Husaypa David ichi eere p'anadap'edaarã ome k'aripada
17
1 Maap'eda Ajitofelpa Absalonmaa nãga jaraji:—Mùmaa soldaorã doce mil jùrùt'erapipáde aji, na p'ãrik'uaweda wãdamerã David jùrùde. 2 Iru juatau wêe beek'ãri mãik'aapa sê bak'ãri, iru ârù wãdait'ee. Mãga oodak'ãri, iru ome nipapataarã jîchoodai p'era jõnùpa. Iru aupai peet'aadai. 3 Ma t'êepai mùa iru eere p'anùùrã pùmaa aneeit'ee. Wêra ewaa miak'ãi bù ichi k'ima bùmãi cheparik'a, mãga pùk'a ãra chedait'ee. Mãgá eperã aba, pùa jùrù bùtapai, piuit'ee. Apemaarã chok'ai uchiadayada aji.
4 Absalonpa mãik'aapa israelitaarã poro waibùarãpa Ajitofel pedee ijãajida. 5 Mamîda Absalonpa arquita Husay t'âpiji, iru ûraa ichiaba ûri k'inia bada perã.
6 Husay iru k'îrapite pachek'ãri, Absalonpa iidiji:
—¿Ajitofelpa mùmaa ûraadak'a oodaipia bùk'ã? aji. ¿Pùa k'ãata k'îsia bùma? aji.
7 Husaypa p'anauji:
—Irua ûraa pia jarapari mîda, et'ewa ûraada pia–e bùda aji. 8 Pùa k'awa bù pù ak'õre ichi soldaorã ome sõcharra p'anapata. Ârá ãra k'îrau p'anù, oso wêra chi warrarã jãri atadak'ãri, k'îrau baparik'a. Ma awara pù ak'õre jura chõoyaa bapari. Iru awaraarã k'ãipatamãi k'ãi–e pait'eepù. 9 ¿Na hora iru miru bù–ek'ã mãu tede wa awara ãi? Ma awara iru eere p'anùùrãpa pùchi soldaorã ârù naapùara chõode uchiaruta pùrã, eperãarãpa jaradai: ‘‘Absalón soldaorã peek'oojidada’’ adai. 10 Mãpai pù soldaorã sõcharra p'anù pùjida mãik'aapa leonk'a waaweeda–ee p'anù pùjida, p'erak'oodait'ee. Israelitaarã jõmaarãpa k'awa p'anù pù ak'õre chõo k'awaa bapari mãik'aapa ichi eere p'anùùrã sõcharra p'anù.
11 ’Maperã mùa nãga ûraa bù: Rey Waibùa, israelitaarã jõmaweda chip'e atáji Dan p'uurudeepa Berseba p'uurude parumaa. Cho–k'ara p'anadait'ee ipu tau nãusaa cho–k'ara paraaparik'a p'usa ide. Rey Waibùa, pùchi k'ap'ùak'ùta ãra naa wãipia bùda aji. 12 Mãgá tai pù ak'õre ome chõonadai iru bùmãi. Iru ârù wãdait'ee sereno eujã ârù baaiparik'a. Iru soldaorã jõmaweda peek'oodait'ee, iru paara. 13 Iru p'uuru murallapa t'ùak'au bùde mirudaru pùrã, tachi israelitaarã jõmaarãpa jâk'ara ateedait'ee mãik'aapa ma muralladepema mãu aba–abaa ãyaa p'e atadap'eda, to chak'ede bat'at'aadait'ee jõt'aarutamaa. Mãgá mãu apida mama bee–e pak'ãri, ãra p'oyaadait'eeda aji.
14 Absalonpa mãik'aapa awaraa israelitaarãpa mãgajida:
—Arquita Husaypa ûraada piara bùda ajida, Ajitofelpa ûraada k'ãyaara.
Tachi Ak'õrepa ãramaa mãga k'îsiapiji oonaadamerã Ajitofel ûraa piara bada jaradak'a. Ichia mãga ooji Absalón jõpiit'ee bada perã.
15 Ma t'êepai Husaypa p'aareerã Sadocmaa mãik'aapa Abiatarmaa jaranaji Ajitofelpa ûraada Absalonmaa mãik'aapa israelitaarã poro waibùarãmaa. Ichiaba ichia ûraada jaraji. 16 Ma awara mãgaji:
—Isapai Davidmaa nãga jara pïitù: “Rey Waibùa, na p'ãrik'ua beenáaji eujã pania wêe bùdepema eujã jewedaade. Ma k'ãyaara isapai Jordán to sîanáji Absalón eere p'anùùrãpa apida peenaadamerã.’’
