Sabapa rey Davidpa jaradak'a oo–e pada
20
1 Mama Guilgalde baji eperã ne–inaa k'achia ooyaa bù. Iru Benjamín ëreerãdepema Bicrí warra paji. T'âjarapachida Sabá. Mãgà eperãpa trompeta chaaji arii p'anadap'edaa israelitaarã chip'edaidamerã mãik'aapa mãgaji:—¡Israelitaarã, tachi Isaí warra David ëreerãdepema–epù! ¡Tachi temaa erreunadáma! aji.
2 Mãpai ma israelitaarã ùmùk'îraarã jõmaweda mama p'anadap'edaarãpa David atabaibëijida Bicrí warra Sabá ome wãdait'ee. Mamîda Judá ëreerãdepemaarã ãchi rey eere p'aneejida mãik'aapa iru k'õp'ãyaajida Jordán to ideepa Jerusalende parumaa.
3 David panak'ãri ichi palaciode Jerusalén p'uurude, chip'e ataji chi wêra k'ãipariirã diez atabëida te ak'ùdamerã. Mãpai te awaraade ãra jâa paraa t'ù nâbùnaji. Mama ãra ak'ùpachi mãik'aapa ãramaa chik'o teepachi. Mamîda waa ãra ome k'ãi–e paji. Mãgá ãra p'êtrãarãk'a mama p'anapachida ãchi piurutamaa. Davidpa mãga ooji israelitaarã taide chi warra Absalón ãchi ome k'ãida perã.
4 Maap'eda rey Davidpa mãgaji chi soldaorã poro waibùa Amasamaa:
—Judá ëreerãdepema soldaorã t'âpipáde aji, mãik'aapa k'ãima õpeede nama p'e aneepáde aji.
5 Amasá wãji reypa jaradak'a oode. Mamîda k'ãima õpee waa taarãji Judá ëreerãdepema soldaorã chip'e atait'ee.
6 Maperã Davidpa nãga jaraji awaraa soldaorã poro waibùa Abisaymaa:
—Bicrí warra Sabapa tachimaa ne–inaa k'achiara ooit'eeda aji, Absalonpa ooda k'ãyaara. Mapa mù jâapataarã chip'e atap'eda, iru jùrùde wåtù. Maa–e pùrã iru p'uuru murallapa t'ùak'au bùde t'îup'eda, tachia iru p'oyaa jita atada–e payada aji.
7 Mãgá Joab ome nipapatap'edaarã, David jâapataarãdepema quereteorã, peleteorã ome mãik'aapa soldaorã chõo k'awaara beerã Abisay ome uchiajida Bicrí warra Sabá jùrùde.
8 Gabaonde mãu choma bada k'ait'a panadak'ãri, Amasá ãra ome unu cheji. Mãga bùde Joabpa ichi chõopari p'aru jâ baji, k'ùrrùde jâpari ome. K'ùrrùde ichi espada jâ baji. Mamîda iru t'ùak'ãri, ma espada baaidachi. 9 Mãùmisa Joab juarapa Amasá idak'ara jitaji iru saludaait'ee mãik'aapa iidiji:
—¿Sãga bùma primo? ¿Pia wãk'ã? aji.
10 Mãgá saludaa bada perã, Amasapa unu–e baji Joabpa ichi juabi eereepa espada iru bada. Mapa Amasá atu bùde Joabpa bide sut'aaji. Chi jâsi chedachi. Ma sudapapai piudachi. Maap'eda Joab chi âpema Abisay ome, soldaorã ãra ome nipadap'edaarã paara wãjida Bicrí warra Sabá jùrùde. 11 Mãga nùde Joab jua ek'ari bada soldaopa Amasá k'ap'ùa baaida ik'aawa ak'ùnâ beep'eda, mãgaji:
—¡Joab eere p'anùùrã mãik'aapa David eere p'anùùrã Joab ome wãdaipia bùda! aji.
