Joabpa rey David ùtrùada
19
1 Eperãarãpa Joabmaa nepùrùnajida David jêe nâbù mãik'aapa audú t'ãri p'ua nâbù chi warra Absalón piuda k'aurepa. 2 Mãga ûridak'ãri, soldaorã k'îra pia–ee p'aneejida, o–îa p'aneedai k'ãyaara ma ewate chõo p'oyaadap'edaa perã. 3 Ma awara ãchi p'uurude t'îudak'ãri, k'îup'ee, k'îra nejasia pùk'a t'îujida, chõo atuadap'edaarã t'îupatak'a. 4 Mãga nùde rey Davidpa ichi k'îra juapa wãk'ap'eda, jarajêe nãga golpe jarapachi: “¡Aai, mù warra, Absalón; mù warra, Absalón! ¡Aai, mù warra, Absalón!”5 Joabpa mãga ûrik'ãri, rey David bada cuartode t'îuji mãik'aapa mãgaji:
—Rey Waibùa, pùa pù–it'ee mimiapataarã k'îra nejasiapimaa bùda aji. Idi taipa pù warrarã, pù k'aurã mãik'aapa pù wêraarã, pù wêra k'ãipariirã paara k'aripa atajidada aji, pù k'îra unuamaa iru p'anapatap'edaarã juadeepa. 6 Rey Waibùa, idi pùa ak'ùpiji pù–it'ee p'ua–e bù pù soldaorã poro waibùarã mãik'aapa pù soldaorã. Pù k'îra unuamaa iru p'anapataarã k'inia iru bàk'apù bù. Jõdee pù k'inia iru p'anapataarã pùa k'îra unuamaa iru bàk'apù bù. ¿Pù–it'ee piara bak'aji–ek'ã aji, Absalón k'ãyaara tai jõmaweda piudap'edaa paara? 7 Rey Waibùa, ârá uchíaji pùchi soldaorãmaa pedee pia jarade. Mãga oo–e pùrã, Tachi Ak'õre k'îrapite mùa juraa bù na p'ãrik'uaweda soldao apida pù ome bee–e pait'ee. Mãga p'asaru pùrã, pù audupùara k'achiade baaiyada aji, pù k'ûtrãawedapemadeepa ârá parumaa baaida k'ãyaara.
8 Mãga ûrik'ãri, rey David p'irabaiji mãik'aapa p'uuru t'îupatamãi wãp'eda, su–ak'ù beeji. Ichi soldaorãpa mãga k'awaadak'ãri, jõmaweda iru k'îrapite wãjida.
Mãùmisa Absalón eere p'anadap'edaa israelitaarã ãchi te chaa miruk'oodachida. 9 Israeldeepa uchiadap'edaa ëreerã jõmaweda t'ãide nãga pedee para beeji: “Rey Davidpa tachi uchiapijida ajida, filisteorã juadeepa mãik'aapa awaraarã tachi k'îra unuamaa iru p'anapatap'edaarã juadeepa. Irua mãga ooji mîda, Absalón k'aurepa iru tachi eujãdeepa uchiaji. Ârá tachi rey wê–e, 10 tachia rey bùdap'edaa, Absalón, chõo jõnùde piuda perã. ¿Sãap'eda jarada–ema ajida, rey David waya chemerã?”
