inaa k'achia oopari. ¡Iruata pù juadeepa mù k'aripait'eeda! aji.
16 David pedee aupak'ãri, Saulpa mãgaji:
—¿Mù warra David, pù–ek'ã aji, mùmaa pedeemaa bù?
Mãga jarap'eda, jêedachi.
17 Maap'eda mãgaji:
—Mù k'ãyaara pùa ne–inaa pipùara oopari. Pùa mùmaa ne–inaa pia oopari. Jõdee mùa pùmaa ne–inaa k'achia oopari. 18 Idi pùa mùmaa k'awapiji pùa mùmaa ne–inaa piata oopari, Tachi Ak'õrepa mù pù juade bùji mîda, pùa mù pee–e pada perã. 19 ¿K'aipa ichi k'îra unuamaa iru bapari unu atak'ãri, irumaa ne–inaa k'achia oo–e payama? Mùa k'inia bù Tachi Ak'õrepa pùmaa pia oomerã, idi pùa mùmaa pia ooda pari. 20 Ârá mùa k'awa bù pù wãara rey pait'ee. Pù jua ek'ari israelitaarã pia p'anapataadait'ee. 21 Mapa ârá Tachi Ak'õre k'îrapite juraapáde aji, pù mãgá rey pak'ãri, mùchideerã jõpi–e pait'ee, israelitaarãpa mù t'â mãik'aapa ãra t'â k'îra atuanaadamerã.
22 Mãpai Tachi Ak'õre k'îrapite Davidpa juraaji Sauldeerã jõpi–e pait'ee. Maap'eda Saúl ichi soldaorã ome ichi palaciodee wãjida. Jõdee David ichi soldaorã ome wãjida ãchi miru p'anadap'edaamaa ee jêra bùde.