17 Ma p'aareerã warrarã Jonatán mãik'aapa Ajimaz Enroguel pania poátrù uchia badamãi p'anajida, p'uuru pidaarãpa ãra ununaadamerã. Mapa ma p'aareerãpa wêra ãchi–it'ee mimiapari bada pëijida ma k'ûtrãarãmaa Husaypa nepùrùda isapai Davidmaa jaranadamerã. 18 Mamîda awaraa k'ûtrãapa ãra uchia wãda unuji mãik'aapa Absalonmaa jaranaji. Maperã Jonatán mãik'aapa Ajimaz isapai wãdap'eda, panajida Bajurín p'uurude. Mãpema eperã te ãuk'idaa pozo badade t'îudachida. 19 T'êepai ma te chipari wêrapa ma pozo wãk'a nâbùji mãik'aapa aù ârù trigo tau p'e jêra bùji. Mãgá apidaapa ãra mama miru p'anù k'awada–e pai.
20 Absalón eere p'anadap'edaarã ma eperã tede pachedak'ãri, chi wêramaa iidijida:
—¿Sãma p'anùma ajida, Ajimaz mãik'aapa Jonatán?
Ma wêrapa p'anauji:
—Nama wãyaajidada aji. Toidaa wãpari ode wãjidada aji.
Mãpai ma Absalón eere p'anadap'edaarã wãjida ãra jùrùde. Mamîda unuda–e pak'ãri, ãpùtee wãjida Jerusalendee. 21 Ãra wãdap'edaa t'êepai, Jonatán Ajimaz ome ma pozodeepa uchiajida mãik'aapa isapai p'ira wãjida rey Davidmaa jarade. Ará panadak'ãri, nãga jarajida:
—Isapai to sìatù, Ajitofelpa ûraada perã Absalón eere p'anùùrã parã ome chõo chedamerã.
22 Aramãgá David mãik'aapa ichi eere p'anadap'edaarã jõmaweda isapai Jordán to sîajida. Aù norema tap'eweda apida wê–e paji ãra p'anadap'edaamãi.
23 Ajitofelpa k'awaak'ãri ichia ûraadak'a ooda–e padap'edaa, ichi burro atap'eda, ichi p'uuru t'odamaa wãji. Ichi temãi panak'ãri, jara bëiji ichi net'aa pia jâa k'awaadamerã. Maap'eda ichi otaude jâk'arapa jâ nâbùp'eda, âyapa jâa piudachi. Mãgá ichi juadoopa piup'eda, ùajida chi ak'õre ùadap'edaamãi.
David Majanayin p'uurude
24 Absalón israelitaarã ome Jordán to sîa wãruta misa, David ichi eere p'anadap'edaarã ome Majanayin p'uurude panajida. 25 (Aù naaweda Absalonpa Amasá bùji Joab pari ichi soldaorã poro waibùa pamerã. Amasá Israeldeepa uchiada Itrá warra paji. Chi nawe Najás k'au Abigaíl paji. Mãgà Joab nawe Sarvia âpewêra paji.) 26 Mãgá David t'êe wãdade Absalonpa israelitaarã ichi eere p'anadap'edaarã ome ãchi carpa eebai jira bùjida Galaad eujãde.
27 David mãik'aapa ichi ome nipadap'edaarã Majanayin p'uurude panadak'ãri, nãgà eperãarã uchiajida iru ome unude: amonitaarã p'uuru Rabadepema Najás warra Sobí; Lo Debar p'uurudepema Amiel warra Maquir mãik'aapa Galaad eujãde bada Roguelín p'uurudepema Barzilay. 28 Mãùrãpa aneejida joip'aruk'a bee poroba ome, k'uuru metaldee ooda mãik'aapa yoorodee ooda; trigo tau, cebada tau, harina, net'a tau paada, haba, lenteja, 29 miéle, cuajada mãik'aapa queso ooda p'ak'a jubadee wa oveja jubadee. Ma jõma aneejida Davidpa mãik'aapa ichi ome nipadap'edaarãpa k'odamerã. K'îsiajida eujã pania wêe bùdeepa chedap'edaa perã, sê p'anù, jarrapa p'anù mãik'aapa opisia p'anù.