Gabaón p'uurudepemaarã k'îra jõ–ee p'anadap'edaa
21
1 David rey bùde jarrara paraaji año õpee wãyaarude. Mãga nùde Davidpa Tachi Ak'õremaa chupùria iidiji.Tachi Ak'õrepa mãgaji:
—Mùa jarrara pëijida aji, Saulpa ichideerã ome ne–inaa k'achia oodap'edaa perã Gabaón pidaarã peedak'ãri.
2 Mãpai Davidpa t'â pëiji Gabaón pidaarã, chi peeda–ee p'anadap'edaarã, chedamerã. (Ma eperãarã israelitaarã–e paji. Amorreorãdeepa uchiadap'edaarã paji. Chonaarãweda israelitaarãpa mãùrã ome pacto oojida chõoda–ee p'anapataadait'ee. Mamîda ma t'êepai Saúl rey beek'ãri, audú israelitaarã mãik'aapa Judá ëreerãdepemaarã k'aripa k'inia bada perã, jùrùji mãùrã jõpiit'ee.)
—Mùa ¿k'ãata ooyama aji, parã k'aripait'ee? ¿K'ãata ooima parã–it'ee, Saulpa k'achia ooda pari? K'inia bù parãpa Tachi Ak'õrepa eperãarã jùrùt'erada waya pia ak'ùpataadamerã.
4 Ma Gabaón pidaarãpa p'anaujida:
—P'arat'a k'iniada–eda ajida, Saulpa mãik'aapa ichideerãpa k'achia oodap'edaa pari tai ëreerãmaa. Ichiaba k'iniada–eda ajida, ma k'aurepa israelitaarã piudamerã.
Mãpai Davidpa mãgaji:
—Mãgara jaradapáde aji, mùa k'ãare ne–inaa ooi parã–it'ee.
5 P'anaujida:
—Saulpa tai ëreerã jõmaweda jõpi k'inia baji, Israel eujãde apida p'aneenaadamerã. 6 Ma k'achia ooda pari taipa k'inia p'anù Sauldeepa uchiadap'edaarã siete ùmùk'îraarã taimaa teemerã. Tachi Ak'õre k'îrapite taipa ãra âyapa jâadait'ee Guibeá p'uurude; Tachi Ak'õrepa rey Saúl jùrùt'erada apata p'uurude.
Reypa p'anauji:
—Pia bùda aji. Parãmaa ãra teeit'eeda aji.
7 Mamîda Davidpa tee–e paji Saúl ãichak'e, Jonatán warra Mefiboset, aù naaweda Tachi Ak'õre k'îrapite Jonatanmaa juraada perã irudeerã ak'ù bait'ee. 8 Mefiboset teei k'ãyaara teeji Saúl warrarã omé Ayá k'au Rizpa ome ooda. Ma warrarã omé t'âjarapachida Armoní mãik'aapa Mefiboset. Davidpa ichiaba teeji Saúl k'au Merabpa warrarã joisomaa, Mejolá p'uurudepema Barzilay warra Adriel ome ooda. 9 Mãùrã teep'eda ma Gabaón pidaarãmaa, ãchia ma Sauldeepa uchiadap'edaarã âyapa jâajida ee bùde Tachi Ak'õre k'îrapite. Mãgá ma eperãarã siete piujida, ma eujãdepemaarãpa ewaa cebada tau ewadak'ãri.
10 Maap'eda Ayá k'au p'êtrãa Rizpapa chi–ùapata p'arupa carpa ooji mãik'aapa aù ek'ari ma peñade jêra beeji. Mama beeji, ma cebada tau ewa p'aneedak'ãriipa k'oijara parumaa. Mama bùde ãstaawa ipanaarã ma piudap'edaarã k'ap'ùa piuda k'ait'a chepi–e paji mãik'aapa p'ãrik'ua ne–animalaarã k'achia beerã jërek'ooji. 11 Saúl wêra k'ãipari pada Rizpapa mãgá ooda Davidmaa nepùrù chedak'ãri, 12 iru wãji Saúl mãik'aapa Jonatán bùùrù atade ãra ùadap'edaamãiipa. (Saúl Jonatán ome piudap'eda, Galaad eujãdepema Jabés p'uurudepemaarãpa ãra k'ap'ùa jãri atanajida filisteorã juadeepa ãchi p'uuru Betsandeepa. Saúl p'oyaadap'eda mãik'aapa Guilboa eedeepa mamaa ateedap'eda, filisteorãpa ma k'ap'ùa piuda ãchi p'uuru t'îupatade baijira bùjida.) 13-14 Ma k'ap'ùa piuda bùùrù beeda atapip'eda ma Jabés p'uurudepemaarã juadeepa, Davidpa jaraji ateedamerã chi âyapa jâadap'edaa k'ap'ùa piuda ome ùadait'ee Saúl ak'õre Cis ùadap'edaamãi. Ma jãùra Benjamín ëreerãdepemaarã eujãde baji Zela p'uuru k'ait'a. Ma jõma oojida reypa jaradak'a. Ma t'êepai Tachi Ak'õrepa waya ûriji israelitaarãpa ùt'aa iididap'edaa ãchi eujã pari.
Abisaypa David k'aripada piunaamerã
15 Waya filisteorãpa chõo jùrù p'aneejida israelitaarã ome. Mapa David ichi soldaorã poro waibùarã ome uchiajida chõode. Chõo jõnùde David juatau wêe beeji. 16 Mãga bùde gigante Refadeepa uchiada, t'âjarapatap'edaa Isbibenobpa David peeit'ee paji. Ichi miasu broncedee ooda kilo õpee waa chùk'ùa baji mãik'aapa ichi k'ùrrùde espada chiwidi anipaji. 17 Mamîda Sarvia warra Abisay wãji David k'aripade. Ma filisteo ârù wãji mãik'aapa peeji.
Ma chõoda t'êepai David soldaorãpa jarajida:
—Rey Waibùa, taipa juraa p'anùda ajida, pù waa tai ome uchia–e pait'ee chõode pù piunaamerã, Israel eujãde pù lamparak'a bairã.
Jura chõodap'edaa giganteerã ome
(1 Crónicas 20.4-8)
18 Ma t'êepai waya chõojida filisteorã ome Gob p'uurude. Ma chõodap'edaade jusatita, t'âjarapatap'edaa Sibecaypa giganteerãdeepa uchiada Saf peeji. 19 Awaraa chõodap'edaade filisteorã ome Gob p'uurude, Belén p'uurudepema Yaré Oreguín warra, Eljananpa Gatdepema gigante Goliat apatap'edaaa peeji. Mãgà gigante miasu nêchoma baji. Nêchoma baji pak'uru p'aru k'apatadepemak'a.
20 Gat p'uurude ichiaba chõojida. Made gigante choma baji. Mãgà audú ùt'ùa baji mãik'aapa jua k'â veinticuatro iru baji; seis jua chaa, seis bùùrù chaa. Mãgà ichiaba gigante Refadeepa uchiada paji. 21 Mãgùpa israelitaarã ome chõo jùrù bada perã, David âpema Simá warra, Jonatán apatap'edaapa peeji. 22 Ma gigante k'îmari uchiajida Gat p'uurudepema gigante Refadeepa. Mãgá ãra gigantedeepa uchiajida mîda, Davidpa ichi jua ek'ari poro waibùarã ome ma jõmaweda p'oyaajida.