11 Rey Davidpa k'awaak'ãri ma israelitaarãpa jara p'anadap'edaa, nãga jara pëiji p'aareerã Sadocmaa mãik'aapa Abiatarmaa: “Pedéetù Judá ëreerãdepema poro waibùarã ome. Nãga jarátù: ‘Mùa k'awaa bù israelitaarãpa jara p'anù. ¿Sãap'eda parãpa mù ata cheda–e p'anùma ateedait'ee mù palaciodee? 12 Parã mù ëreerã perã awaraa israelitaarã k'ãyaara paråpata mù ata chedaipia bù.’ 13 Ma awara Amasamaa nãga jarátù: ‘¿Pù mùchi ëreerã–ek'ã? Ârá pù ichita mù soldaorã poro waibùara pait'ee Joab k'ãyaara. Tachi Ak'õre k'îrapite mùa mãga juraa bù. Mùa mãga oo–e pùrã, Tachi Ak'õrepa mù audú miapiipia bù, chupùria k'awa–ee.’ ”
14 Judá ëreerãdepemaarãpa Davidpa jara pëida ûridak'ãri, eperã apai pùk'a Davidmaa jara pëijida chemerã ichi eere p'anadap'edaarã ome. 15 Mãgá David ichi eere p'anadap'edaarã ome ãpùtee wãjida Jordán todee. Judá ëreerãdepemaarã Guilgal p'uurude chip'edaidap'edaarã mamaa wãjida David k'îrachuude mãik'aapa k'aripade Jordán to sîadait'ee. 16 Ichiaba Bajurín p'uurudepema aba, Benjamín ëreerãdepema, Guerá warra Simí isapai wãji ma Judá ëreerãdepemaarã ome rey k'îrachuude. 17 Iru ome Benjamín ëreerãdepema mil soldaorã wãjida. Ma awara Saúl mimiapataarã poro waibùa pada Siba wãji chi warrarã quince ome mãik'aapa ichi mimiapataarã veinte ome. Ma jõmaweda Jordán to ide panajida David pai naaweda. 18 Mãpai to sîajida rey ichideerã ome k'aripadait'ee. K'îsiajida mãga ooda paara, reypa ãchi waya pia ak'ùk'aji.
—Rey Waibùa, mù chupùria k'awáaji. Pù Jerusalendeepa uchiak'ãri, mù, pù mimiaparipa pùmaa ne–inaa k'achia ooji. Ma ooda k'aurepa mù ome k'îrau banáaji. 20 Mùa k'awa bù mùa p'ek'au k'achia ooda. Mapa mù José ëreerãa naa chejida aji, pùmaa chupùria iidide.
21 Mãpai Sarvia warra Abisaypa mãgaji:
—¿Simí peedaipia bù–ek'ã aji, pedee k'achia jarada perã pù, Tachi Ak'õrepa jùrùt'erada reymaa?
22 Mamîda Davidpa mãgaji:
—Sarvia warrarã, ¡na nepùra parãde–epù! ¿Sãap'eda idi parã mù k'îra unuamaa iru p'anapataaråk'ata p'anùma? Idi mùta waya israelitaarã rey beeru. Mapa idi israelita apida mùa piupi–eda aji.
23 Mãga jarap'eda, Simimaa ak'ùji mãik'aapa juraaji iru peepi–e pait'ee.
24 Saúl ãichak'e Mefiboset ichiaba David k'îrachuude cheji. Rey uchiadadeepa ma ewate parumaa t'ãri p'uapa Mefibosetpa ichi bùùrù sùù–ee baji; idak'ara wê–ee baji mãik'aapa p'aru t'õ–ee baji, ichi rey k'ap'ùa pia cherumaa.
25 Iru Jerusalendeepa chek'ãri rey k'îrachuude, reypa mãgaji:
—Mefiboset, ¿sãap'eda pù mù ome che–e pajima? aji.
26 Irua p'anauji:
—Mùchi Rey Waibùa, mù mimiaparipa mù k'ûrat'aajida aji. Mù, pù mimiapari, p'oyaa t'ùak'aa perã, jaraji irua burro atanamerã, aù ârù mù auk'a pù ome wãit'ee. Mamîda Sibapa mù traicionaaji. 27 Rey Waibùa, mù pù ome wãpii k'ãyaara, mù ãpùte pùmaa pedee k'achia jaranaji. Rey Waibùa, mù–it'ee pù Tachi Ak'õre angelk'a bù. Maperã pùa k'inia bùk'a mù ome oopáde aji. 28 Pùa mùchideerã jõmaweda jõpiipia bak'aji. Mamîda Rey Waibùa, pùa mù chupùria k'awap'eda, mù nek'opiji pùchi mesade. ¿K'ãata waa mùa iidiyama aji, pù, mùchi Rey Waibùa mù–it'ee oomerã?
29 Mãpai rey Davidpa mãgaji:
—Waa jaranaapáde aji. Mùa jara bù pù Siba ome pùchideerã eujã t'oodamerã.
