Sibapa Davidmaa chik'o aneeda
16
1 David ichi ome nipadap'edaarã waawipai panadak'ãri, Mefiboset mimiapari Siba uchiaji David ome unude. Burro omé ârù anee wãji doscientos pan, cien ne–inaa p'ep'edee uva p'oodadee ooda, cien ne–inaa p'ep'edee higojõ p'oodadee ooda mãik'aapa vino ne–ede t'ùda.2 Reypa mãga unuk'ãri, iidiji:
—¿K'ãare–it'ee na net'aa aneeruma? aji.
Sibapa p'anauji:
—Burro aneeji Rey Waibùadeerã aùde wãdamerã. Pan ne–inaa p'ep'edee ome aneeji pù soldaorãpa k'odamerã. Vino aneejida aji, juatau wêedarutaarãpa todamerã eujã pania wêe bùde.
3 Mãpai reypa iidiji:
—¿Sãma bùma aji, pù chipari pada ãichak'e, Mefiboset?
Sibapa p'anauji:
—Jerusalende beejida aji, irua k'îsia bairã israelitaarãpa iru rey bùdai chi ak'õchona rey pada pari.
4 Mãpai Davidpa mãgaji:
—Mãgara mùa naaweda Mefibosetmaa teeda ârá përeda aji.
Mãpai Siba bedabaidachi mãik'aapa mãgaji:
—¡Rey Waibùa, mùa k'inia bùda aji, pùa mù ichita nãgá pia ak'ùmerã!
Simipa Davidmaa pedee k'achia jarada
5 Rey David panak'ãri Bajurín p'uurude, eperã Sauldeepa uchiadap'edaarãdepema uchiaji. Mãgà Guerá warra, Simí paji. Mãgùpa Davidmaa pedee k'achia jara chewãpachi. 6 Ichiaba mãu bat'apachi Davidmaa mãik'aapa poro waibùarã iru jua ek'ari p'anadap'edaarãmaa. Mãga oopachi, David jâapataarãpa iru wap'ùra iru p'anajida mîda. 7 Ma Simipa reymaa nãgá ik'achia jarapachi:
—¡Ne–inaa k'achia ooyaa bù mãik'aapa eperã peeyaa bù, namãik'aapa wãpáde! aji. 8 ¡Tachi Ak'õrepa pù k'achia oomaa bù Saúl ëreerã peepida perã, pù iru pari rey beeit'ee! ¡Ârá Tachi Ak'õrepa pù k'ãyaara pù warra Absalón rey mimiade bùji! ¡Pùa k'achia ooda k'aurepa nama bùda aji, pù chîara peepari perã!
9 Mãpai Sarvia warra Abisaypa reymaa mãgaji:
—¿Sãap'eda na usa piudak'a bùpa mùchi rey waibùamaa nãgá ik'achia jaramaa bùma? aji. ¡Âraweda jarapáde! aji. ¡Mùa iru poro t'ùap'et'aait'eeda! aji.
10 Mamîda reypa mãgaji:
—Sarvia warrarã, ichiak'au bùdapáde aji. ¿Tachi Ak'õrepa irumaa mãga jarapi bù–ek'ã? Tachi Ak'õrepa mãga jarapi bù pùrã, ¿k'aipa iru pedeepiamaa bayama? aji.
11 Mãpai Abisaymaa mãik'aapa poro waibùarã ichi jua ek'ari beerã jõmaweda arii p'anadap'edaarãmaa ak'ùp'eda, rey Davidpa mãgaji:
—Mùchi warrapa pida jùrùmaa bù pùrã mù pee atapëiit'ee, ¡audupùara nãgà Benjamín ëreerãdepemapa mùmaa ne–inaa k'achia oo k'inia bù! Ichiak'au bàtù mùmaa pedee k'achia jaramerã. ¿Tachi Ak'õrepa irumaa mãga jarapi bù–ek'ã? 12 Taawa Tachi Ak'õrepa mù chupùria nâbù unuk'ãri, mù bendiciai mùmaa pedee k'achia jarapii k'ãyaara, idi mùa ûri bùk'a.
13 Mãpai David mãik'aapa ichi ome nipadap'edaarã ãchi ode wãjida. Jõdee ma Simí ee bide auk'a nipaji mãik'aapa pedee k'achia jara wãpachi, mãu bat'a wãpachi mãik'aapa ãchimaa yooro p'ora p'o wãpachi. 14 Rey David mãik'aapa ichi ome nipadap'edaarã Jordán to ide panadak'ãri, mama âimaa p'aneejida, audú sê p'anadap'edaa perã.
Absalón Jerusalén p'uurude bada
15 Mãga nùde Absalón Jerusalén p'uurude baji israelitaarã ome mãik'aapa Ajitofel ome. 16 David k'õp'ãyo, arquita Husaypa mãga unuk'ãri, Absalonmaa wãp'eda, nãga jaraji:
—¡Mùa k'inia bù rey pia bapariimerã! ¡Mùa k'inia bù rey pia bapariimerã!
17 Mãga ûrik'ãri, Absalonpa iidiji:
—¿Mãga jara bùpa pù k'õp'ãyomaa ak'ùpi bùk'ã aji, pù iru ome k'õp'ãyo pia? ¿Sãap'eda pù k'õp'ãyo pia ome wã–e pajima? aji.
18 Husaypa p'anauji:
—Wã k'inia–e pajida aji. Mù bee k'inia bù Tachi Ak'õrepa mãik'aapa na p'uuru pidaarãpa, israelitaarã jõmaarãpa paara, jùrùt'eradap'edaa ome. 19 Ma awara mù aba–it'ee mimiaru pùrã, mù k'õp'ãyo warra–it'ee mimiait'ee. Mapa Rey Waibùa, pù–it'ee mimiait'ee pù ak'õre–it'ee mimia badak'a.
20 Maap'eda Absalonpa Ajitofelmaa iidiji:
—¿K'ãata pùa ûraa bùma aji, taipa oodamerã?
21 Ajitofelpa p'anauji:
—K'ãipáde aji, pù ak'õre wêra k'ãipariirã ome, irua nama bëida perã ichi te ak'ù p'anadamerã. Mãgá israelitaarã jõmaarãpa k'awaadai wãara pùa, mùchi rey waibùa, pù ak'õre k'îra unuamaa iru bù mãik'aapa audupùara pù eere t'îu k'inia p'anadait'eeda aji.
22 Mãpai Absalon–it'ee te chak'e ne–edee ooda bùjida rey David palacio terrazade. Mama israelitaarã taide Absalón k'ãiji David wêra k'ãipariirã ome. 23 Maapai jõmaarãpa Ajitofel unupachida Tachi Ak'õre pedee jaraparik'a. Davidpa mãik'aapa Absalonpa paara iru mãga unupachida. Mapa Absalonpa ooji irua jaradak'a.