Absalonpa chi ak'õre mimia jãri ata k'inia bada
15
1 Taarã pak'ãri, Absalonpa carreta caballo ome ataji aùde nipait'ee. Ma awara ùmùk'îraarã cincuenta chip'e ataji ichi k'ap'ùa jâadamerã mãik'aapa ichi wãrumaa naa p'iradamerã. 2 Ewari chaa p'irabaik'ãri, Jerusalén p'uuru t'îupatamãi bainâ banapachi. Mãgá eperãarã chedak'ãri ãchi nepùra reymaa jaradait'ee, p'uurude t'îudai naaweda, Absalonpa iidipachi: “¿Parã sãpemáarãma?” apachi. P'anaudak'ãri Israeldeepa uchiada ëreerãdepema, 3 irua nãga jarapachi: “Wãara reypa pù nepùra ûriipia bùda apachi. Mamîda rey pari apida wê–eda apachi, pù k'aripait'ee.” 4 Ichiaba mãgapachi: “Mù na eujãdepema charra pada paara, pia bak'aji. ¡Mãgá chi mùmaa nepùra jara cherutaarã pia k'aripak'ajida!” apachi.5 Ma awara eperã iru k'ait'a chek'ãri saludaait'ee, irua jua teepachi mãik'aapa wëre atap'eda, k'îra ât'aapachi. 6 Mãga oopachi israelitaarã jõmaarã ome, ãra reymaa chedak'ãri ãchi nepùra ak'ùmerã. Absalonpa mãga oo bùpa israelitaarãpa iru k'inia iru p'aneejida.
7 Año k'îmari wãyaap'eda, ewari aba Absalonpa rey Davidmaa nãga jaraji:
—Rey Waibùa, mùa pùmaa chupùria iidi k'inia bùda aji, mù wãpimerã Hebrón p'uurudee. Mama mùa Tachi Ak'õremaa ne–inaa jaradak'a oo k'inia bùda aji. 8 Mù, pù mimiapari, Siria eujãde, Guesur p'uurude bak'ãri, mùa Tachi Ak'õremaa jarajida aji, irua mù pëiru pùrã nama Jerusalendee, mãgara mù Hebrondee wãit'eeda aji, iru–it'ee ne–inaa paapide.
9 Davidpa p'anauji:
—K'ãiwee wãpáde aji.
Mãpai Absalón Hebrondee wãji. 10 Mamîda mãga bùde Absalonpa eperãarã merã pëiji jõma Israeldeepa uchiada ëreerãmaa nãga jaranadamerã: “Parãpa trompeta chaa bù ûridak'ãri, nãga jarátù: ‘Absalón israelitaarã rey Hebrón p'uurude.’ ” 11 Ma awara doscientos Jerusalendepemaarã t'â pëiji Hebrondee wãdamerã ichi ome. Mamîda ãramaa maarepida jara–e paji ichi rey pa k'inia bada. 12 Mama panadak'ãri, ne–animalaarã peepik'ãri paapiit'ee, Absalonpa t'â pëiji rey David ûraapari aba Ajitofel chemerã. Mãgà eperã Guiló p'uurudepema paji. Mãgá Absalonpa imeraa jara bùpa ichi eere chok'araara atee wãji.
David ichi eere p'anadap'edaarã ome Jerusalendeepa jirabododap'edaa
13 Mãga nùde eperã abaapa Davidmaa jaranaji Absalonpa israelitaarã ichi eere chip'e wã.
14 Mãpai Davidpa nãga jaraji poro waibùarã ichi jua ek'ari bee ichi ome Jerusalende p'anadap'edaarãmaa:
—¡Âraweda wãdáma aji, maa–e pùrã Absalón juadeepa tachi p'oyaa uchiada–e pait'ee! ¡Isapai wãdáma! aji. ¡Irua tachi nama unu cheru pùrã, tachimaa ne–inaa k'achia ooi mãik'aapa na p'uurudepemaarã espadapa peek'ooyada! aji.
15 Ma poro waibùarãpa p'anaujida:
—Rey Waibùa, pùa jara bùk'a taipa oodait'eeda ajida.
16 Mãgá David uchiaji ichideerã ome mãik'aapa ichi eere p'anadap'edaarã ome. Aba wêra k'ãipari diez atabëiji, ichi palacio ak'ù p'aneedamerã. 17 P'uuru k'idaa panadak'ãri, ak'ùnâ p'aneejida. 18 Poro waibùarã ichi ek'ari beerã ichi ik'aawa ak'ùnâ p'anajida. Jõdee ichi jâapataarã, quereteorã, mãik'aapa peleteorã, ãra k'îrapite wãyaa wãjida Gatdepema guititaarã seiscientos soldaorã ome.