30 Mamîda Mefibosetpa p'anauji:
—Irua ma eujã jõmaweda ataipia bùda aji. Mù–it'ee p'ua–e bù. Aba mù o–îa bù pù, mùchi rey waibùa k'ap'ùa pia waya cheru perã pù temaa.
31 Galaad eujãdepema Barzilay ichiaba che baji Roguelín p'uurudeepa rey k'aripade to sîak'ãri. Mama rey ome despediit'ee paji. 32 Barzilay audú chonaa baji: ochenta año iru baji. Rey David Majanayin p'uurude bak'ãri, ma eperã p'arat'ara bada perã, ne–inaa jõmaade rey k'aripaji.
33 Mãgá ichi pia ak'ù bada perã, reypa Barzilaymaa mãgaji:
—Mù ome Jerusalendee chepáde aji. Mama mùa jõdee pù pia ak'ùit'eeda aji.
34 Mamîda Barzilaypa p'anauji:
—Rey Waibùa, mù nãgá chonaa bùta, ¿k'ãare–it'ee pù ome wãyama aji, Jerusalendee? 35 Mù ochenta año iru bùda aji. Waa t'ãri o–îadaik'aa mãik'aapa p'ua sentik'aa. Nek'ok'ãri wa ne–inaa tok'ãri, k'awak'aa warraa bù wa warraa–e bù. Ma awara mù k'ùùrù k'î bairã, k'aripataarãpa k'aripata p'oyaa ûrik'aa. Mù wãda paara, pù–it'ee servi–e bak'aji. 36 Jîp'a mù, pù mimiapari, pù k'õp'ãyaait'ee Jordán to sîap'eda, waawipai. Waa mùa k'inia–e bù pùa mù–it'ee ne–inaa oomerã. 37 Mapa mùa pùmaa chupùria iidi bù mù ichiak'au pëimerã mùchi p'uurudee, mama mù ak'õreerã ùadap'edaamãi mù ùadamerã jai–idaak'ãri. Mamîda mù warra Quimán nama bù. Iru pù mimiapari. Iru mù pari pù ome ateei. Pùa oo k'inia bùk'a iru ome oopáde aji.
38 Mãpai reypa mãgaji:
—Pia bùda aji. Quimán ateeit'ee. Pùa jara bùk'a ooit'ee iru ome. Jõmaweda pùa mùmaa iidi bùk'a ooit'eeda aji.
39 Mãpai eperãarã jõmaweda Jordán to sîajida, rey paara. Maap'eda reypa Barzilay uritarrade k'îra ât'aaji despediit'ee mãik'aapa jaraji Tachi Ak'õrepa iru pia ak'ù bapariimerã. Mãpai mãgà chonaa ãpùtee wãji ichi temaa.
Judá ëreerãdepemaarã awaraa israelitaarã ome aupedeedap'edaa
40 Mãpai rey David Guilgal p'uurudee wãji. Iru ome wãjida Quimán, Judá ëreerãdepema soldaorã mãik'aapa israelitaarã soldaorã esa–auk'a. 41 Mama panadak'ãri, ma israelitaarãpa reymaa jara chejida:
—Rey Waibùa, ¿sãap'eda Judá ëreerãdepemaarãpa naapùara pù atanajidama ajida, Jordán to sîak'ãri pùchideerã ome mãik'aapa pùchi soldaorã ome?
42 Judá ëreerãdepemaarãpa p'anaujida:
—Mãga oojida rey tai ëreerãdepema perã. ¿Sãap'eda parã k'îrau p'anùma? ajida. Táipata rey chik'o k'oda–e p'anù mãik'aapa tai–it'ee iru net'aa atada–e p'anù.
43 Mãpai israelitaarãpa mãgajida:
—Taipa audupùara derecho iru p'anù tachi rey ome, tai ëreerã diez perã. Jõdee parã ëreerã abapai. Mãga bùta, ¿sãap'eda parãpa tai ek'ariara unu p'anùma? ajida. Taipa naapùara k'îsia iru p'anajidada ajida, tachi rey chemerã.
Mãgá aupedee p'aneejida. Mamîda Judá ëreerãdepemaarã k'îraura p'anajida awaraa Israeldeepa uchiadap'edaa ëreerãdepemaarã k'ãyaara.