12 Mamîda irua unuk'ãri Amasá k'ap'ùa ode waasoo baibù mãik'aapa soldaorã jõmaweda ak'ùnâ p'aneeruta ak'ùdait'ee, chi k'ap'ùa piuda t'ap'a bùji p'arupa. Mãpai o esa–auk'aapa ãyaa ateeji. 13 Maap'eda soldaorã jõmaweda Joab ome wãjida ma Sabá jùrùdait'ee.
14 Mãga nùde Sabá israelitaarã eujãde wãyaaji Abel Betmacá p'uurude parumaa. Ichi ak'õre Bicrideepa uchiadap'edaarã jõmaweda t'îujida ma p'uurude ichi ome. 15 Joab ichi eere p'anadap'edaarã ome panadak'ãri Abel Betmacá p'uurude, wap'ùra atajida. Mãpai rampa oojida ùt'à murallade padait'ee, mãgá ma muralla ãrik'oodai jîak'aapa. 16 Mãga oo p'anùde ma p'uurudepema wêra aba k'îsia k'awaa badapa muralladeepa nãga biaji:
—¡Ûrítù, ûrítù! ¡Joabmaa jaradapáde aji, k'ait'aara chemerã! ¡Mù pedee k'inia bùda aji, iru ome!
17 Joab k'ait'aara wãk'ãri, mãgà wêrapa iidiji:
—¿Pù Joabk'ã? aji.
P'anauji:
—Mùpù, aji.
Ma wêrapa mãgaji:
—Ûripáde aji, mù, pù mimiaparipa jararu.
Joabpa p'anauji:
—Ûrimaa bùda aji.
18 Mãpai ma wêrapa mãgaji:
—Chonaarãweda mãgapachida: “Ne–inaa k'awa k'inia bak'ãri, iidinátù Abel Betmacá p'uurudepemaarãmaa.” Mãga oopachida ãchi nepùra jõpidait'ee. 19 Na p'uurudepemaarã k'ãiwee p'anapatada aji. Na p'uuru Israel eujãdepema p'uuru waibùa bù. Nãpemaarãpa chõo jùrùdak'aa apidaa ome mãik'aapa tachi rey ichita waaweepata. Mãga bù mîda, pù cheji na p'uuru jõpide. ¿Sãap'eda Tachi Ak'õrepa teeda eujãdepema p'uuru jõpi k'inia bùma? aji.
20 Joabpa p'anauji:
—Mãga–eda aji. Mùa na p'uuru jõpi k'inia–e. 21 Jîp'a cheji Efraín ëreerã eujã ee jêra bùdepema Bicrí warra, t'âjarapata Sabá atade. Ichia soldaorã chip'e wã bù chõodait'ee rey David ome. Pùa iru mùmaa teeru pùrã, tai ãpùtee erreudait'eeda aji.
Mãpai ma wêrapa mãgaji:
—Pia bùda aji. Muralladeepa chi poro bat'a pëidait'eeda aji.
22 Mãpai ma wêra pedeenaji ma p'uurudepemaarã ome. Iru k'îsia k'awaa bada pedee ijãajida. Mãpai Bicrí warra Sabá o t'ùap'e peejida mãik'aapa bat'a pëijida muralladeepa Joabpa nù badamãi. Mãga unuk'ãri, Joabpa jaraji trompeta chaadamerã. Mãga ûridak'ãri, soldaorã ãpùtee erreujida mãik'aapa wãjida ãchi te chaa. Jõdee Joab Jerusalendee wãji reymaa nepùrùde.
Rey David jua ek'ari poro waibùarã
(1 Crónicas 18.14-17)
23 Joab Israeldepema soldaorã jõmaarã poro waibùa beeji. Jõdee Joyadá warra Benaías rey jâapataarã, ma quereteorã mãik'aapa peleteorã poro waibùa paji. 24 Adonirán eperãarãmaa mimiapipataarã poro waibùa paji. Ajilud warra Josafat rey secretario paji. 25 Reypa ne–inaa oopariida p'ãpari Seva paji. Sadoc mãik'aapa Abiatar p'aareerã mimia oopachida. 26 Ichiaba yairita Irapa David–it'ee p'aare mimia oopachi.