19 Mãga nùde reypa mãùrã poro waibùa, guitita Itaymaa mãgaji:
—¿Sãap'eda pù tai ome auk'a cheruma? aji. Ãpùtee wåji rey chiwidi Absalón eere t'îude, pù awaraa eujãdepema perã mãik'aapa pùchi eujãdeepa jëret'aadap'edaa perã. 20 Ewaapai pù pacheji. ¿Mùa sãgá jaraima pù tai ome chemerã? Mùa k'awa–e bù sãmaata wãda. Ãpùtee wåji pùchi auk'aarã ome. Mùa k'inia bùda aji, Tachi Ak'õrepa parã k'inia iru bapariimerã mãik'aapa pia ak'ùpariimerã.
21 Mamîda Itaypa reymaa mãgaji:
—Rey Waibùa, Tachi Ak'õre ichita chok'ai bù k'îrapite mãik'aapa pù k'îrapite mùa nãga juraa bù. Pù wãrumaa mù, pù mimiapari, auk'a wãit'eeda aji, piuru pùjida.
22 Davidpa p'anauji:
—Mãgara tai ome chepáde aji.
Mãgá ma guitita Itay mãik'aapa ichi ome nipapatap'edaarã, ãchideerã paara, David ome auk'a wãjida. 23 Ma eujãdepemaarã jõma jêe para beeji unudak'ãri ãra Cedrón to chak'e sîa wãda. David ome wãdap'edaarã iru naa erreu wãjida eujã pania wêe bùdee. 24 Ãra ome auk'a wãjida p'aare Sadoc p'aare Abiatar ome, awaraa Leví ëreerãdepemaarã Tachi Ak'õre baaltek'a bù atee wãdap'edaarã paara.a Ma baaltek'a bù eujãde bùjida David ome wãdap'edaarã jõmaweda p'uurudeepa uchiaruta misa.
25 Maap'eda reypa p'aare Sadocmaa mãgaji:
—Tachi Ak'õre baaltek'a bù ãpùtee ateepáde aji. Tachi Ak'õrepa mù k'ariparu pùrã, irua mù waya ãpùtee aneeit'ee mãik'aapa ma baaltek'a bù waya mùmaa unupiit'ee iru baparimãi. 26 Mamîda Tachi Ak'õrepa mù pia–ee ak'ùru pùrã, mãgara irua k'iniata mù ome ooipia bùda aji.
27 Ichiaba reypa p'aare Sadocmaa nãga jaraji:
—Pù, pùchi warra Ajimaz ome mãik'aapa Abiatar ichi warra Jonatán ome waya p'uurudee k'ãiwee wãdapáde aji. 28 Mãùmisa mù wãit'ee eujã jewedaadee, eujã pania wêe bùmãi. Mama nùit'eeda aji, parãpa jara pëirutamaa.
29 Mãga oojida. Sadocpa Abiatar ome Tachi Ak'õre baaltek'a bù ãpùtee Jerusalendee ateejida mãik'aapa mama p'aneejida. 30 Mãùmisa David jêe wãji Olivo ee nok'odee. Bùùrù arajãgaa wãji mãik'aapa ichi poro wãk'a wãji ak'ùpiit'ee t'ãri p'ua bù. Ichi ome nipadap'edaarã auk'a jêe wãjida mãik'aapa poro wãk'a wãjida. 31 Davidmaa nepùrùdak'ãri Ajitofel auk'a Absalón eere t'îuda, Davidpa Tachi Ak'õremaa nãga chupùria iidiji: “Tachi Ak'õre, oopináaji Ajitofelpa k'îsia iru bùk'a.”
32 David ee nok'ode pak'ãri Tachi Ak'õremaa ùt'aa t'âpariidamãi, irua arquita t'âjarapatap'edaa Husay unuji. T'ãri p'uapa mãgà eperã p'aru jê baji mãik'aapa ichi porode it'abarre p'ora iru baji.
33 Davidpa mãgùmaa mãgaji:
—Pù mù ome wãru pùrã, pùa mù p'oyaa pia k'aripa–eda aji. 34 Mamîda pù ãpùtee Jerusalendee wãru pùrã, nãga jarai Absalonmaa: ‘‘Rey Waibùa, mù, pù mimiaparipa ooit'eeda ai, pùa oopi bùk'a, naaweda mùa pù ak'õrepa oopida oopariidak'a.’’ Pùa mãga ooru pùrã, mù k'aripait'ee Ajitofelpa oonaamerã ichia k'îsia iru bùk'a. 35 Mama pùa p'aareerã Sadoc mãik'aapa Abiatar unuit'ee. Ãrapa pù k'aripadait'ee. Pùa jõma ûriru palaciode mù, Davidmaa jara pëipáde aji. 36 Ichiaba mama p'anù Sadoc warra Ajimaz mãik'aapa Abiatar warra Jonatán. Pùa k'awaru net'aa jõma ãra ome jara pëipáde aji.
37 Mãgá David k'õp'ãyo Husay ichiaba ãpùtee wãji Jerusalendee. Absalón ma p'uurude t'îu bak'ãri, iru panaji.